Atassut ataatsimeersuareernermi: Naalakkersuisoqatigiinniiginnassaagut

Atassut nuna tamakkerlugu Nuummi sapaatit akunnerisa naaneranni ataatsimeersuarpoq. Partii naalakkersuisoqatigiiginnassasoq tunuliaqutaasut isummertut, siulittaasunngoqqittoq oqarpoq.

- Naalakkersuisoqatigiinni suleqataanerput peqataasunit tamanit apeqquserneqanngilaq. Taassuma nanginnissaa naatsorsuutigaarput, Aqqalu C. Jerimiassen Sermitsiamut oqarpoq.

AAMMA ATUARUK:

Aqqalu C. Jerimiassen siulittaasutut ingerlaqqippoq

Atassutip Inatsisartuni siunnersuutai, siorna qineqqusaarneranni aamma qitiusut, soorlu akileraarutip ilanngaatitaqarani 30 procentiinnanngornissaanut Illorsuillu ammaqqinneqarnissaanut tunngasut, naalakkersuisoqataasa upernaaq illuatungerluinnaanik isumaqarfigisarpaat.

Tamannalu pillugu Naalakkersuisunut tunuliaqutaaneq allanngussanersoq, ataatsimeersuartut aalajangerumaaraat, Aqqalu C. Jerimiassen, Sermitsiamut aasaq oqarpoq. Apeqqulli taanna maanna inissinneqarpoq. Atassut naalakkersuisoqatigiinniissaaq.

Politikkikkut anguniakkat

Atassut Inatsisartunut marlunnik ilaasortaatitaqarpoq. Partii naalakkersuisoqatigiinniikkuni peqataanngikkuniluunniit naalakkersuisoqatigiit amerlanerussuteqarnissaannut aalajangiisuusinnaanngilaq. 

Partiip aallartitaasa siunnersuutit 24-it ataatsimeersuarnerminni aalajangiiffigaat. Taakkununnga nakorsiartarfiit ilapput.

- Atassut Nuuk siunnersuuteqarpoq, nakorsiartarfiit namminersortut periarfissaasa nukittorsarneqarnissaat pillugit, Aqqalu C. Jerimiassen oqarpoq.

Nakorsiartarfiit namminersortut periarfissarissaarnerulernissaat partiip inatsisartuni ilaasortaatitaasa marluusut, tassa Aqqalu C. Jerimiassenip Bentiaraq Ottosenillu maanna suliassarilerpaat. Ataatsimeersuartummi tamanna aalajangerpaat.

- Peqqissutsimut ataatsimiititaliami ilaasortaatitaqarpugut, tamakku aqqutigalugit peqqissutsimullu naalakkersuisup oqaloqatigisarneratigut, tamakkua aqqutissat qanoq iliornikkut suliarineqarnissaat ujartussuagut. Pisariaqassappallu siunnersuutitut ingerlataqartarumaarpugut, partiimi unammillerteqarani siulittaasutut ingerlaqqittoq oqarpoq.

Inuk qitiutillugu. Atassutip tamanna oqariartaaseraa. Ataatsimeersuarnermi eqqarsartaatsikkut napparsimasut sullinneqarnerat eqqartukkanut aamma ilaasoq, siulittaasoq oqarpoq. Tamannalu naalagaaffeqatigiinnerup iluani periarfissanik atorluaanikkut pissasoq siunnerfiuvoq.

- Eqqarsartaatsikkut napparsimasut eqqarsaatigalugit naalagaaffeqatigiinnerup iluani suleqatigiinnerup suli pitsanngorsarneqarnissaa eqqartorparput. Danmarkimi eqqarsartaatsikkut napparsimasut angerlarsimaffiisa nunatsinnit pitsaanerusumik suleqatigineqarnissaat eqqartorparput. 

Nunatsinni taakkua atugaanni suna pitsaannginnami?

- Soorunami pitsaasorpassuaqarpoq. Kisianni ukua annertuumik ikiortariallit Danmarkimut pinikuusut immaqalu Danmarkimiittariaqartut Danmarkimiinnerat pillugu nunatsinninngaanniit suleqateqarnitta pitsaanerunissaa tassani eqqarsaataavoq. 

Akileraarnikillinissaq eqqartorneqanngitsoq

Atassut akileraarnikinnerunissamik anguniagaqarluni siorna ilaatigut qineqqusaarpoq. Tamannali Inatsisartuni upernaaq manna oqaluuserineqarmat angujuminaatsinneqarpoq. Siulittaasummi siunnersuutaa partiinit allanit, aamma naalakkersuisoqataasunit, taperserneqanngilaq. Ataatsimeersuarnermi akileraarut eqqartorneqanngilaq.

- Aningaasap naleerukkiartornera eqqartorneqarpoq. Tassa aningaasap pisissutaasinnaasup nalinga. Akileraarut qanoq iluseqassanersoq uani pineqanngilaq, Aqqalu C. Jerimiassen oqarpoq.

Piniakkat killilersukkat Qaanaallu eqqaani aalisarnikkut periarfissaasut pitsanngorsarneqarnissaat ataatsimeersuartut aamma anguniagassatut aalajangiukkaat taanna oqarpoq.

Siulersuisuunerit 

Partii ukiuni tulliuttuni pingasuni siulersortissaminik arfininngornermi toqqaavoq. Aqqalu C. Jerimiassen siulittaasunngoqippoq. Bentiaraq Ottosen politikkikkut siulittaasup tulliatut ingerlaqqippoq. Folketingemut ukioq qineqqusaartoq, Malu Ostermann, aaqqissuussaanikkut siulittaasumut tullinngorpoq. Folketingemut qineqqusaaqataasoq, politikkimut uteqqittoq, Ellen Schärfe, ulluinnarni aqutsisunut ilaasortanngorpoq. Siorapalummi Qeqertanilu nunaqarfinnut aqutsisunut ilaasortaq, Thomas Duneq, ulluinnarni aqutsisunut aamma ilannguppoq. 

Otto Nakingi, Tiilerilaameersoq, nunaqarfinnut aqutsisunut ilaasoq, siulersuisuunernut ilaasortanngorpoq. Knud Kleemann, Avannaata Kommuniata kommunalbestyrelsianut ilaasortaq, siulersuisuunernut aamma ilaasortanngorpoq. Arnannguaq Jeremiassen, Kommune Qeqertalimmi sinniisutut ilaasortaasoq, siulersuisuunernut ilannguttut ilagaat. Atassutip inuusuttaanit ilaasortassamik aamma toqqaasoqassaaq.