Containeri katataq pissutigalugu kuuttoqarneranik ernumasoqartoq
Containeri uuliamik imalik Islandimi umiarsualivimmi RAL-ip umiarsuaata qaavanut nakkarmat qatserisartut aggersarneqarput. Umiarsuaq aseruavoq, pilersaarutilli malillugit avalaqqissaaq, Royal Arctic Line ilisimatitsivoq.
Malik Arcticap aseruanera oqartussat piumasaqaataat malillugit kingorna iluarsaanneqarpoq, Malik Arcticalu pilersaarutit malillugit avalaqqissaaq, Royal Arctic Line nalunaarpoq.
Assi: Royal Arctic Line
Royal Arctic Linep umiarsuaani Malik Arcticami ajutoortoqarneranut atatillugu syremik aniasoqarsinnaanera aarlerigineqarmat illoqarfimmi upalungaarsimasut aggersarneqarput.
Ajutoorneq Islandimi illoqarfimmi Akureyrimi juunip 8-ani umiarsualivimmi sulisoqarnerani pisimasoq Islandimi tusagassiorfik mbl.is allappoq.
Malik Arcticap umiarsualivimmi suliaqarfiunerani containeri tankiusoq umiarsuarmut nakkarmat ajutoortoqarsimasoq Royal Arctic Linemit Sermitsiamut ilisimatitsissutigineqarpoq.
- Pisumi inunnik ajoqusertoqanngilaq containerillu imai kuunngillat. Containerili umiarsuullu qaava ajoquserneqarput, Royal Arctic Line allappoq.
Royal Arctic Line naapertorlugu najukkami upalungaarsimasut pissutsit nalilersorneranni ikiuutaasimapput, ilaatigut upalungaarsimasut allat suleqatigalugit containerip aseruasup imai containerimut nutaamut nuunneqarsimapput, taamaalilluni containeri aseruasimasoq umiarsuarmit isumannaatsumik peerneqarsinnaalluni.
- Umiarsuup aseruanera oqartussat piumasaqaataat naapertorlugit iluarsaanneqarpoq, Malik Arcticalu pilersaarutit malillugit avalaqqissaaq, Royal Arctic Line nalunaarpoq.
