Kigusiat ulorianarinnaasut Nuummi Qitiusup Kigutileriffiani sulisut kisimeeqatigalugit suliarineqatarput.
Tamanna allallu pissutigalugit nakuusertoqarsinnaanera pinngitsoortinniarlugu iliuuserineqartut naammanngillat, tamannalu suliffimmi atugassarititat pillugit inatsisinik unioqqutitsinerusinnaavoq.
Kigusiat ulorianarinnaasut Nuummi Qitiusup Kigutileriffiani sulisut kisimeeqatigalugit suliarineqatarput.
Tamanna allallu pissutigalugit nakuusertoqarsinnaanera pinngitsoortinniarlugu iliuuserineqartut naammanngillat, tamannalu suliffimmi atugassarititat pillugit inatsisinik unioqqutitsinerusinnaavoq.
Tamanna Kalaallit Nunaanni Sullivinnik Nakkutilliisoqarfiup Qitiusup Kingutileriffianut oktobarip naanerani nakkutilliinermini paasivaa.
Sermitsiamiit allagaatinik takunnissinnaaneq atorlugu Sullivinnik Nakkutilliisoqarfimmit pissarsiarisimasaani atuarneqarsinnaavoq.
Taamaattumik Sullivinnik Nakkutilliisoqarfimmiit nakkutilliiartortoqanngikkaluarluni ajornartorsiutip qanoq aaqqinnissaannut isumaqatigiissusiorfigineqarput.
Neqeroorut nunap immikkoortortaqarfiani kigutilerisuunerup Sabina Gabrielsen Eugeniusip oktobarip 30-ani akuersissutigaa.
Qimaaffissaqanngitsoq
Sulisut passussinerminni nakuuserfigineqarsinnaanerat naammattumik pinaveersaartinniarlugu iliuuseqartoqannginnera pissutigalugu, Sullivinnik Nakkutilliisoqarfimmiit pissutsit qulingiluat maluginiarneqarput.
Kigutileriffiliartut ataatsimut isigalugit kigusiat kamattut naammagittaalliortulluunniit ajornartorsiutaanerat Sullivinnik Nakkutilliisoqarfimmit naqissuserneqarpoq. Aqutsisut, sulisut suliffimmi atugassarititat pillugit sinniisaat sulisullu arlallit oqaloqatiginerisigut tamanna paasineqarpoq.
Ingammik kigusiat tarnimikkut napparsimasut immikkoortortaqarfinneersut aamma pineqaatissinneqarsimasunut inissiisarfimmeersut tassani pineqarlutik.
Kisutileriffimmi aqutsisut sulisullu kigusiat taakku inimi nalinginnaasumi qimaaffissaqanngitsumi passuttarpaat, amerlanertigullu ualikkut kigusianut nalinginnaasunut piffissarititap kingorna pisarluni.
Peqqinnissaqarfimmi pisortat sulisut isumannaatsuunerat pillugu oqaaseqartinnissaat Sermitsiamit sulissutigaarput.
Sulisut nakkutilliisullu akornanni matut pingasut parnaaqqasut
Nakorsiat pineqaatissinneqarsimasunut inissiisarfimmeersut nakkutilliisunit ilagineqartaraluartut, kigutileriffimmi sulisut taakku qanoq ulorianartiginerannik paasissutissinneqarneq ajorput.
Kigutileritinnerannilu nakkutilliisut sulisunit qanoq pissarsiarineqarsinnaanertik iluamik paasissutissiissutiginagu ini qimattarpaat.
Pineqaatissinneqarsimasut kigutaasa suliarineranni kisimeeqatigineqartarput, aamma inissiisarfimmiikkaluarunilluunniit. Arlaannik susoqassagaluarpat tuugassaminnik tunineqartarput, taakkuli taanna toorunikku nakkutilliisut qanoq sukkatigisumik ornigussinnaanerat ilisimatitsissutigineqarpoq ajorpoq.
Kigutileriffimmi sulisut passussereerlutik nakkutilliisunik aggeqqusigaanganik ammaanneqarnissartik minutsit 20-t angullugit utaqqisinneqartarsinnaasarlutik Sullivinnut Nakkutilliisoqarfimmut ilisimatitsissutigaat. Sulisut nakkutilliisullu akornanni matoqarpoq pingasunik paarnaaqqasunik, matullu taakku akornanni torsuusaqarpoq takkajaanik.
Ajornartorsiut ilisarinngikkaat
Kigutileriffimmi sulisut pinerluuteqarsimasunik sullissinerminni toqqissisimannginnerannik ilisimasaqaratik, Kalaallit Nunaanni pinerluuteqarsimasunik isumaginnittoqarfik ilisimatitsivoq. Taakku allakkatigut Sermitsiamut akissumminni taama ilisimatitsipput.
- Pinerluuteqarsimasunut inissiisarfimmi sulisuni, sullissisut kikkuugaluarpataluunniit isumannaatsuunissaat pingaartingaarparput. Kigusiartitsinermi taamaattumik sillimasoqarnissaanut iliuutsit aalajangersimasut qulakkeerniartarpagut - isertitsivimmi isertitsiviullu avataani, allapput.
Pinerluttunik Isumaginnittoqarfik aamma ilisimatitsivoq qitiusumik kigutileriffimmi sulisut pineqaatissinneqarsimasut sillimanissaannut iliuusissanik ilinniartinneqartartut, qisuariarnissamullu piffissaq sivikitsuinnaq atorneqartartoq. Kigutilerisut pineqaatissiisarfimmiit piaartumik aninissamut piumasaqartarnerat pineqanngitsoq oqaatigineqarpoq.
- Kigutilerisut aamma ilitsersorneqarput pineqaatissinneqarsimasut ataasiakkaat immikkut nalilersorneqarnerat tunngavigalugu paarsisut kigutileriffimmi najuussinnaasartut.
Ajornartorsiutip februaarip aappaata tungaanut aaqqinnissaanut periarfissinneqartut
Sulisut sulinerminni nakuuserfigineqarsinnaanerat naammattumik pinaveersaartinnissaanut kigutileriffik Sullivinnik Nakkutilliisoqarfimmik isumaqatigiissuteqarnikkut kingusinnerpaamik 2026-mi februaarip aappaani pisussaaffilerneqarpoq.
Sullivinnut Nakkutilliisoqarfiup taakkua sulinerminni avatangiisinut tunngasunik ajornartorsiummik aaqqiinissamut ikiorniarlugit ilitsersornissaannut pisussaaffilerluni aamma isumaqatigiissutigaat.
Isumaqatigiissutip atuunnerani Sullivinnik Nakkutilliisoqarfiup pissutsit nakkutigiartoqqissanngilai. Sulisut sulinerminni avatangiisaat pillugu inatsit unioqqutinneqartutut Sullivinnik Nakkutilliisoqarfimmit nalilerneqanngikkaluartorluunniit Qitiusumik Kigutileriviup sulisut avatangiisiinik pitsanngorsaanissamut ajornartorsiutip aaqqiiviginissaanut immikkut iliuuseqartussaassaaq.
