Nuummi illoqarfiup immikkoortuani Nuussuarmi Illorpumi oqorutit qalerpassuinik atisanillu igitanik nerriviup qaava ulikkaarpoq.
Isumasioqatigiinnermik aaqqissuisut tassaapput Sheila Sariboga
aamma Ivalu Skifte Labansen.
Nuummi illoqarfiup immikkoortuani Nuussuarmi Illorpumi oqorutit qalerpassuinik atisanillu igitanik nerriviup qaava ulikkaarpoq.
Isumasioqatigiinnermik aaqqissuisut tassaapput Sheila Sariboga
aamma Ivalu Skifte Labansen.
Nutaaliortartut taakkua marluk
ukiaanerani atuanngiffeqarnerup
nalaani sapaatip akunnerata
naanerani kingullermi Nuummi
Katersugaasivimmi Nuutoqqami
ukiaanerani atuanngiffeqarnermi
sapaatip akunnerata naanerani
kingullermi saqqummersitsipput.
Taanna nungusaataanngitsumik
atisanik atuinissamut paasisitsiniaanermut suliniutaavoq.
- Eqqakkanut eqqaavimmi nassaarisavut kisiisa atorlugit atisanik
sisamanik atisaliorpugut, Sheila
Sariboga oqarpoq.
Ukiakkut atuanngiffeqarnerup
nalaani isumasioqatigiinnerit sisamat ingerlanneqarput, taakkualu
ilaat AG-p sisamanngornermi ualikkut seqinnarissuarmi silallu nillertinnerani peqataaffigaa.
Atisaliarineqartut assigiinngitsut isumasioqatigiinnerni sisamaasuni aallaavigineqarput.
Meeqqat inersimasullu ikittunnguit atornikut atoqqitat atorlugit
amaatinik annoraanillu mersorput.
Najaaraq, mersoqataasut ilaat,
panimmi tallimanik ukiullip annoraassaanik mersukkaminik
naammassinneqqammerpoq.
- Oqorutit qalii Bratzit atorlugit
mersugaavoq, aappaluttoq qaamasumik, tungujuartoq aappaluartumik aamma tunguusaq qaamasumik qalipaateqarpoq. Paninnut
takutinnissaa qilanaarisorujussuuara, Najaaraq qungujulluni
oqarpoq nangillunilu:
- Annoraamerngit tamaasa atorsinnaallugit ilikkarpara. Aallaqqaammut suut tamaasa igiinnartaraluarpakka, kisianni annoraamerngit atoqqinneqarsinnaapput,
ajoquteqanngillammi. Isumaqarpunga inuit sunik tamanik igitsinnginnerminni eqqarsariaqqaartassasut, immaqa tunissutigisinnaavaat namminerluunniit
nutaaliaralugit mersorlugit, oqarpoq.
Sheila Saribogap Ivalu Skifte Labansenillu atoqqiineq marluullutik soqutigiuarsimavaat.
- Atisanik piujuartitsineq nuannareqaarput, atoqqitassanillu
atuineq pingaartitaralugu, oqarpoq.
Marluullutik akuerisinnaanngisaminnik maluginiagaqarsimapput.
- Atisaliorfissuarnit soorlu
ASOS-imit Shein-imillu, poortukkat Kalaallit Nunaannut nassiunneqartartut amerliartuinnarput.
Annerusumik atisat sukkasuumik
tuniniarneqartartut eqqaavinni
nassaarisarpavut. Tamanna takullugu alianartuuvoq, Sheila Sariboga oqarpoq, Ivalu Skrifte Labansenilu aamma isumaqataavoq:
- Ajoraluartumik atisat taama
amerlatigisut iginneqartarput. Tamanna uggornarpoq. Røde Kors
inissaqartitsivallaannginnami
aamma atisanik igitsisarpoq. Allatut aaqqiissuussisoqartariaqarpoq,
arlaatigut immikkoortiterisoqartariaqarluni, oqarpoq.
Eqqakkanik katersivinni iluatinnartorpassuit
Illorpumi inimi mersortarfimmi
mersornermut atortunik ulikkaartumi mersorfiit ingerlarsorpalupput. Niviarsiaraq qulinik ukiulik
takisuunik kusanartunillu nujalik
nipituumik oqarpoq annoraaq
qernertoq sungaartunik sinilik
mersukkani naammassisimallugu.
- Assaa, peqataasunit allanit taama nersualaarneqarpoq.
Annoraaq atigamiuk nuannaarlunilu tulluusimaarpoq, tulluarilluinnarpaalu.
- Tamanna eqqarsaatiginninnerulernissatsinnut aallarniutaassaasoq neriuutigaara, annoraaminermik tunineqaraangatta qanoq atorfissaqartigisoq
aamma qanoq nukissamik atuiffiutigisarnersoq eqqarsaatigineqartarlutik, Ivalu Skifte Labansen
oqarpoq.
Saqqummersitsineq Nuummi
Katersugaasivimmi Nuutoqqami
oktobarip aqqaneq-aappaanni pivoq. Saqqummersitsinerup »Eqqakkanit atisaliat« taaguutigaa, atisallu tamarmik Nuummi eqqakkanik katersivinnit katersorneqarlutik.
- Suut tamaasa eqqaannartariaqanngikkivut erseqqissarniarsaraarput, isiginiarneqartariaqartorlu pilersinnerinut nukimmik atuisoqarluarsimanera, atisallu sivisunerusumik piusinnaanissaat.
Amerlanerit isikkoq pingaartittarpaat. Atisat aalajangersimasut qatsunneqartarmata aamma ajunngilaq, isumassarsiorfigisinnaavalli
igiinnarnissaannit allatut iliuuseqarsinnaagavit, oqarpoq.
Sheila Sariboga tujuuluaqqat assigiinngitsut 20-t atorlugit kjoleliorpoq, taannalu unnukkumut
atugassiaalluni takisooq.
Taassuma Ivalu Skifte Labansen
peqatigalugu isumasioqatigiinnerit sisamat ukiaanerani atuanngiffeqarnermi tamanut ammasut
aaqqissuuppaat.
Taakku isumaqarput atoqqiineq
piujuartitsinerlu kommunimit pingaartinneqanngitsut, aamma saqqummersitsineq isumasioqatigiinnerillu politikerinut kajumissaarutaasut.
- Aalajangiisartunut oqariartuutigerusukkatsigu eqqagassalerinermi atoqqiineq piujuartitsinerlu
pingaartinneqarnerusariaqartut.
Taamaattorli mingutsitsinnginnerunissamut piujuartitsinissamullu suliniutit takuneq ajorpavut. Pequtit angerlarsimaffimmilu
atortut nassaarisavut atorlugit angerlarsimaffeqanngitsut arlallit
najugaqartinneqarsinnaapput, kisianni tamakku igiinnarneqartarput ikuallanneqartarlutillu, Sheila
Sariboga nassuiaavoq.
Illorpumit anigama imminut
oqarfigaanga tulliani igitassaqaleruma eqqarsaatigilluaqqaartariaqarlugu immaqalu allamut atorneqarsinnaasunngorlugit suliaralugit.
Immaqa erninnut annoraaliorlunga.
Illimmi?
