Danmarkimi ilinniartut atugarissaarnerujumallutik aaqqiissutissarsiussapput
Ilinniartut atugarissaarnerunissaannut, immikkoortitaannginnerunissaannut peqataatinneqarnerunissaannullu aaqqiissutissat eqqartorniarlugit, Kalaallit Danmarkimi ilinniartut aqagu marlunngornermi Marienborgimi katersuutissapput.
Kalaalliulluni Danmarkimi ilinniartuulluni kiserliornarsinnaavoq. Ilinniartut suleqatigalugit aaqqiissutissarsiortoqassaaq, taakkulu marlunngorpat Marienborgimut qaaqquneqarput.
POLFOTO
Kalaallit Danmarkimi ilinniartut ilinniarnerminni atugarliuuteqartorujussuusut, nalunaarusiat arlaqartut takutippaat.
Taamaattumik aqagu marlunngornermi Marienborgimi kalaallit ilinniartut katersuutissapput, ajornartorsiutinullu namminneq aaqqiissutissarsiussallutik.
Isummanik pigiliutiinnakkanik, immikkoortitaanermik avataaniitinneqarnermillu atugarliuuteqarnerit pissuteqarput. Inuit pisinnaatitaaffii pillugit instituttimit nalunaarusiami allassimasut naapertorlugit, kalaallit ilinniartut 76%-ii isummanik pigiliutiinnakkanik misigisaqartinneqartarsimapput.
- Kalaallit Danmarkimi ilinniartut taama amerlatigisut ilinniarnerminni atugarliuuteqarnerat ernumanarpoq. Kinguaariit tulliuttut ilinniagaqartinneqarnissaat inuiaqatigiittut suliassatta pingaarnerit ilagaat. Tamarluinnaasa pisariaqartippavut. Kalaallit ilinniartut katersorneqarnissaat taamaammat sulissutigaara, ilinniartut aalajangiisartunut toqqaannartumik ajornartorsiutiminnik oqaasinnguisinnaalersillugit, Folketingimut ilaasortaq Aaja Chemnitz oqarpoq.
Ilinniartut katersuutsinniarlugit aaqqissuussaq Folketingimi Siumut suleqatigalugu Folketingimi IA-p aallartippaa.
Atugarissaarneq Kalaallit Nunaannullu atassuteqarneq
Ilinniarnermi atugarissaarnerinnaq oqaluuserineqassanngilaq, aammali Kalaallit Nunaannut atassuteqarneq eqqartorneqassaaq, kalaallimmi ilinniartut affaasa missaat ilinniakkaminnik naammassinninnermik kingorna Danmarkimi najugaqarniarlutik aalajangertartut, misissuinerit arlallit takutimmassuk.
- Nunatsinni sulisussat piginnaasallit amigaataasorujussuupput kalaallillu suli amerlanerusut nunatsinni inuiaqatigiinnik kivitseqataanissaat pisariaqartinneqarluni. Angerlaqqinniarluni aalajangernissamut Kalaallit Nunaannut atassuteqarnerup pingaartuunera ilisimavarput, Aaja Chemnitz oqarpoq.
Aaqqissuussinermi ilaatigut ministeriuneq, Ilinniartitaanermut ilisimatusarnermullu ministeri kiisalu Meeqqanut, Inuusuttunut, Ilinniartitaanermut, Kulturimut, Timersornermut Ilageeqarnermullu Naalakkersuisoq peqataassapput. Aaqqissuussinernut Sermitsiaq malinnaassaaq.
