Canada aamma Mexico akissuteqarput USA-mit nioqqutissanik akitsuusiillutik

USA-p nunat sanilii marluk niueqatigiinnerpaasarisaalu, Canada aamma Mexico, unnuaq Donald Trumpip nunanit taakkunannga nioqqutissat 25 procentimik qaffannissaannik aalajangernera pillugu nangaarianngivillutik akissuteqarput.

Trumpip ulluni arlalinni taamak aalalangernissani ilimasaarutigivaa, arfininngornerullu unnukkuani kingusissukkut danskit nalunaaqutaat malillugu, aalajangerneq atuutsinneqalerpoq præsidentip nalunaarutini atsiormagu.

Nalunaaquttap akunneri sisamat qaangiummata USA-p avannamut sanilia, Canada, akissuteqarpoq.

- Illorsuup Qaqortup unnuk manna iliuuserisai avissaartuutsitsivoq ataatsimoortitsinani, Canadap ministeriunera, Justin Trudeau oqarpoq, danskit nalunaaqutaat naapertorlugu sapaammi ullaassakkut pingasut qaangilaaraa BBC naapertorlugu tusagassiortunik katersortitsinermi.

Taanna nangippoq:

- Unnuk manna nalunaarutigisinnaavara, Canada USA-p niuernermut iliuusaanut akissuteqartoq amerikamiut nioqqutissaanut 25 procentimik akitsuusiinikkut, 155 milliardit dollarsinik nalilimmik.

Akitsuutit canadamiut dollarsiinik 30 milliardinik nalillit marlunngorpat atuutilersinneqassapput. Tamatuma kingorna akiuutit canadamiut dollarsinik 125 milliardinik nalillit akitsuuserneqassapput sapaatit akunneri pingasut qaangiuppata, nutaarsiassaqartitsivik AFP naapertorlugu Trudeau nassuiaavoq.

USA-p canadamiunut akitsuutitigut qaffaanissaa marlunngorpat atuutsinneqalissaaq. Tamanna erserpoq præsidentip nalunaarutaani, Trumpip arfininngornermi atsiugaani.

Canadamiut tusagassiorfiat CBC naliliivoq Trumpip taamak aalajangernera tassaaspq, præsidentip "niuernerup iluani sorsunnermik aallartitsinera".

Trumpip 25 procentimik akitsuusiinera Canadamut Mexicomullu atuuppoq. Tamatuma saniatigut Kinamiit nioqqutinut 10 procentimik akitsuusiivoq.

Avammut tunisassiat, Canadamiit nukissiuutinut tunngasut - assersuutigalugu uulia - kisimik 25 procentimik akitsuuserneqanngillat. Tassani 10 procentimik akitsuusiineq aalajangiunneqarpoq.

Tamatuma saniatigut Mexico aamma sukkasuumik akissuteqarpoq.

Mexicop præsidentia danskit nalunaaqutaat malillugu sapaammi unnukkut amerikamiut nioqqutaannut akitsuusiisoqaassasoqnalunaaruteqarpoq. Tamanna pivoq attaveqaqatigiittarfiup X-ip quppernerani allakkatigut.

- Aningaasaqarnermut ministerimut siunnersuuteqarpunga pilersaarut B piviusunngortissagaa, tamannalu akitsuusiinermik allanillu Mexicop soqutigisaanik illersuinermik suliaqartuusoq, præsidenti Claudia Sheinbaum allappoq.

Sheinbaum itisiliinngilaq, qanoq annertutigisumik akitsuusiisoqassanersoq, aammalu qanoq sukkatigisumik iliuutsit atuutilissanersut.

Akitsuut told tassaavoq nunanit allanit nioqqutissianut akitsuummik akiliuteqartitsisarneq.

Tassunga tunngaviuvoq, nioqqutissiat nunamut eqqussuussat akitsorneqarnissaat, taamaalillunilu nunami innuttaasut nioqqutissat eqqussukkat pisiarinikinnerulissagaat paarlattuanillu nunami namminermi nioqqutissiat akikinnerusut pisiariumanerussagaat, taamaalillunilu nunap nammineq aningaasaqarnera nukittorsarneqassasoq.