Doris Jensen kommunalbestyrelsimut ilaasortanngorpoq
Kim Kielsen sulinngiffeqarusummat Doris J. Jensen Kommuneqarfik Sermersuumi kommunalbestyrelsimut ilaasortanngorpoq.
Doris J. Jensen Kommuneqarfik Sermersuumi kommunalbestyrelsimi Kim Kielsenimut sinniisutut ilaasortanngorallarpoq.
Assi: Leiff Josefsen
Kommuneqarfik Sermersuumi kommunalbestyrelsimut qinigaarlaat tallimanngornermi inissitsiterlutik ataatsimiipput.
Politikerit borgmesterimik qinersissapput, tassanilu IA-p Demokraatillu suleqatigiinnissamik isumaqatigiissuteqarnerisa kingunerisaannik Avaaraq S. Olsen borgmesteritut ingerlaqqinnissaa ilimanaateqarpoq. Taamaalilluni politikeri borgmesteritut amerlanerussuteqartunit tapersersorneqassalluni.
Politikeri Siumumeersoq misilittagaqarluartoq Doris J. Jensen politikimik suliaqaqqilernissaa aamma ilimanaateqarluarpoq.
Ilaatigut qinigaaffimmi kingullermi Siumup Inatsisartuni gruppiani politikkikkut oqaaseqartartuuvoq ukiullu 20-t sinnerlugit Kalaallit Nunaanni politikimik suleqataasimalluni. Inatsisartunulli maanna qinigaaqqinngilaq aamma toqqaannartumik kommunalbestyrelsimut qinigaanngilaq.
Inatsisartut siulittaasuattut suliassaq isumagissagaa
Doris J. Jensenip parteeqataa Kim Kielsen kommunalbestyrelsimit tunuarallarnissamik qinnuteqarmat Doris J. Jensen kommunalbestyrelsimi ilaasortanngortussanngorpoq.
Kim Kielsen Inatsisartunut qinigaavoq, tassanilu Demokraatit, IA, Atassut aamma Siumut naalakkersuisoqatigiinnissamut isumaqatigiissuteqarmata Inatsisartunut siulittaasunngorluni.
Kim Kielsen Inatsisartut siulittaasuattut atuuffeqarnermini kommunalbestyrelsimit sulinngiffeqarnissani kommunimut nalunaarutigaa.
Nivi Olsen aamma sulinngiffeqalertoq – Naleqqami ilaasortaq tunuarpoq
Politikeri nuimasoq alla kommunalbestyrelsimit aamma tunuarniarluni qinnuteqarsimavoq. Demokraatineersoq Nivi Olsen.
Naalakkersuisunut ilaasortaanngornini pissutigalugu sulinngiffeqarusunnerminut tunngavilersuutigaa.
Nivi Olsen taarserlugu Per Berthelsen (D) kommunalbestyrelsimut ilaasortanngorpoq.
Naleraq illoqarfiit pingaarnersaata kommuniani kommunalbestyrelsimut ilaasortamik ataatsimik qinigaaffeqalerpoq, tassa Aputsiaq Inuk Petersen.
Ilinniarnini pissutigalugu kommunalbestyrelsimit ilaasortaajunnaarnissani kissaatigaa, Peter Utuanngelu (N) sinniisutut ilaasortanngortussanngorluni.
