Dronit ungasissumut timmisinnaasut Aalborgimiissapput
– Dronenik Kalaallit Nunaanni atuinissamut periarfissat illersornissaq pillugu isumaqatiginninniarnernut atatillugu oqallisigineqassapput, Vivian Motzfeldt oqarpoq.
Vivian Motzfeldt: - Illersornissaqarfiup Kalaallit Nunaanni suliaqarnerata nukittorsarneqarnera suliffeqarfinnut iluaqutaanissaa, nunamilu tamarmi innuttaasut sakkutuujunngitsut sapinngisamik peqataatinneqarnissaat pingaartumik ukkatarivakka.
Assi: Leiff Josefsen
– Issittumi piginnaasanik annertusaanissamut isumaqatigiissut pillugu politikkikkut isumaqatigiissuteqarnitsinniilli dronet ungasissumut angalasinnaasut Kalaallit Nunaannit Danmarkimiillu ingerlanneqarsinnaassasut siunertaasimavoq, Danmarkimi kiffartuunneqassammat. Tamatuma saniatigut dronet Issittup Atlantikullu avannaata saniatigut nunarsuarmi sumiiffinni allani aamma atorneqarsinnaassapput.
– Tamanna illersornissamut ministeriusimasumik maajimi 2022-mi isumaqatigiissutaasumi erseqqippoq, illersornissamut ministerip Troels Lund Poulsenip nalunaarutaa pillugu, tassa dronit ungasissumut angalasinnaasut Danmarkimi Aalborgimiinnissaannut, naalagaaffinngornissamut nunanullu allanut tunngasunut naalakkersuisoq Vivian Motzfeldt oqarpoq.
Isumaqatigiinnginneq
Isumaqatigiissut Folketingimi illersornissamut isumaqatigiissuteqartuni partiini pivoq, taannali kalaallit folketingimi ilaasortaatitaasa Aki-Matilda Høegh-Damip Siumumeersup aamma Aaja Chemnitzip IA-meersup Danmarks Radiokkut isornartorsiorpaat aamma Arctic Unmannedimik piginnittup Mads Petersenip Ingeniørenimi sapaatip-akunnerata siuliani saqqummertumi isornartorsiorpaat.
Dronet ungasissumut timmisinnaasut Kangerlussuarmi aalajangersimasumik angerlarsimaffeqartariaqartut taakku isumaqarput, taamaalillutik Kalaallit Nunaanni pisariaqartitsiffiusumut ingerlaannaq apuussinnaaniassammata. Aammattaaq taakkuninnga aserfallatsaaliuineq Kalaallit Nunaanni suliarineqartariaqartoq.
Vivian Motzfeldt tamanna pillugu ima oqarpoq:
- Danmarkimi suliffiit qanoq pilersinneqartarnerat imaluunniit sumiinnissaannut tunngatillugu tunngaviusumik isummersinnaanngilanga. Qallunaat aalajangiisartut taakku aalajagingassaraat.
- Naalakkersuisut piginnaasanik annertusaanissamut isumaqatigiissummut ilanngupput, soorluttaaq Issittumut Atlantikullu Avannaanut tunngatillugu isumaqatigiissutip atuutilersinneqarnissaanut peqataatinneqartugut. Dronenik Kalaallit Nunaanni atuinerup qanoq atuutilersinneqassaneranik erseqqissaanerit illersornissaq pillugu isumaqatiginninniarnernut atatillugu oqaluuserineqassapput, Vivian Motzfeldt Sermitsiaq.AG-mut oqarpoq, nangillunilu:
– Issittumi piginnaasanik annertusaanissaq, suliniuterpassuarnik imaqartoq, ataatsimut isigalugu isigineqassaaq, piginnaasallu imminnut tapertariissallutik. Illersornissaqarfiup Kalaallit Nunaanni suliaqarnerata nukittorsarneqarnera suliffeqarfinnut iluaqutaanissaa, nunamilu tamarmi innuttaasut sakkutuujunngitsut sapinngisamik peqataatinneqarnissaat pingaartumik ukkatarivakka, naalakkersuisoq oqarpoq.
– Illersornissamut isumaqatigiissut pillugu isumaqatiginninniarnerit Issittumilu piginnaasanik annertusaanissamik pilersaarutit atuutilersinnissaat suli ingerlappavut, tassanilu oqaatigeriikkattut aaqqiissutissat nunamut tamarmut iluaqutaanissaat pingaartippara – aamma isorliunerusunut, erseqqissaavoq.
Dronet mikisut
Issittumi piginnaasanik annertusaanissamut pilersaarutit aamma dronenik mikisunik imaqarmata, taakkualu umiarsuit issittumiittut atorlugit Kalaallit Nunaanni annaassiniarnermut avatangiisinillu illersuinermut atatillugu isumannaallisaanermut annertusaaqataassasut Vivian Motzfeldtip tikkuarpaa.
- Taamaattumik dronet ungasissumut timmisinnaasut kisimik atorneqassanngillat, oqarpoq.
– Illersornissaq pillugu isumaqatiginninniarnerni suliffeqarfitta ilaatigut nakkutilliinermut tunngatillugu peqataarusuttut ilanngunnissaat pingaartippara, tassungalu atatillugu Tusass aamma Air Greenland aaqqiissutissanik siunnersuuteqarsimapput. Suliffeqarfitta soqutigisaasa piginnaasaallu eqqumaffigineqarnissaat sulissutigaara, oqarpoq.
Suli utaqqisut
- Isumaqatigiinniarnerit qaqugu naammassisasoraagit?
– Issittumi piginnaasanik annertusaanissamut 2022-mi isumaqatigiissuteqarnitsinniilli isummavut pingaartitavullu piareersimatippagut. Danmarkimi naalakkersuisut isumaqatiginninniartullu ukiut marluk sinnerlugit utaqqisimavavut, naapinnissalli qallunaat naalakkersuisuisa nikinneri nunanilu tamalaani sillimaniarnermut politikki allanngortarneranit taamaatiinnarneqartarlutillu kinguartinneqartarput.
- Nunarsuaq allanngorartuarpoq, tamannalu isumaqatigiinniarnernut sunniuteqarpoq. Ineriartornerilli takuagut, taakkulu nuna tamakkerlugu upalungaarsimanitta nakkutilliinittalu nukittorsarneqartariaqarneranik isumatsinnut tunngaviliipput, Michael Lerner, USA-mi nunanut allanut tunngasunut ataatsimiititaliami siulittaasoq oqarpoq.
- Issittumi suliniutit pillugit isumaqatip ilaanik piaarnerpaamik isumaqatigiissuteqarnissarput uannut pingaaruteqarpoq, Vivian Motzfeldt oqarpoq.
Dronet qaqugu tunniunneqassanersut suli ilisimaneqanngilaq, sakkutooqarnikkulli atorneqarsinnaalernissaat sivisunerussasoq naatsorsuutigineqarsinnaavoq.
