Aqqalu C. Jerimiassen siulittaasutut ingerlaqqippoq

Arfininngorneq oktobarip 31-ianni Atassut ileqquusumik ataatsimeersuarpoq Nuummi.

Ataatsimeeersuarnermi ullormut oqaluuserisassanut ilaavoq siulittaasumik qinersineq. Tamannali annertunerusumik assortuussutigineqanngitsoq, siulittaasoq Aqqalu C. Jerimiassen oqaluttuarpoq, taannami taasinertaqanngitsumik siulittaasunngoqqippoq.

Siulittaasoq ilisimatitsivoq, partiip politikkikkut anguniagai pillugit ullumikkut oqaluuserinnittoqassasoq.

- Aalajangernikuuvugut, oqaluuserisassarpassuit ullumikkumut isumasioqatigiinnissatsinnut nuunnikuuagut, tassani oqaluuserissavagut ukiuni tulliuttuni pingasuni politikkikkut anguniagassagut, taanna Sermitsiamut oqarpoq.

Arfininngornermi kattuffitsik oqaluuserivaat, ilaatigut partiip inuusuttortaanik suleqateqarneq qanoq pitsanngorsarneqarsinnaanersoq oqaluuserineqarluni.

- Ullumikkut oqaluunerissavagut Atassutip illoqarfinni nunaqarfinnilu ilaasortaasa siunnersuutaat.

Naalakkersuisooqatigiinni ingerlaannassapput

AAMMA ATUAKKAT

Atassutip naalakkersuisooqatigiinnermi sulinini ingerlaannassanersoq nalilersorniarpaa

Junip qaammataani Aqqalu C. Jerimiassen oqarnikuuvoq, partiip naalakkersuisooqatigiinni suleqataanera ingerlaannassanersoq nalilersoqqinneqartariaqartoq.

Tamanna aallaaveqarpoq Atassut-ip siunnersuutai arlallit upernaakkut Inatsisartut ataatsimiinneranni naalakkersuisooqatigiit partiivinnit itigartitaammata. Taakkunannga siunnersuutit arlallit partiip qineqqusaarutaanneersuupput.

Siusinnerusukkut oqarnikuuvutit, naalakkersuisooqatigiinni inissisimanersi nalilersorneqaqqittariaqartoq partiip ataatsimeersuarnerani. Qanoq aalajangerpisi?

- Maannamut suleqataanerput suli naammagisimaarparput. Maluginiarnarporlu ataatsimeersuaqataasut akornanni suleqataanerput annertunerusumik akerliuffigineqanngitsoq.

- Taamaattumik qilanaaraarput, naalakkersuisooqatigiinni suleqatigiinnerput suli pitsaanerulersinniarlugu ilutsinni suleqatigiinnerput nukittorsassavarput, taamaattorli aamma isumasioqatigiinneq naammassereerutsigu erseqqinnerusumik avammut nalunaaruteqarumaarpugut.