D-mi siulittaasoq: Naalakkersuisut anguniagaqanngillat
Demokraatit siulittaasuata Jens-Frederik Nielsenip misigaa qinersisoqarnissaa qallilluni kingusinnerpaamik apriilimi pisussaariarmat Naalakkersuisut nutaamik suliniuteqaratik nunap ingerlannissaa kisiat sammigaat.
Demokraatit ukiakkut ataatsimiinnissamut siunnersuutinik 20-nik saqqummiussiumaartut Jens-Frederik Nielsenip oqaatigaa.
Assiliisoq: Leiff Josefsen
2025-mut aningaasanut inatsisissatut siunnersuut anguniagaqarpallaanngilaq, Inatsisartunullu qinersinissap qallineranik ersarissumik takutitsivoq, Demokraatit siulittaasuat Jens-Frederik Nielsen oqarpoq.
- Aningaasanut inatsimmut atatillugu ukiuni sisamani 5 millionit koruuniinnaat isumaqatiginninniutigineqassasut paasitinneqarpugut. Tamannalu tupannarpoq, Jens-Frederik Nielsen oqarpoq, taassumalu misigaa illuatungiliuttut aningaasanut inatsimmut inaarutaasumut sunniuteqarluarsinnaannginnissaat kiisalu sunniuteqarluarnerit qineqqusaarnermi atorluarneqarsinnaagaluartut Naalakkersuisut taamaalillutik pinnginnissaat qulakkeerniaraat.
Aningaasat ikittut
Partiip siulittaasuata aningaasanut inatsisissatut siunnersuutigineqartumit anguniagaqarnerusoqarnissaa amigaatigaa.
- Aningaasanik ikittunik ilinniartitaanermut, utoqqarnut, peqqinnissamut nunanullu allanut immikkoortitsisoqarpoq. Taava akileraarutinik aaqqissuusseqqinnermut millioninik pingasunik kisitsisitalinnik immikkoortitsisoqarpoq, tamakkiisumillu aningaasalersorneqarsimasutut taaneqarluni. Tamanna qinersisartunik salloqittaaneruvoq, akileraarutinimmi aaqqissuusseqqinnermut atatillugu sinneqartoorutinit naatsorsuutigineqartunit millioninik pingasunik kisitsisitalinnik tigusisoqarnissaa aalajangerneqarmat. Aningaasatigut pissutsit allanngorpata isertitallu ikilippata aningaasat taakku kingusinnerusukkut matussusertariaqassavavut. Sooq aaqqissuusseqqinneq tamakkiisumik aningaasalersorneqagaasimanersoq paasiuminaatsippara, Jens-Frederik Nielsen oqarpoq.
Ukioq manna qinersisoqassanngitsoq naliliivoq, naalakkersuisoqatigiilli taakku marluk piaaralutik marsimut utaqqiniarnerarpai, innuttaasummi akunnattumik isertitallit akileraarutitigut aaqqissuusseqqinnerup sunniutai misiginiassammatigit, inummummi sulinermullu ilanngaatit qaffanneqarnerat pissutigalugu innuttaasut sulisartut aningaasanik amerlanerusunik pissarsissapput.
Siunnersuutit 20-t
- Qinersinissaq qalliartuleraluaqisoq ukiaanerani ataatsimiinnermi suliniutit 20-t saqqummiutissavavut, partiimi siulittaasoq oqarpoq.
-Aalajangigassanngortitat suliarineqanngitsoornissaat ilimanaateqarpoq, qinersisoqarpammi siunnersuutit suliarineqanngitsut atorunnaarsinneqarsinnaammata. Aalajangerpugulli siunnersuuteqarniarluta, sammisat assigiinngitsut pillugit politikkikkut oqallinneq aallartinniassagatsigu, Jens-Frederik Nielsen nassuiaavoq.
Siunnersuutit Demokraatit Inatsisartuni oqaluuserissasaat tassaapput akileraarutip 1 procentimik appartinnissaa, kiisalu ingerlatsiviit isertitaminnit akileraarutaasa appartinnissaat.
- Aamma sulinerup sivikinnerulersinnissaa inuiaqatigiinnut qanoq iluaqutaatigissaneranut sanilliullugu qanoq akeqassanersoq nalilerusupparput, iluaqutimmi aamma naleqartuupput, Jens-Frederik Nielsen oqarpoq.
Immikkoortortaqarfinnik ukkassineq
Partiit illuatungiliuttut aappaat Naleraq aasap ingerlanerani paragraf 37 naapertorlugu apeqquterpassuarnik tusagassiuutinullu nalunaaruterpassuarnik nassiussivoq.
Demokraatit piffissami kingullermi nalunaaruteqarpiarsimanngitsut Jens-Frederik Nielsenip nassuerutigaa.
- Immikkoortortaqarfinnik sullissinerput pingaarnerutinnikuuarput. Nunamimi innuttaasut peqataarusuttut politikkikkullu sulinitsinnut soqutiginnilersut amerliartuinnarnerat malugigatsigu soqutiginartuuvoq, Jens-Frederik Nielsen oqarpoq, nunamilu maani isumasiuisoqartannginnera taassuma uggoraa.
- Isumasiuineq partiinut naalakkersuisoqatigiinnut artornartuussasoq qularutiginngilara, maannami unammilligassatsinnik aaqqiinissamut naammattumik anguniagaqanngimmata, partiip siulittaasua isumalluartoq oqarpoq, Inatsisartunullu qinersinissaq qaquguugaluarpalluunniit taassuma isumakuluuteqarani qilanaaraa.
