Donald Trumpip ernera Donald Trump Jr. Nuummut tikeraarluni mippoq.
Nuummiinnera nalunaaquttap akunnerini sisamat tallimallu akornanniinnissaat naatsorsuutigineqarpoq.
Donald Trumpip ernera Donald Trump Jr. Nuummut tikeraarluni mippoq.
Nuummiinnera nalunaaquttap akunnerini sisamat tallimallu akornanniinnissaat naatsorsuutigineqarpoq.
Præsidentinngorlaap ernera siunnersortaalu Jørgen Boassen, Trumpimik tapersersuisutut ilisimaneqartoq, tikilluaqqusivoq.
Boassen annoraaqarpoq Donald Trump Jr.-illu Nuummi takornariartilaarnissaa piareersimaffigalugu oqarpoq.
- Akunnerit sisamat tallimat missaanni maaniissaaq. Tikeraarnissaa sivisuumik pilersaarutaagaluarpoq, ullualuilli matuma siorna maanna tikilertoq aatsaat paasivara. USA-mi aallartitaqarfimmit paasivara.
- Ullumikkut tikeraarneq politikerinut attuumassuteqanngilaq, taakkunannga taamaallaat attaveqarfigineqarpunga, Jørgen Boassen Sermitsiamut oqarpoq.
- Kalaaliuvunga tulluusimaartoq
Nalunnginneqartutut Trump suli USA-mi præsidentitut ivertinneqanngitsoq ilanngullugu oqaatigaa, taamaattumillu politikerinit pisortatigoortumik tikeraartutut suli tikilluaqquneqarsinnaanani.
- Inussiarnisaarluni tikeraarneruvoq, maanilu Kalaallit Nunaanni susoqarnersoq takuniaannarlugu, oqarpoq, nangipporlu:
- Soorunami ulloq una uannut immikkuullarissuuvoq.
- Kalaaliuvunga tulluusimaartoq tikilluaqqorusullugillu. Soqutiginnittullu tamarmik maanga ornigussinnaapput.
Takornariarneq tusagassiortunillu katersortitsineq
Boassen pilersaarutit pillugit ima oqarpoq:
- Nuummi angalaarutissavara sumiiffinnullu assigiinngitsunukassalluni. Pilersaarutit itisiliiffigisinnaanngilakka. Tikeraarneq paasisassarsiorneruvoq, assersuutigalugu katersugaasivimmukassaagut allanullu alutornartunut assilineqarsinnaasunut takuniaassalluta. Aammali nereqatigiissaagut, qularnanngitsumik Hotel Hans Egedemi.
- Minniariarpat illoqarfimmi angalaalissaagut.
- Trumpip Kalaallit Nunaannut soqutiginninni soorunami takutinnikuuaa. Taamaattumik isumaqarpunga ernerata Kalaallit Nunaat qanoq isikkoqarnersoq takuniarlugu maannartoq. Suleqatigiinneq aatsaat aallartisarneqaleruttorpoq. Soorunami Kalaallit Nunaanni innuttaasut nunanik annerusunik suleqateqarnissaminnut periarfissaqarput, Jørgen Boassen naliliivoq.
