KL

DK

KALAALLIT NUNAATA AATSITASSAATAI

EU-mit USA-millu pilerigineqarnerat annertusiartortoq

Nunarsuaq tamakkerlugu Kalaallit Nunaat soqutigineqarpoq, isigut kajortut tassunga pissutaagunanngillat, nunarpulli pisariaqartinneqarluinnartunik aatsitassaqarmat. Qanillattornerpaat tassaapput EU aamma USA, taakku salliullutik pisinnaatitaaffeqarnissaminnik kissaateqaramik. Qanillattornerallumi pissutaalluni taakku, tassa EU aamma USA nunatta karseerannguanut ikioraanissaminnut piareersimalluinnarput. Taamaattorli Naalakkersuisut salliutitsilluni pisinnaatitaaffeqartitsinissamut tunniussinngillat, aatsitassanut Naalakkersuisoq, Naaja H. Nathanielsen (IA) taamak erseqqissaavoq.

EU-Kommissionip siulittaasua Ursula von der Leyen tallimanngornermi nunatsinnut tikeraarpoq. Ilaatigut 700 millionit koruuninik nalilinnik marlunnik nunatsinnut isumaqatigiissummik atsiugaqassalluni. Millionerpassuit taakku ilaat 168 millionit koruunit nukissiuuteqarnermut aatsitassanullu pingaarutilinnut ujarassiuutinut, avatangiisinik illersuinermut ilisimatusarnermullu aningaasaliissutigineqassapput, Kalaallit Nunaata aningaasaqarnerata assigiinngisitaarnerulernissaanut aammalu inuussutissarsiutitigut pingaarutilinnik soorlu brintimik minguitsumik ineriartortitsinermut ikiuutaassallutik.
Jensine Berthelsen
Tusagassiortoq / Journalist
Saqqummersinneqarpoq

Aatsitassanut Naalakkersuisoq, Naaja H. Nathanielsen (IA), EU-mi USA-milu soqutiginninnerat aammalu salliunneqarnissaminnik piumasaqaateqartutut pissuseqarnerat Kalaallit Nunaata aatsitassai pingaarutillit pillugit Canadami ukiumoortumik aaqqissuussami "Prospectors & Developers Association of Canada" (PDAC)-mi, Greenland Day-mi, marsip sisamaani pisumi peqataaffigisaminni tatigisimaneqartutut misigisimalersinneqanngilaq.

- Misigivarput EU-mi USA-miillu aatsitassaativut soqutigineqarluartut, taakkulu assorsuaq soqutiginnipput pissarsiarerusullugit. Assersuutigalugu EU-p aatsitassat pisariaqartitami 10 procentii kisiisa pigai, taamaattumik sinneruttut 90 procentit nunarsuarmi allani isumaqatigiissusiornikkut pissarsiariniartariaqartarpai, taamaammallu nunanik amerlasuunik pilersuisussaminik isumaqatigiissuteqarpoq, Kalaallit Nunaallu tassaavoq isumaqatigiissuteqarfigineqartoq 16-nissaraat. USA-milu aatsitassanik pingaarutilinnik pilersorneqarnerminik ajornartorsiuteqarpoq, taamaattumik EU-mik USA-millu oqaloqatiginnittarpugut, Naaja H. Nathanielsen Sermitsiaq-mut oqaluttuarpoq.

- Aatsitassaatigut iluaqutigerusukkunikkit nunatsinnut aningaasaliisariaqarput 

Taamaattorli aatsitassarsiornermik ingerlataqarneq kikkunnut tamanut ammasuuvoq, tassani ingerlatseqatigiffiit mikinerusut angisuullu suliniutinik pilersitsisarput taakkulu aningaasaliisartunik soqutiginnilersitsiniarlutik. Assersuutigalugu Tanbreez-ip piiaasinnaanermut akuersissutaateqarluni ukiut arlallit ingerlaneranni uninngareerluni suli uninngavoq, ingerlatseqatigiiffik aningaasaliisussarsiornermi ajornartorsiuteqarmat.

EU-mi USA-lu aatsitassaativut pillugit salliorusukkunik, taava aallartissinnaapput suliniutinut aningaasaliissuteqarnikkut, Naalakkersuisut isumaqarput:

- EU-mut USA-mullu nalunaarutigisarput tassaavoq, suliniutit soqutiginaateqartut aningaasaliiffigissagaat, tassami nunatsinni aningaasaqarnikkut ima nukittutiginngilagut aningaasaleeriaannaalluta. Suliniutinut sumiiffinni inissisimasuni ineriartortitsinissamut periarfissaqanngilagut, aamma nunatta karsianit toqqaannartumik aningaasaliissuteqarsinnaanngilagut, taamaattumik EU-mut USA-mulluunniit kaammattuutigisarparput nukiit katersussagaat suliniutinullu Kalaallit Nunaanni peqataaneq taamaaliornikkut qulakkeersinnaagaat, Nathanielsen oqarpoq.

Kalaallit Nunaata aatsitassaataanut salliuniuttoqarsinnaanngilaq

Kisianni maanna Amerikap aamma EU-p Kalaallit Nunaannut koruuninik millionilikkaanik tunissuteqarneratigut, isumaqartoqarsinnaavoq taakku aatsitassat soqutigineqarluartut pillugit salliunneqarnissaminnik pisinnaatitaaffeqalersimasut, kisianni Kalaallit Nunaata pisuussutaanut salliutinneqarnissaminnik pisinnaatitaaffeqanngillat:

- Naamik! sumulluunniit neriorsuuteqarnata aamma kinaluunniit salliusussatut  pisinnaatitaaffilinngilarput, kisianni isumaqatigiissuteqarnissamut ammavugut, soorlu Amerikap Nunaata peqatigalugu isumaqatigiissuteqarpugut taakku nunap iluata pissusaanik misissuinernut aningaasaliissuteqassasut, taamaalillunilu nunap sannaa pillugu paasissutissanik USA-mut pissarsissutaassaaq, kisianni neriorsuuteqanngilagut akuersissutinik, aamma nunatsinni inatsisitigut maleruagassat malinneqartariaqarmata, Aatsitassanut Naalakkersuisoq, Naaja H. Nathanielsen (IA).

Aamma Kalaallit Nunaat aamma EU-p  "Aatsitassat pisariaqartinneqartut pillugit isumaqatigiissut", novembarimi 2023-mi atsioqatigiissutigineqartoq, takutippaa ataatsimoorussamik isumaqatigiissut qulakkeerniarlugu piujuartitsisumik ineriartortitsinermi aamma Kalaallit Nunaat inissisimalerlugu Europap aatsitassanik pilersuisutut inissisimassasoq. Naaja H. Nathanielsen Sermitsiaq-mut uppernarsaavoq atsioqatigiissut qanoq piviusunngortinneqassanersoq pillugu pilersaarutit tigussaasut qanittumi saqqummiunneqassasut.

inuiaqatigiit samfund

ATORFIIT Se alle jobs

Powered by Labrador CMS