Dronning Margrethep qilalukkat pillugit atuakkiaq 100.000 koruuninik tapiissuteqarfigigaa

Suliniutit qinnuteqartullu 37-t Dronning Margrethep tapiissutaanik tunineqarput. Ilaatigut Pinngortitaleriffik.

Pinngortitaleriffik qilalukkat pillugit atuakkiamut 100.000 koruuninik pissarsivoq.

Tamanna kunngikkormiut nittartagaanni allassimavoq.

Pinngortitaleriffik Kalaallit Nunaanni qilalukkat pillugit 2023-mi atuakkiorpoq, tassanilu Pinngortitaleriffimmit qilalukkat pillugit ilisimasat ukiut 40-t ingerlaneranni katersorneqarsimasut saqqummiunneqarput.

Qilalukkat Pinngortitaleriffiup nakkutilliinerannut ilisimatusarnerannullu ilaapput. Qilalukkat aasaanerani uumaffigisartakkaminni kisinneqartarput, piniarneqarnerilu pillugit paasissutissat, uumassusillit qanoq ittuunerat angalasarnerilu ilanngullugit nakkutigineqartarput.

Qilalukkat timmisartumit, piffissami sivikitsumi sumiiffinni siammasissuni tingisinnaasumit, kisinneqartarput. Kalaallit Nunaata eqqaani qilalukkanik 1981-imiilli kisitsisoqarpoq, sumiiffiillu qilalukkanik amerlasuunik nassaarfigineqartartut tamangajammik ataasiarluni arlaleriarlunilu kisitsiffigineqarnikuupput.

Suliniutinut 3,3 millionit

Dronningip aningaasaateqarfik iluaqutaasumik siunertalik, Dronning Margrethes og Prins Henriks Fond, aqqutigalugu suliniutinut assigiinngitsunut katillugit 3,3 millionit koruunit aningaasaliissutigisimavai.

Aningaasaliisarfiup, ilaatigut dronning Margrethemit, kunngikkormiuni pisortamit Kim Kristensenimit aamma pattattartumit Nikolaj Koppenimit siulersuisuni ilaasortaaffigineqartup, ilaatigut 250.000 koruunit missaat Danmarkip katersugaasivianut aningaasaliissutigisimavai.

Aammattaaq Vejlemuseet 1600-kkunni sorsunnerit pillugit saqqummersitsinissamut 100.000 koruuninik, Museum Jorn annoraassianik eqqumiitsulianik saqqummersitsinissamut 40.000 koruuninik aamma Museum Skanderborg vikingit Fregerslevimeersut pillugit atuakkiornissamut 50.000 koruuninik aningaasaliiffigineqarput.

Aningaasaateqarfiup kulturimut, ilisimatusarnermut innuttaaqatigiinnermullu tunngasut aningaasaliiffigisarpai.

Aningaasat tunniussassat aningaasaateqarfiup siulersuisuisa novembarip 21-ani ataatsimiinneranni aalajangerneqarput.

Aningaasaliissutissanik qinnuteqartoqarsinnaavoq, aammali qinnuteqanngikkaluartulluunniit aningaasaliiffigineqarsinnaapput.