Erik Jensenip Donald Trump Jr. naapilinnginnerarpaa

Erik Jensenip (S) apersorneqarnermini oqaatigaa, Naalakkersuisut allat ilagalugit ullumikkut marlunngornermi Københavnilialerlutik. Tassani qangali pilersaarutaareersumik ataatsimiigialernerarpoq.

Donald Trumpip erneranik tikeraartoqalerneranik nutaarsiassat saqqummiussinerat ilumuunnginnerarpaa.

Taamaattumik Donald Trump ernerata nunatsinnut tikeraarnerani ataatsimeeqatiginissaanik isumaliutersuutit tamaasa ilumuunnginnerarpai.

- Naluara sooq KNR-i taama nutaarsiassiinersoq, aamma kikkut isertortumik taama oqalussimanersut. Oqaatigisinnaavara naapinnissaanut pilersaaruteqannginnama, Erik Jensen, Siumut siulittaasuat oqarpoq.

Nunatsinnut tikilluaqqusineq

Tikeraarnerli pimoorunneqartariaqartoq isumaqarfigaa.

- Tikeraartussaasimavoq. Kikkulluunniit tikeraaruttut tikilluaqqusaapput, piumasaqaatigut naapertorneqarpata. Aamma Trumpikkut tikilluaqqusaapput. 

- Kikkut tamarmik nunatsinnut tikilluaqqusaapput, aamma Trump. Præsidentinngorlaap ernerata, aamma nammineq siunnersortaata, nunatsinnut soqutiginninnera Kalaallit Nunaannut pimoorussinermut ersiutaavoq.

- Kisianni erseqqissarusuppara, nunarput tuniniagaanngilaq aamma tuniniagaalinngisaannassaaq.

Siumut nukittorsaanissamut pilersaaruteqareersoq

Erik Jensenip oqaasii naapertorlugit tikeraartoqarnissamut pilersaaruteqarput, tassani tikeraartoqarnermi nunatsinnut nukittorsaataasussat oqaluuserineqassallutik, soorlu niuernikkut, ilinniartitaanikkut, aatsitassarsiornikkut illersornissakkullu.

-  Nunat allat nunatsinnut soqutignninninerat atorluartariaqarparput, qanoruna atorluarsinnaagigut?

Nunatta namminiilivinnissaanut USA ikiuussinnaava?

Nunatta namminiilivinnissaanut USA sunneeqataasinnaanersoq Erik Jensen aperineqarami ima akivoq:

- Apeqquterujussuaq, akiuminaatsippara, isumaqarpunga nunat allat suulluunniit suleqatigisinnaasagut aporfiunavianngitsut.