Danmarkip Kalaallit Nunaatalu imarsiornermi nunap assinginik isumaqatigiissutaat 2041-mut sivitsorpaat
Nunatsinni naalakkersuisup isumaqatigiissutip sivitsorneqarnera nunat marluk suleqatigiinneruneranut ersiutitut oqaatigaa.
Uppernarsaatigalugit titartakkat pingaaruteqarput umiarsuit isumannaatsumik Kalaallit Nunaanni imartani ingerlasinnaaniassammata. (Toqqorsivimmi assiliartaq).
Assiliisoq: Hans Meineche/Ritzau Scanpix
Danmarkip Kalaallit Nunaatalu isumaqatigiissut 2041-p tungaanut immap assingi suliarineqartarnissaat nutarterneqartarnissaallu qulakkeerinnittoq sisamanngornermi atsiorpaat.
Klima-, Energi- og Forsyningsministeriet tusagassiorfinnut taama nalunaaruteqarpoq.
- Imaatigut angallannermi isumannaatsuunissamut immap assingi pingaaruteqarluinnarput, aammali pisariaqarluinnarput nunatsinni attaveqaatit allilerneqarpata imaluunniit inuussutissarsiornermi nutaanik aningaasaliisoqassappat, klima-, energi- og forsyningsminister Lars Aagaard (M) oqarpoq.
Kalaallit Nunaata imartaani immap assingi qallunaat oqartussaasuisa suliarisarpaat, suliassarlu Geodatastyrelsenimut suliassiissutigineqarpoq.
Isumaqatigiissut maanna atuuttoq 2027-mi atorunnaassaaq.
Ineqarnermut attaveqarnermullu naalakkersuisoq Hans Peter Poulsen oqarpoq isumaqatigiissutip sivitsorneqarnera nunat taakku marluk suleqatigiinneruneranut takussutissaasoq.
- Nuannaarutigaara pitsaasumik isumaqatigiissuteqaratta, isumaqatigiissummi immap assingi pillugit naligiissitaaneq anguniarneqarmat, tamannali peqatigalugu Kalaallit Nunaanni ineriartornerup nukinginnassusianut naleqqussarsinnaaneq inissaqartinneqarluni.
- Naalakkersuisut qallunaallu naalakkersuisuisa tamatumani suleqatigiinnerunissaat qilanaaraara, Hans Peter Poulsen nalunaarummi oqarpoq.
Isumaqatigiissut ilaatigut imaatigut assilialiornermut tunngavoq, ilaatigut umiarsuarnik inuussutissarsiuteqartunit aamma sunngiffimmi angallatinik angalasunit atorneqarsinnaasunik suliaqartoqassalluni.
Danmark Kalaallit Nunaallu 2009-miilli suleqatigiipput Kalaallit Nunaanni immap assingi digitalinngortinneqarnissaat siuarsarniarlugu.
Nunap assinginik aqutsisoqarfik ilaatigut Kalaallit Nunaata kujataata kitaata imartaata assinganik assigiinngitsunik pilersitsisimavoq, digitaliseerisimalluni saqqummersitseqqillunilu, nalunaarummi allassimavoq.
