Piffissap aalajangersarneqarnera qanoq aaqqinneqassanersoq politikkerinit maannakkut aalajangerneqassaaq

Inatsisinik Atuutsitsinermut Ataatsimiititaliap inassutigaa nalunaaquttap UTC-3-mut utertinneqarnissaa, aasaaneranili nalunaaqutaq suli atuutiinnarneqassasoq inassutigaa.

Inatsisartut siunnersuut tamanna malissavaat?

Siumup piffissamik aalajangersaanermut siunnersuutaata pingajussaaneerneqarnera aallartinnerani tamanna erseqqississaaq. Taamaattumik politikerit nunami piffissamik aalajangersaaneq qanoq aaqqinniarnerlugu inaarutaasumik ullumikkut aalajangissapput.

Naalakkersuisut siulittaasuat Jens-Frederik Nielsen (D) siullersaalluni oqaluttarfimmiippoq.

Allannguutigineqartussaq malillugu nalunaaquttap-akunneri nalinginnaasut UTC-3-mut 2027-mi oktobarip 31-aniit allanngortinneqassapput.

Euoprap nalunaaqutaa nalunaaquttap-akunneranik ataatsimik ulloq taanna aallarnerfigalugu siuartinneqarpoq.

Siulittaasup erseqqissaqqippaa inatsisissatut siunnersuut akuerineqassappat qanoq kinguneqassanersoq, uteqqippaali Inatsisartut aalajangiinerat ataqqiniarlugu. Tamannalu siuliani aamma taama oqaatigaa.

Siumut ajugaanera nakkarsarneqassanngilaq

Erik Jensen (S) tulliulluni oqalugiarpoq. Siumup eqimattaata oqaluuserisassanngortitaa maanna naammassisinnaagamikku nuannaarutigaa.

AAMMA ATUARUK

Piffissap aalajangersarneqarnerata allanngortinnissaa isumassarsiatsialaanersoq, Naalakkersuisut siulittaasuata erseqqissumik akissutissarsisinnaanngilaa

- Ataatsimiititaliap Siumup siunnersuutaa akuerineqarnissaa innersuutigaa. Innuttaasut amerlasuut atsiornernik katersuinermut peqataapput, tamannalu akiuunnitta ingerlateqqinnissaanut nukissaqalersillutalu nakussatsissutigaarput, Erik Jensen oqarpoq, innuttaasut kiisalu politikeriusimasoq Qupanuk Olsen, nalunaaquttap utertinneqarnissaanut siunnersuuteqaqqaartoq, qutsavigillugit.

- UTC-3-mut uteqqissaagut. Aasaanerani nalunaaqutaq atorunnaarsilluinnarnavianngilarput, Naalakkersuisulli aasaanerani nalunaaquttap atorunnaarsinnissaanut piginnaatitaapput, Erik Jensen oqarpoq, isumaqatigiissullu pitsaalluinnartutut taavaa.

Naleqqamiit Erik Jensen aperineqarpoq, taassuma aasaanerani nalunaaqutaq atuutiinnarnissaa naammaginngilaa, 2023-milu pissutsinut uterneq ajugaanertut nalilerneqarsinnaanersoq apeqqutigaa.

Aasaanerani nalunaaqutaq atorunnaarsinneqarnissaa suli anguniagaasoq maannakkumulli taamaaliortoqanngitsoq, Erik Jensen oqarpoq. Inatsisinut Atuutsitsinermut Ataatsimiititaliap inassutigaa Kalaallit Nunaata EU-p taamaaliornissaa utaqqigaa, taamaasiornikkummi aasaanerani nalunaaquttap akunnermik ataatsimik nikigassutaannginniassammat. Nalerarli isumaqarpoq taamaalilluni EU aalajangertassagaa qaqugukkut Kalaallit Nunaat aasaanerani nalunaaqutaq atorunnaarsissanersoq.

Inatsisartut siulittaasuat Kim Kielsen (Attaviittoq) nalunaaqutaq 10.25 nalunaarpoq ataatsimiinneq unitsinneqarallassasoq, siulittaasoqarfiup ilaasortat ilaasa oqaatsinik atuinerat eqqartorneqassammat.

Siumup Naleqqallu oqallinnerat innersuussutigaa, tassani ataatsimiititaliap sulinera eqqartorneqarpoq, oqallinnerullu nipaa sakkortusiartuinnarpoq. Ataatsimiinneq qaqagu aallarteqqinneqassasnersoq oqaatigineqanngilaq.

Nutarterneqarpoq.