Atuarfik Inussuk ’ukiumi atuarfiliatsialattut’ innersuunneqartoq

Atuarfik Inussuk Nuummiittoq 2026-mi Atuarfiliatsialattut, suliffeqarfimmit Nohrconimit, suliariumannittussarsiuussinermut inatsisinik aamma sanaartugassanik suliarinnittussarsiuussinermut inatsisinik pikkorissaasarnermi siunissamilu sanaartorneq pillugu ataatsimeersuartitsisarnermi immikkut ilisimasalimmit, toqqarneqartartumit, innersuunneqartunut ilaavoq.

Taakku 2013-imiilli ukiut tamaasa naalgaaffimmi atuarfiit pitsaanerpaartaat isumatusaarnersaallu toqqartarpaat, ukioq mannalu Atuarfik Inussuk innersuunneqartunut ilaavoq.

Siunissami ilinniarfissat

Nohrcon naapertorlugu ukiumoortumik nersornaasiinermi atuarfinnik suliniutit siunissami ilinniarfiusinnaasut ineriartortinnissaannut peqataasut maluginiarneqarnissaat siunertaavoq. Nersornaasiineq nutaamik sanaartornermut iluarsaassinermullu tunngassuteqarpoq, taamaalillunilu atuarfeqarnermut ilinniartitaanermullu tunngasut tamarmik immikkut ilusilersorluarsimanermikkut, ilinniarnissamut pitsaasunik sinaakkuteqarnermikkut ilinniagaqarfiillu allat isumassarsisillugit iluaqutaasumik iliuuseqartarnerannik ersersitsisut nersornaaserneqartarput.

Ajugaasup toqqarnissaa siunertaaginnanngilaq, aammali maligassiuilluartut saqqummiunneqarnissaat, sammisat akimorlugit ilisimasanik avitseqatigiinneq siunertaavoq, Nohrcon allappoq.

Atuarfimmi atuarfik

Atuarfik Inussuk pillugu ilorlikkut aqqusineqarluni illut arfinillit ataqatigiissumik atassuteqartut, illullu arfineq-aappaani meeqqerivik sanaartornermut aamma ilaasoq allassimavoq.

- Atuarfik Inussuk assigiinngitsorpassuartigut immikkut ittuuvoq. Angivoq, kisianni illunut mikinerusunut avinneqarsimavoq, taamaalilluni meeqqat namminneq toqqissisimanartumik inissisimaffeqalerlutillu ataatsimoornermut annertuumut ilaapput. Illuliorneq Nuummi pissutsinit immikkuullarissuniit ilusilersorneqarpoq, soorlu silap pissusia, qaamaneq nunalu, aammattaaq kalaallit pinngortitaat piorsarsimassusaallu atuarfiup isikkuanut ilannguppagut. Ataatsimoortillugu, qaamaneqarluartillugu initutillugu, immikkuullarissuseqartillugulu atuarfinngortinneqarsimanera pingaartumik nuannaarutigaara. Atuarfiuvoq uanga nammineq atuarfigerusussinnaasara, KHR Architecturemi pisortaq suleqataasoq Janina Zerbe oqarpoq, taannalu sanaartornermik akisussaasuuvoq.

Nuannersumik utertitsivigineqarneq

KHR Architecture sanaartornermi kinguaattoornerit akerleriissutigineqaraluartut ullumikkut atuisunit nuannersumik utertitsisoqartartoq Sermitsiamut allappoq.

- Atuarfik Inussuup Ukiumi Atuarfiliatsialattut innersuunneqarnera soorunami nuannaarutigeqaara. Suliniut annertusimallunilu amerlasuunik peqataaffigineqarsimasoq ukiuni arlalinni suliarineqarsimavoq. Atuarfilli maanna atorneqalersoq, taamatuttaarlu meeqqat sulisullu atuarfimmik illoqarfimmi uummaarissumik pilersitsinerat pingaarnerpaavoq. Piorsarsimassutsimut timersornermullu atortorissaarutit atuarfiup avataatigut aamma atorneqartarmata, taamaalillunilu atuarfik katersortarfinngortimmassuk immikkut ittumik nuannaarutigaara.

Atuarfik Inussuk ajugaassappat Kalaallit Nunaanni atuarfik siullerpaamik nersornaaserneqassaaq.

– Atuarfiup titartaanerani Kalaallit Nunaata pinngortitaa, silap pissusia piorsarsimassuserlu immikkut ittut eqqarsaatigineqarsimapput, nersornaaserneqarnerlu atuarfimmik Nuummillu kusanartumik nersuinerussaaq, illussanik titartaasartut oqarput.

Atuarfik Inussuup atuarfinnilluunniit sanaartorfiit allat ilaat taasissutigiumagaanni, linki allassimasoq aqqutigalugu taamaaliortoqarsinnaavoq. 1. novembari tikillugu taasisoqarsinnaavoq:  https://nohrcon.dk/vidensbank/kaaring-af-aarets-skolebyggeri/