Nuup Kangerluani mobilikkut attaviit timmisartut ingerlaannarnissaat qulakkeerniarneqarmat kipisaqattaarsinnaassasut

Nuup Kangerluata kangisissortaani, Qingaap Qeqertarsuullu kitaani angalanerni mobilit attaveqartarsimasoq attaveeruteqattaalersimassappat peqqutissaqarpoq. Sumiiffinnimi taakkunani mobilit attavii ataasinngornermit sakkukillineqarallartut, Tusass tusagassiorfinnut allappoq.

- Nuummi timmisartuussinermi aqutsisunik nutaanik pilersitsisoqarnerata kinguneranik, radiokkut attaveqaqatigeeriaatsinut piumasaqaatinik annertunerusunik pilersitsisoqarnikuuvoq. Tamatumalu kinguneranik Naviair-imut attaveqaasersuinermi radiokkut attaveqaasersueriaatsimik nutaamik pilersitsisoqartariaqartussanngorluni, tamatuma timmisartukkut angallassinermi Angallannermut Aqutsisoqarfiup piumasaqaataanik naapertuuttumik isumannaatsumik angallassisinnaaneq naammassiniarnermi ingerlanneqassalluni, ingerlatseqatigiiffik allappoq.

Mobilinut attaveqaatit tamakkiisumik pisinnaasaqassannginnerat 2027-imi aggutsip qaammataa ilanngullugu pissassoq, Tusassip pilersaarutigaa. Mobilimik attaviit ajorseriarnerisa saniatigut KNR-ip FM-radioata attavii Qingaameersut aamma ajorseriassapput. Tamanna kangerluup ilorpasissuani radiomik naalaarniarnermut akornutaasarsinnaasoq, ingerlatseqatigiiffiup teknikkimut attaveqaatinullu pisortaa oqarpoq.

- Ilisimavarput mobilikkut attaveqarneq kangerlummi angalasunut pingaarutilerujussuusoq. Taamaattumik tamanna isumaliutigilluareerlugu aalajangerneqarpoq. Imali inissisimavugut timmisartut ingerlaannarsinnaanerat qulakkeerniarlugu sarfamik pilersuinermi tamanna salliutittariaqarlutigu. Ataavartussamik aaqqiiniarneq sulissutigaarput, taamaalilluni attaveqaqqilerluni, Inooraq Brandt oqarpoq.

VHF-ip attavii nunaqarfimmilu attaviit ajornerulissanngitsut  

Mobilit attaviinik ajorseriarsitsineq Nuup Kangerluani VHF-mik attaviit ajorseriarneranik kinguneqassanngitsoq, Tusass allappoq. Taassuma saniatigut Nuup Kangerluani nunaqarfimmi, Kapisilinni, mobilikkut FM-kkullu attaviit ajorseriassanngitsut, Tusass neriorsuuteqarpoq.

Taamaakkaluartoq ingerlatseqatigiiffik Namminersorlutik Oqartussanit pigineqartoq, angalasunut kaammattuutissaqarpoq. 

- Tusassimit erseqqissarneqarpoq mobilikkut attaveqarneq imaani angalanermi attaveqarniarnermi kisiartaasariaqanngimmat. Angallammik angalasut tamatigut atorsinnaasumik VHF-eqartariaqarput, taamaalillutik attaveqarsinnaallutillu ikiortissarsiorsinnaallutik aamma mobilikkut attaviit avataani.

Aappaagu aggustimi ataavartumik aaqqiisoqassasoq

Qingaami sarfamik pilersuinerup ataavartumik annertusinissaa Tusassip maanna sulissutigaa, taamaaliornikkut mobilikkut attaveqarsinnaaneq timmisartumillu angallannermi radiukkut attaveqaasersuutit naammaginartumik isumannaarneqassapput. 

- Naviairimi attaveqaatitigut isumannaatsumik aaqqissuussineq Nuummut Nuummiillu timmisartukkut angallannerup isumannaatsumik ingerlasinnaanissaanut pingaarluinnartuuvoq. Nutaanik radiukkut attaveqaasersuutinik pisariaqartitsinerup sumiiffimmilu kiffartuussinermut allamut pingaaruteqartumik pisariaqartitsinerup akornanni silatusaartumik oqimaaqatigiissitsisoqarpoq, ataavartumik sarfamik pilersuinerup pilerseqqinnissaanut. Tamanna Tusassimi qanimut pitsaasumillu suleqateqarnikkut pivoq, Naviairimi siunnersortaaneq Ole Eckhaus oqarpoq. 

Suliaq aggustimi 2027-mi naammassissasoq naatsorsuutigineqarpoq, tamatumalu kingorna pilersaarutaasut naapertorlugit mobilikkut attaveqaatit nalinginnaasut pilerseqqinneqarsinnaassapput.