KOMMUNE KUJALLEQ
Demokraatit piumasaraat borgmesteri tunuassasoq
Demokraatit Kommune Kujalleq-mi borgmesterimut tatiginnikkunnaarput. Taakku piumasaraat Stine Egede (IA) borgmesteritut tunuassaspq, IA-lu nutaamik borgmesterissatut sassartitsissasoq, IA-p aamma D-p kommunalbestyrelsemi suleqatigiinnerat ingerlaannassappat.
Demokraatit piumasaqarput borgmesteri tunuassasoq. Suleqatigiinnerulli ingerlaannarnissaanik periarfissiipput, kisianni piumasaqaataavoq IA nutaamik borgmesteritut sassartitsissasoq.
Assi: Kommune Kujalliup Youtube-kanaliaaneersoq
Kommune Kujalleq-mi kommunalbestyrelsemi ataatsimiinneq pissanganarluinnartumik ingerlanneqarpoq.
Demokraatit siusinnerusukkut kinguneqartitsinissamik piumasaqareernikuupput, kommunip aningaasaqarnerani ajornartorsiuteqarnera pissutigalugu.
Taamaattorli partii naammaginartumik nassuiaammik utaqqisimavoq, tassani naammaginartumik nassuiarneqartussani pingaarnerpaaq tassaalluni aningaasaqarnikkut ingerlatsinermi sooq kommune taarsigassarsianik 100 millioner koruuninik ilasisariaqalerluni inissisimanersoq.
Demokraatit isumaqarput, kommunip aningaasaqarneranut tunngatillugu nalunaarusiaq naammaginartuunngitsoq, borgmesterillu tunuarnissaanik piumasaqarlutik.
Partii kommunit aqutsineqarnerat pillugu inatsisimut innersuussivoq, tassanilu isumaqarlutik, borgmesterip akisussaaffini naammassisimanngikkaa.
Siumut Demokraatit piumasaqaataannut tapersiivoq.
Borgmester Stine Egede (IA) ajuusaarpoq, Demokraatit tatiginnikkunnaarnerat pillugu. Kisianni tunuarusunngilaq, ataatsimiinnerup unikkallarnera sioqqullugu taamak nalunaaruteqarpoq. Ataatsimiinneq nanginneqassaaq nalunaaqutaq 13:30.
