Danmarkimi partiit Nunatsinni partiinut suleqatiminnut aningaasatigut tapersersuinianngitsut

Inatsisartut partiinut politikerinullu nunanit allanit aningaasatigut tapiissuteqarfigineqarsinnaanerannik inerteqquteqarnissamut inatsit marlunngormat akuersissutigimmassuk, Nunatsinni partiit Folketingimi partiinit suleqatigisaminnit “tapiissutinik” suli tapiiffigineqarsinnaassasut, inatsimmi erseqqissarneqarpoq.

Danmarkimili partiinit katillugit sisamaasunit Nunatsinni partiinik ullutsinni suleqateqartunit arlaannaannilluunniit aningaasatigut tapiisoqarneq ajorpoq. Qineqqusaarnermullu maanna aallartinneqaqqammersumut atatillugu tapiissuteqarnissaminnik pilersaaruteqanngillat.

Socialdemokratit, Venstret, SF aamma Liberal Alliance tamarmik kalaallit partiivinik suleqateqartut taama ilisimatitsissuteqarput.

Ritzauip saaffiginnissutaanut akissuteqartunit Siumumit Atassummillu aamma tamanna uppernarsarneqarpoq.

Venstrelli ilisimatitsissutigaat, partii suleqatigisartik Atassut, aningaasatigut siornatigut tapersersortarsimagitsik.

- Venstre aamma Atassut partiitut suleqatigiittut qanittumik oqaloqatigiittarput, ilaatigut nalinginnaasumik siunnersuinermik, siunersiueqatigiinnerit aamma misilittakkanik paarlaasseqatigiinnerit ingerlanneqartarlutik. Ukiut qulit sinneqartut matuma siornagut Venstre Atassummut aningaasatigut amerlanngitsunik tapiissuteqartarpoq, massakkulli pisunut atatillugu aningaasatigut tapiissuteqaqqittalernissaq pilersaarutaanngitsoq, Venstre allakkatigut akissuteqarluni ilisimatitsivoq.

Socialdemokratinit aamma SF-imit ilisimatitsissutigineqarpoq, kalaallit partiivinut suleqatigisaminnut Siumumut aamma Inuit Ataqatigiinnut siunersiueqatigiinnerit ingerlanneqartartut. Aningaasatigulli tapiissuteqarneq ajorlutik.

Liberal Alliancep aamma partii suleqatigisani Demokraatit aningaasatigut tapiissuteqarfigisimanngikkaa, partiip tusagassiinermut immikkoortortaata ilisimatitsissuteqarpoq. Partiit taakku marluk ukioq manna januaarimi suleqatigiilerput.