Dronit inissisimaffissaat isumaqatigiinngissutaasoq

Inatsisartuni nunanut allanut sillimaniarnermullu ataatsimiititaliaani ilaasortap Siumumeersup Kuno Fenckerip LinkedInimi “Kalaallit Nunaannut sillimaniarnitsinnullu periarfissaq annaasaq”-mik qulequtserlugu, dronet ungasissumut ingerlasinnaasut Kalaallit Nunaannik Issittumillu nakkutilliisussanngortut Aalborgimut inissinneqarnissaat pillugu qallunaat aalajangiinerat sakkortuumik oqaaseqarfigaa.

Dronit ungasissumut ingerlasinnaasut Danmarkimiissasut tassanilu aserfallatsaaliorneqassasut Danmarkimut isumaqatigiissutigisimallugu Siumumiit naalakkersuisunut ilaasortaq Vivian Motzfeldt, naalagaaffinngornissamut nunanullu allanut tunngasunut akisussaasoq, oqartoq Sermitsiaq.gl-imi allaaserineqarpoq.

Danskit illersornissamut ministeriat Troels Lund Poulsen Nuummut tikeraarnermini illersornissamut isumaqatigiissut tamatumalu Kalaallit Nunaannut Issittumullu qanoq sunniuteqarnera pillugu innuttaasunik ataatsimiititsinermini novembarip 23-ani pisussami sammisassaasa ilagaat.

Naalakkersuisut illersornissaq pillugu isumaqatiginninniarnernut ilaatinneqarnerannut atatillugu tikeraarpoq.

Aalborgimi dronenik inissiinissaq pillugu illersornissaqarfiup tusagassiuutinut nalunaarutaani Aalborgimi suliffiit 70-it sinnillit Karupimilu suliffiit arfinillit pilersinneqassasut allassimavoq.

Suliffiit taakku Kangerlussuarmiittariaqartut Kuno Fencker isumaqarpoq.

Nakkutilliissutit Aalborgimut inissinneqarnissaanik aalajangernerup naalagaaffeqatigiinnerup Issittumi nunallu immikkoortuini nakkutilliinermik annertusaanissaanik periarfissaq immikkuullarissoq annaaneqartoq taanna isumaqarpoq.

"Droni pinartoqartillugu Aalborgimiit Kalaallit Nunaannut akunnerit aqqanillit missaanniittut atorlugit angalasariaqarpoq. Qisuariarnissamik annertuumik sivitsuiinnarani Nunani avannarlerni Issittumilu ataavartumik nakkutilliinissamik qulakkeerinninnissamut annikillisaataavoq", allappoq.

Kangerlussuarmi siusinnerusukkut ataatsimeersuarnerni marlunni Kangerlussuarmi dronenut anginerusunut ungasissumut ingerlaarsinnaasunut immikkut ittumik droneqarfeqalersinnaanerup iluaqutissartai erseqqissarneqarsimasut oqarpoq.

Issittumi nakkutilliinermi suliassanut tunngatillugu Kalaallit Nunaata inissisimavia tulluarpoq, Kangerlussuarmi dronesiveqarneq sukkanerusumik toqqaannarnerusumillu nakkutilliiffiusunut apuussinnaanermik kinguneqarluarsinnaagaluarluni. Tamatumalu saniatigut suliffinnik pilersitsillunilu inuiaqatigiinni aningaasaqarnikkut ineriartornermik kinguneqarsinnaagaluarluni, allappoq.

Issittumi piginnaanngorsaanissamut pilersaarutip naalagaaffeqatigiit Issittumi Atlantikullu avannaani nakkutilliinerminnik annertusaanissaq pingaarnertut siunertaraa. Dronit nakkutilliinermut pingaarnertut atorneqartussat 3.320 kilometerinik ungasitsigisumut inissinneqarnissaannik aalajangerneq Kalaallit Nunaani inissiinermiit periarfissanik annaasaqarnertut misinnarpoq, naliliivoq.

Siunissami isumaqatigiinniarnerit Kalaallit Nunaata Illersornissaqarfiup Issittumi suliassaanut peqataanerunissaa qulakkeertariaqarpaat. Suliassanik tamakkuninnga naammassinninnissamut periusissiornikkut nunallu inissisimavia eqqarsaatigalugu iluaqutissataqarpoq. Kalaallit Nunaata periarfissai tamakkiisumik atornissaannut piffissanngorpoq – isumannaatsuunissamut inuiaqatigiinnillu ineriartortitsinissamut, LinkedInimi allappoq.

Folketingimut ilaasortat marluk, Aki-Matilda Høegh-Damip (S) aamma Aaja Chemnitzip (IA), illersornissamut isumaqatigiissuteqartut droninik Aalborgimi inissiinissamik aalajangernerat DR-imi isornartorsiorpaat.

Dronit pillugit immikkut ilisimasallip Mads Petersenip atuagassiami Ingeniørenimi aamma isornartorsiorpaa.

Dronit ungasissumut ingerlaarsinnaasut Issittumi piginnaanngorsaanermut ilaasut, ajornartoortoqassappallu Kalaallit Nunaanniinnissaat pingaaruteqartoq tamarmik isumaqarput.