Kaffi kulturiuvoq

– Kaffi immikkuullarissumik piginnaasaqarpoq, taamak isumaqarpoq kulturi pillugu akunnermiliuttartoq Josepha Kuitse Kunak Thomsen.

Taanna ukiuni arlalissuarni Danmarkimi najugaqarpoq. Ukiuni kingulliunerusuni sumi tamaani uaajeerluni isiginnaartitsisarpoq atuarfinni, suliffeqarfinni aaqqissuussanilu annertuuni. Tamatumalu saniatigut aamma ornigulluni sumiiffinni assigiinngitsuni Kalaallit Nunaat pillugu oqaluttuariartortarpoq – maanna taanna sakkussamik nutaamik pissarsivoq akunnermiliuttutut inissisimanermini atorsinnaasaminik.

– Ukioq manna siusinnersukkut The Brew Companymit attavigineqarnikuuvunga – Middelfartimi kaffeerniamit – taannalu juullimut ammartagaliorusuppoq kaffinik imalimmik aamma Kalaallit Nunaat pillugu ukkataqartumik, taamak oqaluttuarpoq Josepha Kuitse Kunak Thomsen.

– Isumassarsiaat pissanganarpasippoq, taamaammat soorunami suliakkiutigisaannut akuersaarpunga. Tassami aamma uanga nunatsinniittutulli kaffimut immikkuullarissumik isiginnittaaseqarama.

– Kaffisoriartoqqusineq kulturitsinni immikkuullarequtitta ilagivaat. Kaffisornissaq pineqaannartanngilaq, katerisimaarnissarli, angerlarsimaffigisamut tikilluaqqusineq, oqaluttuanik avitseqateqarneq, nererusaaajutigaluni aliikkusersoqatigiilluni peqatigiinneq. Sorpassuartigut kaffi inoqatitsinnut attaveqartarnitsinni DNA-tsinniittutut taasinnaavarput.

Kaffi attaveqaataavoq

Josepha ullorsiutinik suliaqarnermi peqataalerami tunngaviusumik piumasaqaataavoq, kaffi Kalaallit Nunaanniinnaanngitsoq, aammali Danmarkimi nunanilu tamalaarpassuarni attaveqaqatigiissitsisartut ilagigaat. Taamaattumillu kaffi akunnermiliuttutut suliassanut atatillugu pitsaalluinnartuuvoq.

– Kaffi immikkuullarissumik piginnaasaqarpoq inunnik ataatsimuulersitsisarami. Taanna aqqutigalugu unikaallaqatigiittoqartarpoq, najortigiissitsisarpoq avitseqatigiissitsillunilu, tassami aamma inuit ilaannut misigisaq nuannernerulertarpoq, assammi kaffi tigummerujuujutigalugu kaffisoqateqarujoorlunilu. 

– Ullorsiummi ullut tamaasa decembarip aallaqqaataaniit 25-iata tungaanut kaffimik nutaamik misilitassaqarpoq, tamatumalu ilutigisaanik QR-kode scannerneqarsinnaavoq Kalaallit Nunaat pillugu nutaanik ilikkagaqarusukkaanni. Sammisat assigiinngitsut arfinillit aqqutigalugit oqaluttuanut assigiinngitsunut assigiinngitsunillu sammivilinnut tikilluaqqusaasoqartassaaq kulturerpullu pillugu itinerusumik paasissutissanik pissarsisoqarsinnaalluni.

– Tassa taamaattoqqossaat kulturikkut akunnermiliuttuuninni pingaartilluinnagara: inuit akornanni oqaluttuat, misigisimasat alapernaassuserlu paarlaasseqatigiittarneq – matumanilu pisarput kaffi mininnagu, Josepha Kuitse Kunak Thomsen nassuiaavoq.

Danskit ilisimasaat annikippallaarput

Kalaallit Nunaat pillugu kaffitalerlugu juullimut ammartagaliornissamik isumassarsisoq tassaavoq The Brew Companyp pilersitsisusa pisortaalu Ulrik Rasmussen.

– Kalaallit Nunaat danskit nutaarsiassaqartitsiviini ukiuni arlaqalersuni initoorujussuusimavoq, tassa amerikamiut præsidentiata Trumpip Kalaallit Nunaat USA-p pigisariaqaraa nalunaarutigeqqaarmaguli, Ulrik Rasmussen oqaluttuarpoq.

– Soorunami aamma uanga nutaarsiassaqartitsiviit samminninnerannut malinnaavunga, allaammi piffissap ilaani ullut tulleriiaaginnavillugit Kalaallit Nunaat pillugu TV-kkut samminnittoqartuartarpoq.

