Erik Jensen: Arnat 15-it spiralilerneqarsimasut taarsiivigineqarsinnaapput
Danmarkimi naalagaaffiup spiralilersuisimaneq pillugu misissuineq utaqqeqqaarniaraa, Kalaallit Nunaat arnanut arlalinnut 300.000 koruuninik maanna taarsiissuteqarniarpoq.
- Pingaarnerpaavoq arnanut utoqqatserinissaq. Maanna taamaaliussaagut nassuerutigalugulu, pineqartut akuerineqarsinnaanngitsumik pineqarsimasut, oqarpoq naalakkersuisoq Erik Jensen.
Assi: Leiff Josefsen
Kalaallit arnat 15-it 1991-ip kingorna, tassa Kalaallit Nunaata peqqinnissaqarfimmut akisussaaffik Danmarkimit tigunerata kingorna, akuersissuteqaratik spiralilerneqarsimasut tamarmik immikkut 300.000 koruuninik taarsiiffigineqarnissartik qilanaarisinnaavaat.
Erik Jensen, aningaasaqarnermut naalakkersuisoq Siumumilu siulittaasoq, KNR-imut oqarpoq.
- Pingaarnertut utoqqatserfigineqarlutik taamaaliortoqarsimaneranillu akuersaarneqarsinnaanngilluinnartumik iliuuseqartoqarsimaneranik takutitsiviunissaa pingaarnerpaajuvoq, KNR-imut oqarpoq.
Kalaallit Nunaanni arnat 1991 sioqqullugu spiralimik naartunaveersaaserneqarsimasut suli taarsiiffigineqarsimanngillat.
1960-imiit 1991-imut spiralilersuinikuuneq qanoq annertutigisimaneranik misissuineq 2025-mi naammassineqartussaq danskit naalagaaffiannit utaqqineqarpoq.
Danmarkip Kalaallit Nunaatalu pisimasoq qulaajaaffigineqassasoq 2023-mi isumaqatigiissutigaat.
Arnat 143-t 1960-ikkunni 1970-ikkunnilu Kalaallit Nunaanni qallunaanit nakorsanit spiralilersorneqarsimasut danskit naalagaaffiat eqqartuussivimmut suliassanngortippaat.
Taakku tamarmik immikkut 300.000 koruuninik taarsiiffigitinnissamik piumasaqarput, tassa katillugit 43 millionit koruunit.
Tamatumali saniatigut Kalaallit Nunaat nammineq aamma paasiniaavoq, tassanilu arnat 15-it akuersissuteqaratik spiralilerneqarsimasut paasineqarlutik. Arnat taakkunannga amerlanerusut spiralilerneqarsimappata Naalakkersuisut taarsiinissamut piareersimasut Erik Jensen oqarpoq.
/ritzau/
