KL

DK

Danmarkimi kalaallinut immikkoortitsisarnermut akiuiniarnermi suliniutit nutaat

Danmarkimi kalaallit ammip qalipaataa tunngavigalugu immikkoortinneqartarnerat assigiinngisitsinerlu ajornartorsiutaapput ilungersunartut, danskit naalakkersuisui oqarput, taakkulu suliniutinut aqqaneq-marlunnut 35 millionit koruuninik immikkoortitsipput.

- - Kalaallit Danmarkimi isummiutertiikkanik nalaataqartaratik inuusinnaanissaat qallunaat naalakkersuisuisa pingaartippaat, ajoraluartumilli ullumikkut taamaattoqanngilaq. Ajornartorsiutip annertuup akiornissaanut tunngavissaqarnerput taamaattumik nuannaarutigaara, ministeri Kaare Dybvad Bek oqarpoq.
Thomas Munk Veirum
Tusagassiortoq
Saqqummersinneqarpoq

Kalaallisut pas-eqarnissaq aamma immikkoortitaanermik misigisaqaraanni kalaallisut ikiorserneqarsinnaaneq suliniutit aqqaneq-marluusut danskit naalakkersuisuisa ataasinngornermi saqqummiussaasa ilagaat.

Suliniutit taakku Danmarkimi kalaallinut ammip qalipaataa tunngavigalugu nikaginninnermik immikkoortitsisarnikkullu akiuiniarnermut ilaapput, taakkualu piviusunngortinnissaannut 35 millionit koruunit immikkoortinneqarput.

Aningaasat siunertamut tamatumunnga siusinnerusukkut immikkoortinneqarsimasut saniatigut ukiuni sisamani 2028-p tungaanut agguaanneqassasut Nunanut Allanut Ilanngutitsinermullu Ministereqarfik tusagassiuutinut nalunaarummi ilisimatitsivoq.

Suliniutit ammip qalipaataa tunngavigalugu nikaginnittarnerup akiorniarlugu iliuusissatut pilersaarummut, maannamut ukiut pingasungajaat suliarineqareersumut, ilaapput.

Danmarkimi ammip qalipaataa tunngavigalugu nikaginnittarnerup killilerneqartarnissaa pisussaafiusoq ministeri Kaare Dybvad ataasinngornermi oqarpoq, naalakkersuisullu inuiaqatigiinni ataqatigiinnerup illersornissaa immikkut pisussaaffigigaa.

- Inernera tulluusimaarutigigai

- Kalaallit Danmarkimi isummiutertiikkanik nalaataqartaratik inuusinnaanissaat qallunaat naalakkersuisuisa pingaartippaat, ajoraluartumilli ullumikkut taamaattoqanngilaq. Ajornartorsiutip annertuup akiornissaanut tunngavissaqarnerput taamaattumik nuannaarutigaara, oqarpoq.

Folketingimi ilaasortat marluk suliniutit nutaat naammagisimaarpaat:

- Ammip qalipaataa tunngavigalugu nikaginnittarnermut akiuiniarluni iliuusissatut pilersaarut iluaqutaavoq pingaarutilik. Uagutsinnut kalaallinuinnaanngitsoq aammali inuiaqatigiinnut allanut. Inernera maanna tigummisarput tulluusimaarutigaara, Aaja Chemnitz (IA) oqarpoq.

Aki-Matilda Høegh-Damip (S) inuppassuit aaqqissuussinikkut artorsarnerat erseqqissarpaa:

- Pitsanngorsaanissaq aalajangiusimasariaqarparput naapertuilluanngitsuliornerlu akueriunnaarlugu. Aaqqissuussaanermut nanertuutaanngilagut – amerlasuulli aaqqissuussaanermit nanertugaapput. Allannguineq sivisusinnaavoq, kisianni allornikkaarlugit allanngortissavarput. Immitsinnut pisinnaatitaaffeqarnerpullu upperisariaqarparput. Tamanna pisussaaffigiuaannarsimavarput, oqarpoq.

Suliniutit aqqaneq-marluk tamaasa uani takukkit.

inuiaqatigiit handlingsplan grønland diskrimination samfund kaare dybvad racisme

ATORFIIT Se alle jobs

Powered by Labrador CMS