Eqqartuussivik Watsonimut tunngatillugu suliami aalajangiivoq

Allannguiniarluni ilungersuussisoq Paul Watson suli tigummigallarneqassanersoq Nunatta Eqqartuussiviani sisamanngornermi ullaap tungaani suliarineqarpoq, Danmarkimilu Inatsisinik atortitsinermut ministereqarfiup taanna Japanimut tunniunneqassanersoq aalajangertussaavaa.

Eqqartuussivik sisamanngornermi ullup-qeqqanut suliami aalajangiivoq, tigummigallarneqarneralu septembarip tallimaanut sivitsorneqarpoq.  Taanna tigummigallarneqaannassanersoq septembarip sisamaani eqqartuussivimmi eqqartuussisoqaqqissaaq.

Paul Watsonip aalajangiineq Nunatta Eqqartuussivianut suliareqqitassanngortippaa, maannalu eqqartuussiviup tamanna aalajangiiffigissavaa.

Eqqartuussinerup aallartinnerani tigummigallarneqarnera septembarip 15-iata tungaanut sivitsortariaqartoq unnerluussisussaatitaasoq saqqummiussivoq, Danmarkimi inatsisinik atortitsinermut ministereqarfik Japanimut tunniussinissamik qinnuteqaammik suliarinninnissamut aalajangiinissamullu piffissaqarniassammat.

Tigummigallarneqarneq sivitsorneqanngippat Paul Watson nunamit qimagussinnaasoq unnerluussisussaatitaasoq naliliivoq.

2012-imi Paul Watson Tysklandimi tigummigallarneqarami Japanimut tunniunneqarsinnaanini pissutigalugu qimaasimasoq, eqqartuussinermi paasinarsivoq.

Watsonip illersuisuisa Japanimut tunniussinnginnissaq tunngavilersoreerpaat, Japanimilu oqartussaasut Paul Watsonimut unnerluussutaanni pisuussuteqannginneranik uppernarsaataasoq videoliaq takutikkusullugu illersuisut siumut nalunaarutigereerpaat.

Videoliaq itigartinneqarpoq

Unnerluutiginnissutit 2010-mi Sikuiuitsumi kujallermi pisimasumut tunngapput.

Videolialli takutinneqarnissaa eqqartuussisup akueriumanngilaa.

Videoliap allanngortiterneqarsimanerata paasineqarsinnaannginnera unnerluussisussaatitaasut videoliamik takutitsiumannginnerinut tunngavilersuutaavoq.

Paul Watson illersuisuminit killisiorneqarnermini ilaatigut oqaluttuarpoq arfanniat Australiami politiinut nalunaarutiginiarsimallugit, 2010-milu pisumi eqqaanneqarlunilu umiarsuaa ajoquserneqarsimasoq.

Watson inuttanilu arfannianut syremik atuisimasut, inuttallu ilaat 24-nik ukiulik ajoqusersimasoq, Japanip tunniussinissamik qinnuteqaataani allassimasoq eqqartuussinermi paasinarsivoq.

Illersuisoq: Japanip Kalaallit Nunaat atornerluppaa

Akerlianilli Paul Watsonip illersuisua Jonas Christoffersen isumaqarpoq suliami pinerluttoq naammattumik peqqarniitsumik ajortuliorsimanngitsoq, tamannali politikkikkut aalajangiinerusoq:

- Suliaq politikkimut tunngassuteqarpoq, Japanillu Watson parnaarussaatinniarlugu Kalaallit Nunaat atornerluppaa, ilaatigut Jonas Christoffersen oqarpoq.

Tigummigallarneqaannassappat immikkut pineqarnissaa illersuisuata piumasaraa, Paul Watsonip "ulorianartuunnginneranut" innersuussilluni.

- Pinngitsuulluinnarpunga, Japanimiunuku akiniaaniartut, Watson nammineq oqarpoq.

Watson nalinginnaasumik atugaqarluni, illersuisup oqarneratut akunnittarfimmi pinnani, tigummigallarneqartussaasoq eqqartuussivik aalajangerpoq.