Erniat appariarnerat illuutilinnut nutaarsiatsialaavoq
Piffissami kingullermi ineqarnermut taarsigassarsiat erniaasa appariarnerat pissutigalugu inuit ilaasa taarsigassarsiatik realkreditinngorlugit nuussinnaavaat, taamaalillutik akikinnerusumik inissiaminniissinnaaniassagamik, Grønlandsbanken paasissutissiivoq.
Namminerisamik illoqarnissamik takorluugaqartut erniat qanittukkut appariarnerat nuannaarutigisinnaavaat, illusiniarnermini taarsigassarsinissaq akikinnerulermat.
Foto: Grønlandsbanken
Realkreditimut taarsigassarsiat erniaat 4 procentimit 3,5 procentimut appartinneqarmata, illusineq akikinnerulerpoq.
Aammattaaq aningaasaleeqqiinermi erniat, ineqarnermut taarsigassarsiaakkajuttut, appariarujussuarsimapput, Grønlandsbanken tusagassiuutinut nalunaarummi ilisimatitsivoq.
- Tamanna illumik pisinermut taarsigassarsinerup katillugu aningaasalersornerata ukioq ataatsip matuma siornamut sanilliullugu akikinnerussaaq, Jimmi Johannesen Grønlandsbankenimi Sullissisunut pisortaq oqarpoq, nangillunilu:
- Ukiup ataatsip matuma siorna assersuutigalugu illumik 2,8 mio. kr.-ilimmik pisinermi aningaasaliineq, ullumikkut ernianut sanilliullugu qaammammut akileraarutit sioqqullugit 1.500 kr.-it missaannik annertuneruvoq. Piffissamittaaq matumani siumut naatsorsuinerit takutippaat, erniat ukiumi tulliuttumi aggersumi appariaqqissinnaasut, tamannali allanngupiloorsinnaavoq.
Taarsigassarsianik appartitsineq
5 imaluunniit 6%-imik ernialimmik realkreditimut taarsigassarsiaqaraanni, taarsigassarsianik realkreditimut nuussinermi taarsigassarsianut qaammammut akikinnerusumik akiliisalertoqarsinnaavoq.
Missingersuutinili erserpoq piffissami aggersumi erniat appariartuinnarnissaat ilimagineqartoq, taamaattumik apeqqutaavoq maannakkut appartitsissanerluni imaluunniit taarsigassarsiat allatut inissinnissaat sioqqullugu erniat appariartuinnarnissaat neriuutigineqassanersoq, erniammi appaqqippata qaammammut akiliutip sipaarutigineqarsinnaanera annertunerulissammat.
Ineqarnermut taarsigassarsiat nuunnissaat imminut akilersinnaanersoq illuutillit bankertik aqqutigalugu nalilersortissinnaavaat, nuussinermummi atatillugu ataasiaannarluni aningaasartuutit arlaqarmata.
