KNQK-p naatsorsuutai siulittaasunngorallartup itisiliiffigerusunngikkai

Sermitsiap KNQK-p siulersuisuunerisa naatsorsuutit akuerisaat pissaarsiarai. Naatsorsuutit siornamoortut eqqarsaatigissagaanni quppernerup aappaata affaanik takissuseqarput.

Tapiissutit tamakkiisut Namminersorlutik Oqartussanit tapiissutaasut naatsorsuutini allassimavoq. Taakkua 1.750.000 koruuniupput. Taamatuttaaq ukiumi tassani aningaasartuutit aamma taama amerlassuseqartut naatsorsuutini allassimavoq.

AAMMA ATUARUK:

KNQK-mi siulittaasoq atuffimminit tunuarpoq

KNQK-p naatsorsuutai naapertorlugit kattuffik akiliisitsiniartarfimmut 50.190 koruuninik, akunnittarfinnut 272.710 koruuninik, siulersuisut aningaasarsiaannut 62.882,50 koruuninik siorna ilaatigut akiliivoq. Taakkua saniatigut Mikkel Jeremiassenip mastercardimik akilersimasai, suuneranik nassuiarneqanngitsut, 154.542,02 koruuniupput. Taakkuali tamarmik sumorpiaq atorneqarsimanersut, maannakkut siulittaasunngorallartumit nassuiarneqarumanngillat.

- Taakku oqaatigisinnaanngilakka uanga, aningaaserisup akisussaaffii sinnerlugit oqaaseqarusunngilanga. Aningaaserisumut apeqqutigisinnaavatit, Hansigne S. Broberg Sermitsiamut oqarpoq.

Kattuffiup naatsorsuutai, ulluni kingullerni oqallisaaqisut, siulittaasuugallartup oqaaseqarfigerusunngilai. Kattuffiup aningaaserisua, Susanne Berthelsen, akisussatut innersuuppaa. Sermitsiap Susanne Berthelsen attavigaa, saaffiginnissulli taassuma qisuariarfiginngilaa.

Isumaqarpit kattuffik aningaasatigut ingerlatsilluartoq?

- Ingerlatsinera ajunngitsumik ingerlareeraluartoq kisianni suli nakkutigineqarnera ataatsimoorullugu, nukik ataasinngortinniarsaralugu ingerlavugut. Kisianni ajortoqanngilaq. Tassami, aningaasat utertitassat pillugit qapputaavoq. Kisianni atornerluisoqarnikuunngilaq, Hansigne S. Broberg oqarpoq.

Kattuffiup nunap karsianut akiliisinnaassusaa pillugu akerusunngitsoq

AAMMA ATUARUK:

KNQK aningaasaliissutit 500.000 koruunit sinneqartut siunertarinngisaanut atorsimallugit nassuertoq

Kattuffiup aningaasat nunap karsianit tapiissutit 535.000 koruunit, siunertarinngisaanut atorsimagamigit nunap karsianut utertissallugit naalakkersuisunut isumaqatigiissuteqarnikuuvoq.

Kattuffimmut, tapiissutinik ingerlasumut, akiligassaq taama annertussusilik akilerneqarsinnaanersoq siulittaasuugallartup akisinnaangilaa.

- Taanna toqqaannartumik uanga akisinnaanngilara aningaaserisup toqqaannartumik taakku akisussaaffigimmagit.

Immikkut ittumik ataatsimeersuarnissaq tusarniutaasoq

Kalaallit Nunaanni Qimussertartut Kattuffiat, KNQK, immikkut ittumik qaqugu ataatsimeersuassava? Qimussertartut peqatigiiffii sinerissamiittut, tamanna pillugu tusarniarneqartut, KNQK-mi siulittaasuugallartoq, Hansigne S. Broberg, Sermitsiamut oqarpoq.

- Siulersuisuunerit ataatsimiinnitsinni aalajangerpugut peqatigiiffiit ilaasortat tusarniassallutigit. Tusarniaaneq novembarip 22-nut killilerparput, taanna oqarpoq.

Kattuffimmi ukiorpassuarni siulittaasup, Mikkel Jeremiassenip, kattuffik immikkut ittumik ataatsimeersuassasoq KNQK-p siulersuisuunerinut siunnersuutigisimallugu, Facebookkikkut sapaatiummat nalunaarutigaa. Siunnersuut tamanna siulersuisuunernit ingerlaannartumik isumaqatigineqanngilaq. Peqatigiiffiilli isumaat maanna tusarniarneqaqqaarput.

- Malittarisassat malillugit ilaasortat marluk pingajorarterutaat kissaateqarpata taava immikkut ittumik ataatsimeersuarneq ingerlasinnaavoq, Hansigne S. Broberg oqarpoq.

AAMMA ATUARUK:

Qimussersaq 71 KNQK-p immikkut ittumik ataatsimeersuarnissaanik piumasaqartunut ilannguttoq

Mikkel Jeremiassen kattuffimmi siulittaasutut tunuarluni, Facebookkikkut pingasunngornermi unnuttoq allappoq. Sermitsiap Mikkel Jeremiassen sapaatit akunnera sinnerlugu apersorniarlugu attaveqarfigisaraluarpaa. Taassumali Sermitsiamit attaveqarfigineqarnini qisuariarfiginngisaannarpai.

Hansigne S. Brobergip Mikkel Jeremiassenip kattuffimmi siulittaasutut tunuarnera oqaaseqarfigerusunngilaa.

Periarfissat marluk

Kattuffik pilersaarutaaqqaartut malillugit 2028-imi ileqquusumik aatsaat ataatsimeersuartussaagaluartoq, siulittaasuugallartoq nassuiaavoq. Maannakkulli immikkut ittumik ataatsimeersuarneq avaqqunneqarsinnaajunnaarpoq. Tamannali qaqugu pissava? Periarfissat marluusut taanna oqarpoq.

Periarfissaq siulleq tassaavoq tusarniaanerup kingorna attaveqaatit atorlugit piaartumik immikkut ittumik ataatsimeersuarneq imaluunniit Avannaata Qimussersui Qeqertarsuarmi aappaagu ingerlanneqalerpata aallartitat naapinneranni immikkut ittumik ataatsimeersuarneq. Hansigne S. Brobergip periarfissaq kingulleq atorlugu immikkut ittumik ataatsimeersuartoqassasoq kissaatigaa.

- Sisimiuni siorna ataatsimeersuarnermi peqataavunga. Avataanit tikissinnaanngitsut attaveqaatitigut peqataapput. Attaveqaat kipiluttunarsinnaasarpoq. Taamaattumik pisariaqarsoraara Avannaata Qimussersuisa nalaani peqataasussat tikillutik ataatsimeersuarnermi peqataassasut, taanna oqarpoq.