Floridami ulussaarsuup takkutinnginnerani qimaanissamut periarfissaq naalerpoq

Floridap kitaani innuttaasut qimarrapput. Imaluunniit amerlanerit taamaaliortarput.

Allat oqartussaasut aarlerisaarutaat malinnagit oqquiffissarsiorput. Illersuusiorlutillu.

Ulussaarsuaq Milton, sakkortoqalunilu anorersuaqarferujussuusoq, naatsorsuutigineqarpoq Floridap kiterpasissuanut sumiiffimmi nalunaaqutaq naapertorlugu pingasunngornermi unnukkut unnuakkulluunniit apuutissasoq naatsorsuutigineqarpoq.

Sumiiffimmi pineqartumi oqartussaasut suli ulappupput innuttaasut qimaanissaannik kaammattorlugit.

Anorersuaq Milton pingasunngornermi sakkortussusilerneqarpoq 5-mik, tassa anorersuit sakkortunersaannik - ullulli ilaa 4-mik sakkortussusilerneqarluni.

Kisianni sakkukilliliisoqaraluartorluunniit suli sakkortoorujussuussaaq, tassa anoraasuarsuit malerujussuillu Floridap kiterpasissuanut apuuttussaasut ilisimaneqarmat.

- Anorersuaq matumani pineqartoq inuunermik toqumillu kinguneqarsinnaavoq, USA-p præsidentia, Joe Biden, marlunngornermi ilisimatitsereerpoq.

- Massakkut qimarngutsitsigitsi, massakkut, massakkut.

Pisut ajornerulersillugit, Milton sioqqullugu anorersuaq alla Helene, sapaatip akunnerata marlussuit matuma siorna USA-p kujataata kitaanik eqqueqqammiinnartorlu aammalu qaangiuteqqammiinnartoq Milton maanna apuuttussanngorpoq.

Anorersuup Helenep aqqusaarnermini qarsutsinernik pilersitsivoq, maannalu tamanna sumiiffimmi tassanerpiaq, Floridap kitaani, aamma maannakkut aqqusaarneqartussanngoqqippoq.

Aamma North Carolina allallu sumiiffiit eqqugaapput. Inuit 230-t sinnerlugit Helene-p kingunerisaanik toqusimasut nalunaarutigineqarnikuupput.

- Kingullermik qarsutsineqarmat qitera tikillugu erngup/immap iluaniippunga. Taamaattumik manna siusinnerusukkut iliuuseqarusuppunga. Ilaquttakka katersoriarlugit qimaaniarpunga, Emmanuel Parks, palasi 36-inik ukiulik oqaluttuarpoq.

Kisianni aamma qimaaniarnermut piffissaq sivikitsuararsuanngorpoq.

Jane Castorip, Tampami borgmesterip, illoqarfimmi innuttaasut 400.000-it missaanniittut paatsuugassaanngitsumik mianersoqqussuteqarfigai:

- Sumiiffinni navianartorsiorfiusuni qimaasariaqaraluarlusi najuutiinnassagussi, toqussaasi.

Pingasunngornermi danskit nalunaaqutaat malillugu ualikkut Milton 400 kilometerinik ungasissuseqarluni Tampap kujasissuaniippoq.

Tassani anorersuarujussuit nalunaaquttap akunneranut 249 kilometerinik sakkortussuseqarput, taama USA-p Ulussaarsuarnik Nakkutilliisoqarfianit (NHC) oqaatigineqarpoq.

- Anorersuarujussuit Floridap kitaani sinerissap qanittuani sakkortusiartuinnassapput, NHC-mit oqaatigineqarpoq.

- Piareersarnerit, tassunga ilanngullugit qimagussuinerit, sukkanerusumik ingerlanneqartariaqarput.

Sumiiffinni tamani innuttaasut tamarmik siunnersuut malissagaat naatsorsuutigineqanngilaq.

75-inik ukiulik John Gomez Chicagomit Floridamut angerlarsimaffimminik isumaginninniarluni apuussimavoq.

- Uanga isumaqarpunga angerlarsimaannassaguma pitsaanerussasoq, arlaannimmi pisoqaratarsinnaavoq, taanna oqarpoq.