ILINNIARNEQ
Ph.d.-nngortut ukiumoortumik nalliuttorsiornermi nersorniarneqartut
Ilisimatusarfimmi tallimanngornermi septembarip 25-anni ileqquusumik ukiumoortumik oqalugiarnernik, erinarsoqatigiinnermik, ph.d.-tut uppernarsaatinik tunniussinermik aammalu ukioq manna sulisut pitsaanerpaamik suliaqarsimasut akissarsitinneqarnerannik imaqartumik nalliuttorsiortoqarpoq.
Ph.d.-nngortut arfineq-marluusut ilaat sisamat Ilisimatusarfiup ukiumoortumik nalliuttorsiornerani nersorniarneqarput. Saamerlermiit: Manumina Lund Jensen, Ivalu Mathiassen, Louise Pindstrup-Scavenius aamma Anne Lise Kappel.
Assi: Emil Stach
Suliffimmi avatangiisit pillugit ilisimatusarneq, atuarfinni ilinniarneq pillugu misigisat, qimussertarneq, Covid-19-ip tuniluunnera angerlarsimaffeqanngitsuunerlu Ilisimatusarfiup tallimanngormat septembarip 25-ani ukiumoortumik nalliuttorsiornerani sammineqartut ilagaat.
Ullormi tamatumani maluginiarnartut ilagaat, inuiaqatigiinnut, kulturimut, peqqissutsimut ilinniartitaanermullu tunngasunik pingaarutilinnik nutaanik ilisimasaqalersitsisunik ilisimatusarsimasunut ph.d.-nngorniartunut arfineq-marluusunut allagartartaartitsineq.
– Ph.d.-liarineqartut taakku arfineq-marluk Ilisimatusarfimmi Kalaallit Nunaannilu ilisimatusarnerup siammasimassusianik pingaaruteqarneranillu ersersitsipput.
Rektori Mari Kleist
Ph.d.-nngorniat arfineq-marluk nersorneqartut
Manumina Lund Jensen ph.d-nngorpoq qulequtaralugu "Siuaasat illerngi tammarsimasut: Ilisimasat, periaaseq atassuteqarnerlu aamma Inuit/Inughuit/Kalaallit qimmeq pillugu ullumikkut isiginnittaasiat".
Mille Bianco Schiermacherip allaaseraa "Naalagaaffeqatigiinni ajornartorsiut takussaanngitsoq: Aaqqissuussaanikkut akornutaasut Danmarkimi kalaallit angerlarsimaffeqannginnerannik annertusisitsisut".
Mette Malene Motzfeldt Jensen allaaserisami "Cold Metabolism and Brown Adipose Tissue Activation in Inuit and Danes"-imi (Danskit Inuillu timaasa inuussutissanik suliarinninneranut Issittoq qanoq sunniuteqartarnersoq, aaqq.) ph.d.-nngorpoq, Louise Pindstrup-Scaveniusilu atuartut atuarfimmi misigisartagaat pillugit allaaserinnippoq: "Ilinniarfigisatsinnik suliaqarnissara nuannaraara: Kalaallit atuartut atuarfimmi misigisartagaannik, perorsaanikkut ilinniartitsinikkullu misissuineq".
Atuartitsineq, Covid aamma suliffimmi avatangiisit
Ivalu I. Mathiassenip misissoqqissaarsimavaa "Meeqqat atuarfiini nukarlerni atuartut oqaaseqatigiinnik sananeqaataanillu paasinnittarneri: Atuarnermik ilinniartitsineq kalaallisut ilinniartitsissutigineqartoq".
Mie Vilstrup Møller ph.d.-nngorpoq qulequtaralugu: "Covid-19-ip Kalaallit Nunaanni tuniluunnera", naggataatigullu aamma Anne Lise Kappel ph.d.-nngorpoq "Kalaallit Nunaanni suliffimmi avatangiisit" qulequtaralugu.
– Ph.d.-liarineqartut taakku arfineq-marluk Ilisimatusarfimmi Kalaallit Nunaannilu ilisimatusarnerup siammasimassusianik pingaaruteqarneranillu ersersitsipput – ilisimatusarnerlu inuiaqatigiinnut pingaarutilinnik nutaanik ilisimasaqalersitsisarpoq, rektori Mari Kleist Ilisimatusarfimmit nalunaarummi oqarpoq.
Ilinniartitaanermut naalakkersuisoq, Nivi Olsen, Ilisimatusarfimmi ukioq manna nalliuttorsiornermi oqalugiarpoq.
Assi: Emil Stach
Ukioq manna sulisut akornanni nersornaat
Ukiumoortumik nalliuttorsiornermi Sofie Abelsen aamma Aviâja Lyberth Hauptmann SILA-mi immikkoortortaqarfimmeersut kiisalu Gerth Lynge Ilinniartunik sullissivimmeersoq ukiup sulisuattut nersornaaserneqarput.
- Sulisut akornanni nersornaat sulisunut malunnaatilimmik allanngueqataasimasunut nersornaasiinissamik periarfissiivoq. Sofie, Aviâja aamma Gerth tunniusimallutik Ilisimatusarfimmut aammalu ataatsimoorluta sulinitsinnut pingaarutilimmik tapersiisimapput, rektori Mari Kleist oqarpoq.
Ukioq manna nalliuttorsiornermi Ilisimatusarfimmi sulisut ilaatigut Sofie Abelsen (assimiittoq), Aviâja Lyberth Hauptmann aamma Gerth Lynge nersornaaserneqarput.
Assi: Emil Stach
Ukiumoortumik nalliuttorsiorneq ilassinninnermik naggaserneqarpoq, ulloq taanna ilinniagaqarnikkut angusat immikkut ittumillu suliniutit ataatsimoornikkut nalliuttorsiutigineqarlutik.
