EU-p nunanut allanut tunngasunut pisortaa piumasaqarpoq EU aamma Ukraine eqqissinissamut isumaqatigiissutissamut peqataassasut
Donald Trumpip Vladimir Putinilu naapinnissaat sioqqullugu EU aamma ukrainemiut peqataatinneqaratik Ukraine pillugu isumaqatigiissuteqartoqarnissaa Kaja Kallasip akerlilerpaa.
EU-p nunanut allanut tunngasunut pisortaa, Kaja Kallas, ataasinngornermi nunat ilaasortat nunanut allanut tunngasunut naalakkersuisui nukingiussamik ataatsimiigiaqqusissavai.
Asseq toqqorsivimmit: Yves Herman/Reuters
Ukrainemi sorsunnersuup unitsinneqarnissaa pillugu USA-p Rusland-llu akornanni isumaqatigiissutigisassaanni Ukraine EU-lu peqataatinneqassapput.
Taama oqarpoq EU-p nunanut allanut tunngasunut pisortaa, Kaja Kallas, Reuters-imut oqaaseqarluni.
- USA pissaaneqaarpoq Rusland pinngitsaalissallugu isumaqatigiinniarnernut pimoorussanut ingerlatseqqullugu. USA-p Rusland-llu akornanni isumaqatigiissutaajumaartussat suulluunniit pillugit Ukraine EU-lu peqataatinneqassapput, tassami Ukrainemi Europalu tamakkerlugu isumannaatsuuneranut tunngassuteqarpoq, taanna oqarpoq.
Kaja Kallas nangippoq, ataasinngornermi EU-p nunanut allanut tunngasunut ministerii nukingiussamik ataatsimiigiaqquniarlugit.
Ataatsimiinnermi nunat ataatsimoorlutik "allornerit tulliit" EU-p Ukrainellu tungaanit oqaluuserissavaat.
- Eqqissineq attanneqarsinnaasoq naapertuilluartorlu anguniarlugit sulinitsinni, nunat tamalaat innuttaminnut pisussaaffii pillugit inatsisit ersaripput. Sumiiffiit tiguarneqarsimasut Ukraine-p tamaasa pigai, Kallas nangippoq.
Taamatuttaaq Gaza-mi sorsunneq aamma nunanut allanut tunngasunut ministerit ataatsimiinneranni oqaluuserineqassaaq, oqaatigineqarpoq.
EU-p nunanut allanut tunngasunut pisortaa pinasuartumik ataatsimiinnissamik nalunaaruteqarpoq, USA-p præsidentiata, Donald Trump-ip, arfininngornermi nalunaarutigereermagu, Ruslandip præsidentia, Vladimir Putin, aggustip 15-iani naapissallugu.
Naapinnermi taakku marluk oqaluuserissavaat, qanoq Ruslandip ukiuni pingasuni affarmilu Ukrainemi sorsunnera unitsinneqarsinnaanersoq.
Aqutsisut taakku marluk naapinnissaat 2019-imili aatsaat naapeqqissapput.
Trumpip Putinillu akornanni ataatsimiinneq, Amerikap naalagaaffiisa ilaanni, ingerlanneqassaaq Alaskami. Sumiiffik Ruslandip 1867-imi USA-mut tunivaa.
Trumpip oqaatiginikuuaa isumaqatigiissut nunat marluk nunaminertamik paarlaasseqatigiinnermik imaqarsinnaasoq.
Taamaattorli Ukrainemi nunaminertamik tunineqarsinnaaneq eqqarsaatigineqarsinnaanngilaq. Tamanna Ukrainemi præsidentip, Volodymyr Zelenskyj, X-imi allakkamini naqissuserpaa.
- Ukrainemi nunaminertanut apeqqut pillugu akissut Ukrainemi inatsit tunngaviusumi allassimavoq. Tamanna allanngortinneqarsinnaanngilaq - aamma taamaaliortoqarsinnaanngilaq.
