Eqqartuussisooqataasut eqqartuussinermi pingaaruteqarnerat

Sapaatip-akunneri tamaasa nuna tamakkerlugu eqqartuussivinni eqqartuussisoqartarpoq. Eqqartuussisut aalajangersimasunik eqqartuussigaangata eqqartuussisooqataasunik taaneqartartut eqqartuussisut ikiortarpaat.

Eqqartuussisut ilaat eqqartuussinerup nalaani napparsimalerpat, eqqartuussineq tamarmi ullormut allamut kinguartinneqassaaq, eqqartuussisorluunniit taarserneqartariaqarpat eqqartuussineq aallartinneqaqqissaaq.

Assersuutigalugu angutit inuusuttut pingasut Sisimiuni pisunut assigiinngitsunut 15-inut unnerluutigineqartut eqqartuunneqarneranni eqqartuussisooqataasup aappaa eqqartuussinermi meriartulerluni napparsimmaviliaanneqarmat, eqqartuussineq aggustimut kinguartinneqarpoq.

Kikkut taamaaliorsinnaappat?

Innuttaasut nalinginnaasut, kommunimi eqqartuussiviit ataatsimut atassuteqarfianni najugallit, assigiinngitsunik ilinniagaqarsimasut suliffillit eqqartuussisunngortinneqarsinnaapput.

Taamaattorli inatsisartunut ilaasortaaguit, politiini atorfeqaruit, pinerluuteqarsimasunut inissiisarfimmi sulisuuguit eqqartuussissuserisuuguilluunniit eqqartuussisooqataasutut sulisinnaanngilatit.

Eqqartuussisunngortussamut piumasaqaatit:

-Kalaallit Nunaanni najugaqarnissaq

-18-ileereersimanissaq

-2026-mi 70-iliinnginnermi

-Tusaamanerlugaassanngilaq, tassa pinerluttoqarsimatillugu eqqartuussaasimassanngilaq.

Nunatsinni Eqqartuussivimmi eqqartuussisup innersuussinera tunngavigalugu eqqartuussivinni eqqartuussisooqataasut kommunalbestyrelsimit toqqarneqartarput. Nunatsinni Eqqartuussivimmi Nunattalu Eqqartuussisuuneqarfiani eqqartuusseqataasut Inatsisartut toqqartarpaat, Nunatsinni Eqqartuussivimmi eqqartuussisup aamma Nunatta Eqqartuussisuuneqarfianiit innersuussinerit tunngavigalugit. 

Maannakkut eqqartuussisooqataasut piffissami 2022-miit 2025-mut toqqarneqareerput, eqqartuussisooqataasussallu ukiuni sisamakkaani toqqarneqartarput. Sermersuup Eqqartuussiviani, Qeqqata Eqqartuussiviani, Kujataata Eqqartuussiviani aamma Qaasuitsup Eqqartuussiviani nunatsinni eqqartuussisoqartarpoq. Eqqartuussiviit immikkoortortaqarfiusut saniatigut aamma Nunatta Eqqartuussisuuneqarfia aamma Nunatsinni Eqqartuussivik immikkoortortaqarfeqarput.

Eqqartuussivimmi suliassanngortitsinerit

Pinerluttulerinermi suliani unnerluussisup aalajangersimasumik pineqaatissiisoqarnissaanik piumasaqarnerani, pineqartorluunniit akiligassiinermit sakkortunerusumik pineqaatissinneqarnissaa unnerluussisumit kissaatigineqaraangat, eqqartuussisooqataasut eqqartuussisut ikiortarpaat . Suliani tamani eqqartuussisooqataasut marluk eqqartuussisorlu ataaseq peqataasarput.

Eqqartuussisooqataasut pisuusutut pinngitsuutinneqartutullu aalajangiisartut eqqartuussisunut assingusumik aalajangiisarsinnaapput. Suliat amerlanerit ullup affaaniit ulloq ataatsimut suliarineqartarput, sulialli ilaat ulluni arlalinni suliarineqartarlutik. Eqqartuussisut ullormut eqqartuussivimmiinnerminnut akissarsisinneqartarput. Ukiup ataatsip ingerlanerani nalinginnaasumik sisamariarlutik tallimariarlutilluunniit eqqartuussisooqataatinneqartarput, ilaannikkulli amerlanerusinnaallutik.

Eqqartuussisoq qanimut suleqatigineqartarpoq

Eqqartuussivimmi suliap aallartinnginnerani eqqartuussisooqataasut eqqartuussisorlu inimi immikkoortumi ataatsimeeqatigiissapput, eqqartuussinerlu naatsumik eqqartuussisooqataasunut  eqqartuussisup oqaluttuarissavaa. Eqqartuussinermi uppernarsaatit tusareerlugit eqqartuussisooqataasut eqqartuussisorlu immikkoortumut uteqqissapput, unnerluutigineqartorlu pisuunersoq qanorlu pineqaatissinneqartariaqarnersoq eqqartorlugu.

Eqqartuussisooqataasut eqqartuussinermi tusarnaaqqissaartariaqarput, eqqartuunneqartullu tamaasa tusaaniartariaqarpaat. Eqqortumik naleqquttumillu aalajangiisariaqarput. Kalaallit tamarmik naapertuilluartutut isigisaat tunngavigalugit eqqartuussinerit aalajangiiffigineqartarnissaannut eqqartuussisooqataasut peqataasariaqarput. Eqqartuussisut inuiaqatigiinni nalinginnaasumik isumaqarnermut sinniisuusariaqarput, aamma kalaallit amerlanersaannut sinniisuusariaqarput.

Eqqartuussisutut ullormut nalunaaquttap-akunneri sisamat tikillugit suligaanni 700 koruuninik akissarsitinneqartarput, nalunaaquttap-akunneri sisamat sinnerlugit suligaanni 1100 koruuninik akissarsisoqarsinnaavoq.

Eqqartuussivimmit nalunaarutigineqareerpat Namminersorlutik Oqartussat akissarsiassaq akilertarpaat.