Eqqakkat 13 tonsit inuusuttut Kujataani katersoraat

Inuusuttut aasap ukiallu ingerlanerani Kujataani sumiiffinni arlalinni eqqakkanik katersuipput. Eqqakkanik katersineq aalisartut piniartullu inaanni pivoq, eqqagassallu katersorneqartut ilaatigut tassaapput kisat, kalunnerpassuit saviminiusut, qassutit allaallu gummibåd ataaseq.

Eqqakkanik katersineq Innovation South Greenlandip Siu-Tsiu suleqatigalugu Arctic Cleanup-imiillu aningaasaliiffigineqarluni aaqqissuuppaa.

Inuusuttut eqqakkat katillugit 13,1 tonsit, tassa puussiarsuit qaqortut 53-it, katersorpaat, Innovation South Greenland tusagassiutitigut nalunaarummi ilisimatitsivoq.

Inuit mianersornerunissaat neriuutigigaa

Inuusuttut katersereernerminni inuusuttoqatitik pinngortitamik immamillu mianersuussinerunissaannik kajumissaarpaat:

- Inuit pissusilersornerat apeqqutaavoq, taamaammat inuit immamik pinngortitamillu eriaginninnerulernissaat pigisatsinnillu paarsillualernissaat neriuutigaara, Arnfred Karlsen Siu-Tsiu-meersoq ilaatigut oqarpoq.

- Sumiiffinni assigiinngitsuni pinngortitarsuaq alianaatsoq takuarput. Kusanangaarmat imartarput pinngortitarpullu eriaginerorusulerpakka, Aron Stach Siu-Tsiu-meersoq oqaluttuarpoq.

- Cigaretit kimmivikuinik plastikkinillu ulikkaarpoq. Iliuutsigut eqqarsaatiginerusariaqalerpagut, Mark Petersen Siu-Tsiu-meersoq oqarpoq.

Eqqakkanik katersinermik suliniummi najukkami nukiit inuusuttullu piumassuseqartut avatangiisinut qanoq sunniuteqarsinnaanerat inuiaqatigiinnilu akisussaassuseqarnermik qanoq kajumissisitsisinnaanerant ersertoq Innovation South Greenland allappoq.

Qaqortumi, Narsami, Eqalugaarsuarni, Alluitsup-Paani, Igalikumi Kujallermi Igalikumilu eqqakkanik katersisoqarpoq.