Professorip Ask Elklitip tarnip pissusiinik misissueqqissaarnerni
atorneqartartut amerlasuut aamma angajoqqaatut piginnaanissanik misissuinermi
misissueqqissaarutit toqqarneqartarnerisa naleqqutinnginnerat
isornartorsiormagu eqqartuussissuserisoq Jeanette Gjørret tupaallanngilaq.
– Tupigusuutiginngilluinnarpara psykologit misissuutinik Danmarkimi
atorneqarsinnaasutut akuerisaanngitsunik kiisalu misissuutinik, soorlu
Rorschachip assinik ilusilersukkanik misissuutaanik, ilisimasalinniit
iluarineqanngitsunik atuisarmata.
Professorip Ask Elklitip tarnip pissusiinik misissueqqissaarnerni
atorneqartartut amerlasuut aamma angajoqqaatut piginnaanissanik misissuinermi
misissueqqissaarutit toqqarneqartarnerisa naleqqutinnginnerat
isornartorsiormagu eqqartuussissuserisoq Jeanette Gjørret tupaallanngilaq.
– Tupigusuutiginngilluinnarpara psykologit misissuutinik Danmarkimi
atorneqarsinnaasutut akuerisaanngitsunik kiisalu misissuutinik, soorlu
Rorschachip assinik ilusilersukkanik misissuutaanik, ilisimasalinniit
iluarineqanngitsunik atuisarmata.
- Qanittukkut suliaqarninni tarnip pissusaanik
ilisimasallip misissuut taannarpiaq atorsimavaa, naak Isumaginninnermut
Aqutsisoqarfiup misissuut taanna angajoqqaatut piginnaanermut tunngatillugu
paasissutissiisinnaanngitsoq misissuutinillu allanik ilalerneqartassasoq erseqqissumik
oqaatiginikuugaluaraa. Tarnip pissusaanik ilisimasallit misissuutinik
nalinginnaq atuisartut takusarpagut, Jeanette Gjørret, kalaallinut
angajoqqaanut arlalinnut meeqqaminnik angerlarsimaffimmut
inissitsitertitsisimasunut sinniisuusoq oqarpoq.
Suliaqarfik eqqarsaatigeqqinneqartariaqartoq
Jeanette Gjørret naapertorlugu tarnip pissusaanik ilisimasallit
misissuutinik taamungaannaq toqqaagaangata tarnip pissusaanillu ilisimasallit
kiisalu sullissisut allat inernerit atuaraangatigit ajornartorsiutit
pilersarput.
– Tarnip pissusaanik ilisimasallit arlallit misissuutinik atuisut
atuinissamut ilinniarsimanngillat, sullissinermillu suliallit avataaneersut,
soorlu Meeqqanut Inuusuttunullu Ataatsimiititaliameersut Isumaginninnermullu
Nakkutilliisoqarfimmeersut misissuutit apeqquserneq ajorpaat. Taamaammat
angajoqqaatut piginnaasanik misissuinerit pingaartinneqaqisut inatsisitigut
illersornissamut tunngatillugu ajornartorsiutaangaatsiarput.
Eqqartuussissuserisoq naapertorlugu suliaqarfik tamarmi
nalilersoqqinneqartariaqarpoq.
– Angajoqqaat misissuiffigineqarnissaminnut ilerasungaatsiartarnerat aamma
ajornartorsiutaavoq, angajoqqaallu tarnip pissusaanik ilisimasallit sorliit
angajoqqaanik sullisserusuppiartannginnersut aamma ilisimasarpaat. Angajoqqaat siunissaat taamungaannaq misissuinermit aalajangerneqartarnera
ajorluinnarpoq.
Tukak taamungaannarnerlu
Soqutigisaqaqatigiinni Sila 360-imi suliat arlallit
naammagittaalliuuteqartarfinni assigiinngitsuni soorlu Danmarkimi
Naammagittaalliuteqarnermut Aqutsisoqarfimmi suliarineqartartut
malinnaavigineqarput, paasineqarporlu tarnip pissusaanik misissuutit atorneqarsinnaassusaat sakkortuumik akerlilersorneqarpoq.
– Tamanna isumassaqanngilluinnarpoq, misissuinernilu kulturimut
attuumassuteqarsinnaasunik suliaqarnermi suliaqartuni innuttaasut inatsisitigut
isumannaatsuunissaanik eqqortumillu pineqarnissaannik annikitsuinnarmilluunniit
qulakkeerinnittussaraluani tukalluinnarlunilu taamungaannartumik
sulisoqarpoq. Silassorissusermik misissuinermi inernerit
appasinnerat Meeqqanut Inuusuttunullu Ataatsimiititaliap
Naammagittaalliuuteqarnermullu aqutsisoqarfiup aalajangiinerini
ersersinneqartarnerat ilisarisinnaavarput. Oqartussat naliliinerminni
tunngavilersuutaat tarnip pissusaanik ilisimasallip misissuineranut ilaasut
apeqquserneqanngisaannarput. Silassorissusermillu misissuinermi inernerit
appasikkaangata ilikkarsinnaanermik ajornakusoortitsisoqartartoq nalilerneqartarmat
tamanna angajoqqaat ineriartornissaminnut periarfissaat pillugit naliliinermi
ilanngunneqartarpoq. Tamanna ilungersunarluinnarpoq, tunngavilersuummi taanna
kalaaliaqqanik pinngitsaaliilluni meerarsianngortitsinermi atorneqartarpoq,
Sila 360-imi siulittaasoq Tina Naamansen oqarpoq, taassumalu oqartussat
naammagittaalliuteqartarfiillu suliap aallaavia paasinngiivillugu
sullissisarnerat oqartussaniit sumiginnaanerusutut taavaa.
– Suliat atuaraanni suliaqarfimmi paatsiveerusimaarneq
naleqqutinngitsumillu aalajangiisoqartarnera atuuttoq sulinerlu
ingerlatiinnarniarlugu periarfissat nalorninartullit atorneqartartut
paasineqarsinnaavoq. Aallaqqaataaniilli oqariartuutigisarput uteqqiinnarsinnaavarput:
Misissuutit atorunnaarlik, inissiinermillu suliat nalilersoqqinneqarlik – aamma kingumut isigalugu, innuttaasut
inatsisitigut isumannaatsuunissaat kisiat eqqarsaatigalugu.
Tina Naamansen naapertorlugu misissuutit arlallit Danmarkimiiluunniit innuttaasunut
atussallugu akuerisaasimannginnerat tupaallannanngilaq:
– Ajortoq ajornerulersippaa. Suleriutsit nalorninartoqartut
attatiinnarneqartariaqanngikkaluarput.
