Sermersuumi missingersuutinut isumaqatigiissut: Illoqarfik nammineq ‘illoqarfimmi aqutsisoqalissaaq’ – sullorsuarmut marlunnik aqqutilimmut piareersarnerit pingaarnerpaatinneqarput

Illoqarfiit pingaarnersaanni 2026-mut missingersuutit partiinit tamanit tapersersorneqarluarlutik akuersissutigineqarput.

Isumaqatigiissut suliniutinik aalajangersimasunik arlalinnik, ilaatigut Tunumi Ittoqqortoormiini illoqarfiup pisortaanik atorfimmik pilersitsinissamut aningaasaliisoqarneranik, imaqartoq kommuuni nittartakkamini ilisimatitsivoq.

Kommuuni naapertorlugu illoqarfimmi aqutsisut nutaat sukkanerusumik aalajangiisarnissartik, najukkami neqeroorutinik pitsaanerusumik ataqatigiissaarisarnissartik kommuunillu sullissinerata sumiiffimmi nunap immikkoortuani attaveqaasersuutitigullu unammillernartumi qaninnerulernissaa qulakkiissavaat.

Asfaltilersuineq innuttaasunillu sullissinerup pitsanngorsarneqarnera

Kommuuni ukiut ingerlaneranni Tunumi ineriartortitsinissamik pingaarnersiuinnginnerarlugu sakkortuumik isornartorsiorneqartarpoq, kommuunillu nunap immikkoortuani suliniutit allat marluk aamma erseqqissarpai.

Tasiilami aqquserngit iluarsaanneqarnissaat asfaltilersuinerlu pineqarput, taakku angallannermi isumannaallisaanermi pitsanngorsaataassallutillu Tasiilap nunaqarfiini innuttaasunik sullissineq pitsanngorsarneqassaaq, tassani misileraalluni suliniummi ukiuni marlunni ingerlasussami nunaqarfinni annerni pingasuni sakkussat sulisullu suliaminnut atatillugu iluaqutissaqarnerunissaat qulakkeerneqassaaq.

- Sullissineq aalaakkaanerusoq aamma sulinermi ilungersortoqannginnerunissaa anguniarneqarpoq, innuttaasullu namminneq najugarisaminni sukkanerusumik pitsaanerusumillu siunnersorneqartarnissaat qulakkeerniarneqarluni, kommuuni suliniut pillugu taama allappoq.

Sullorsuarmut marlunnik aqqutitalimmut piareersarneq

Suliniutit allat erseqqissarneqartut tassaapput Qeqertat ineriartortinnissaat kommuunillu Nuummiit Nuussuarmut marlunnik aqqutilimmik sullorsuartaarnissamik misissueqqaarnermut aningaasaliinera.

Suliniut tamanna naalagaaffiup Nuummi umiarsualivimmik alliliinissamut pilersaarutaanut kiisalu kommuunip umiarsualivimmi inuussutissarsiornikkut periarfissanik amerlanerusunik pilersitsinissamik pilersaarutaanut tapertaassaaq.

Naalagaaffik Issittumi Sakkutooqarfiup umiarsuaasa 150 meterisut takitigisumik talittarfissaanik sanaartornissaannut akiliiumaarluni nalunaarpoq. Talittarfik Illersornissaqarfik iligisaaluunniit talittarfimmiinngikkangata sakkutooqarfiup umiarsuarinngisaanit taliffigineqarsinnaassaaq.