Isumaginninnermut Aqutsisoqarfik nutaamik pisortartaarpoq

Arnajaraq Hammeken Isumaginninnermut Aqutsisoqarfimmi decembarip aallaqqaataani pisortanngussaaq.

Taama Naalakkersuisut tusagassiutitigut nalunaarummi allapput.

Isumaginninnermut Aqutsisoqarfik isumaginninnerup iluani ingerlatsinermik ineriartortitsinermillu suliaqartarpoq, Naalakkersuisullu naapertorlugit Arnajaraq Hammeken sulinermini aqutsisutut isumaginninnermilu suliassanik arlalinnik suliaqartareerpoq, isumaginninnermilu suliniutinik ineriartortitsineq siunnersuinerlu pillugit misilittagaqangaarluni.

Naalakkersuisoq Mariane Paviasen Jensen (IA) atorfinitsitsineq pillugu ima oqarpoq:

– Suliatigut nukittuunik piginnaasaqarpoq aqutsinermillu annertuumik misilittagaqarluni, tamannalu Isumaginninnermut Aqutsisoqarfiup nunatsinni tamarmi meeqqat, inuusuttut ilaqutariillu pillugit sulinerata nanginneranut nukittorsaataassaaq sullissinerullu pitsanngorsarnissaanut suleqataassalluni.

- Suliassaqarfimmi suliassarpassuit pingaarutillit pillugit suleqatigiinnissarput qilanaaraara, Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoq Mariane Paviasen Jensen oqarpoq.

Isumaginninnermut Aqutsisoqarfimmi pisortaq Tina Evaldsen Kommuneqarfik Sermersuumi Meeqqanut Atuarfeqarnermullu Ingerlatsivimmi pisortatut atorfinitsinneqarnini pissutigalugu upernaaq tunuarpoq.