– Taamatut pisoqarnerata sukaruttorfiani, silattuaqilerpunga uanga nammineq aammalumi danskit allat Kalaallit Nunaat pillugu ilisimasakippallaartugut – tamatumalu isumassarsisippaanga tamanit atorneqarsinnaasumik paasissutissanik siammarterisinnaasugut juullimut ammartagaq aqqutigalugu, taamaalillutik inuit ammartakkamik taassuminnga piginnittut kaffinik assigiinngitsorpassuarnik misiliiutigalutik Kalaallit Nunaat pillugu ilisimasaqarnerulissammata.

– Tusagassiuutit aqqutigalugit paasisitsissutigineqartartunit itinerulaartumik ullorsiut imaqartikkusussimavara. Oqaluttuat tunuatungaanniittut tikinneqartassapput, taamatuttaaq akerleriissutigisat tusagassiorfitsigut sammineqartut ilanngullugit. Tassami qanorluunniit Trump politikkikkullu annertuumik ukkatarinninneq pigaluarpata aamma Kalaallit Nunaat pillugu nuannersunik oqaluttuaqarpoq.

–  Tamanna annertuumik ilikkagaqarfiginikuuara, Josephap attaveqarfigilernerata kingorna, taannami pisut pissutsillu pillugit nassuiaallaqqilluinnartuugami – uangalu ilikkagarpassuaqarpunga, nutaarsiassatut saqqummiunneqartunut ilaanngikkaluarlutik ilisimallugit iluartut. Nice to know, soorlu taamak oqartoqartartoq.

Kaffinut puut ulapaartunut tulluarsakkat, ilaarlugit sananeqaqqusaanngitsut

The Brew Company maannamut ukiuni 18-ini atuuppoq  – tuniniakkanilu ukkatarineqartut tassaapput nioqqutissat immikkuullarissut ”brewer”-it ilaarneqaqqusaanngitsut. Puussiaaraq filterilik, taannalu sumi tamaani kaffiguleraanni kaffiliorfigineqarsinnaavoq (tiiluunniit), sumiiffigisami imermik qalattumik pissarsisinnaagaanni.

– Silamiikkumatuunik pisisartorpassuaqarpugut, aammalu pisisartoraavut inuit angalatoorujussuit, pisariitsumik kaffilioriaannaanerminnik nuannarinnittut. Kaffit puussiaaqqat taakku iluaniittut pitsaassutsimikkut qaffasissumik inissisimapput. Taakku imermik qalattumik kuisiffigigaanni – minutsit arfinilinniit arfineq pingasut tungaannut uninngatilaaraanni, tiitorfiit marluk immersinnaallugit pitsaassuseq Baristatut ittumik kaffisortoqarsinnaavoq, Ulrik Rasmussen nassuiaavoq.

–  Uani suliami anguniagara tassaaneruvoq kulturimik akunnermiliututut paasissutissanik siammarterineq. Taamaattorli aamma takusinnaavara Kalaallit Nunaanni The Brew Company immikkoortortaqarsinnaalluartoq. Tassami puussiaarannguaq taanna kaffimik pitsaasumik imaqartoq tuttunniarnermi nassatarissallugu naleqqulluinnarpoq, Josepha Kuitse Kunak Thomsen oqarpoq.

– Assorsuaq tulluusimaarpunga juullimut ammartakkamik kaffinik imalimmik nunatsinnillu samminnittumik pilersitsinermi kuturikkut siunnersortitut inissisimallunga peqataasinnaasimagama. Isumaga malillugu assersuutaalluarpoq malugisaatit atorlugit, nuannersumik alapernaakkusulersitsisumillu Kalaallit Nunaat pillugu paasissutissiineq matumani ingerlanneqarsinnaammat.Tassami suna alla kaffimit kalaaliussutsimik ersersitsinerussava, Josepha Kuitse Kunak Thomsen aperivoq.

Naak uaajeertartoq aammalu kulturikkut pikialaartitsinermi akunnermiliuttuusartoq ullorsiummik isertulaartunnguamik siumoortumik takunninnikuugaluarluni, decembarip aallaqqaataanut qilanaarpoq.

– Tassami ulloq taanna aallartiffigalugu aamma uanga ammartagaq ammartassavara takusarlugulu ullormut kaffilliutaasup saniatigut Kalaallit Nunaat pillugu qanoq allassimasoqarnersoq. Pissanngatigaaralu kaffit assigiinngitsut misilitassama assigiinngissusaat qanoq ikkumaarnersoq.