Brugseni amigartooruteqartoq naatsorsuutinilu kukkusoqarsimasoq paasineqarluni
Kalaallit Nunaanni Brugseni (KNB) 2024-mi 14,5 millionit koruuninik amigartooruteqarpoq. Suliffeqarfik nutaanik aamma qullersaqalerpoq.
Brugsenimi kaaviiaartitat 2023-mut sanilliullugit 2024-mi 3 procentimik qaffariarput, akileraarutilli ilanngaatigereerlugit ukiumut angusat 14,5 millionit koruuninik amigartooruteqarfiupput.
Arkivfoto: Leiff Josefsen
2024 Brugsenimut amigartoorfiuvoq.
Ukiumoortumik naatsorsuutit KNB’ip aningaasaqarnikkut unammilligassaqarneranik erseqqarissumik takussutissiisut niuertarfik tusagassiutinut nalunaarummi allappoq.
Kaaviiaartitat 2023-mut sanilliullugit 3 procentimik qaffariarsimapput, akileraarutilli ilanngaatigereerlugit ukiumut angusat 14,5 millionit koruuninik amigartooruteqarput.
Brugseni naapertorlugu angusat pisiniarfiup illutaanik -15,5 mio. koruuninik appartitsinermik sunnerneqarsimavoq aammalu kursimit +3,4 mio. koruuninik iluanaaruteqarnernit.
2023-imi akileraarutit ilanngaatigereerlugit angusat, suliffeqarfiup quersuarmi uninngasuutaasa nalingi 21,6 mio. koruunimiittut annertuumik kukkuneqarsimaneri pissutaallutik, angusat 1 mio. koruunimiit maannakkut -14,9 mio. koruuninut amigartoorutinngorlugit aaqqinneqarsimasut aamma paasissutissiissutigineqarpoq.
Pissutaasut pillugit Brugseni ima allappoq:
- Taamatut pitsaanngitsumik angusaqarnermut peqqutaasut annersarivaat nioqqutissanik pisortornerup aamma quersuarni aqutsinerit naammaginanngitsumik ingerlanneqarsimaneri, minnerunngitsumillu ERP-systemimut nutaamut ikaarsaarnermi nioqqutissat eqqortumik akilersorneqartarsimannginneri.
Siulersuisuni siulittaasoq: Pitsaanerungaartumiilersimavugut
Ukiut kingulliit ingerlaneranni aningaasatigut ingerlanerliortoqarsimasoq, tamannalu sukkasuumik iliuuseqarfigineqarsimanngitsoq Brugsenip siulersuisuini siulittaasoq Avijâja Rosing-Olsen oqarpoq:
- Maannakkulli tamakkersorluni muminganut saatsinniarlugu ukkatarineqarpoq. KNB-ip qullersai aamma sulisui 2024-imi ukiup affaa kingulleq tamaviaarlutik ERP-systemimut ilanngulluarnissamut inaarsaallutik ilungersorsimapput, pingaartumik nioqqutissanik pisiortornermut aammalu nioqqutissanik uninngasuuteqarnermut tunngasunut suleriaatsit iluarsaanneri ingerlanneqarsimallutik
- Suli angusassarput tikissimanngilarput, kisianni 2024-ip aallartinneranut sanilliullugu pitsaanerungaartumiilersimavugut, naatsorsuutigaarpullu 2025-ip ingerlanerani ingerlatseriaaserput, systemigut aamma isertitagut nalimmassalerumaartut, niuernikkut pisiortornikkullu atugassarititaasut allanngorartuartut siuarsimaffigeqqinnerulernerisigut, siulersuisuni siulittaasoq Avijâja Rosing-Olsen oqarpoq.
Brugsenip kingusinnerpaamik 2026-mi naatsorsuutit pitsaasunik inerneqarumaartut naatsorsuutigaa.
Qullersat nutaat inissittut
Brugsenip ukiorpassuarni pisortaasimasoq Susanne Christensen siorna aasakkut inuulluaqquaa, maannalu maajip aallaqqaataani pisortaanertut nutaamik atorfinitsitsisoqarpoq.
Allan Kristoffersen, kingullermik Coop Danmarkimi pisortaasimasoq, toqqarneqarsimavoq.
Allan Kristoffersen ilaquttanilu apriilip qaammataani Nuummut nuussapput.
Malene Broberg maajip aallaqqaataani aningaasaqarnermut pisortanngussaaq. Maannakkut Sisimiuni najugaqarpoq Qeqqata Kommuniani Aningaasaqarnermut Ilinniartitaanermullu pisortatut atorfeqarluni.
Mark Kobberrød tuniniaanermut ingerlatsinermullu pisortatut februaarip aallaqqaataani 2025-mi siulersuisuni atorfinitsinneqarluni isumaqatigiissuteqarpoq.
- Aamma uanga nuannaarutigivara maajip aallaqqaataaniit 2025-imi nutaamik qullersaqarfimmik nukittuumik aallartitsinissarput nalunaarutigissallugu. Iluatsissimavarput aqutsisut misilittagaqarluartut pikkorissullu pissarsiarinissai, taakkulu piginnaasai tassaapput KNB’ip siunissami ineriartortinnissaanut pisariaqartitavut, siulersuisuni siulittaasoq Avijâja Rosing-Olsen qullersat nutaat pillugit oqarpoq.
