FN-imi inuit pisinnaatitaaffii pillugit qullersap Israeli Gazami toqoraajunnaaqqugaa
Volker Türkip Gazami pisut sorsunnermi pinerluttuliornertut inuiannilluunniit pinerluttuliornertut - ajornerusutulluunniit - taavai.
Israeli Gazami inuannik nungusaasutut Naalagaaffiit Peqatigiit misissuisartuisa marlunngornermi nalilerpaa.
Assi: Menahem Kahana/AFP/Ritzau Scanpix
Israelikkut Gazami illoqarfimmi nunakkut saassussinertik, marlunngornerup unnuaani aallartittoq, ingerlaannaq unitsissagaat Naalagaaffiit Peqatigiit inuit pisinnaatitaaffii pillugit immikkoortortaqarfiani pisortap kajumissaarutigaa.
Sorsunnermi pinerluttuliornerit, inuiannut pinerluttuliornerit immaqalu allarpassuit takussutissaqarneruleriartuinnartut oqaatigaa.
- Arnat, meeqqat nerisassaaleqisut inuillu innarluutillit taamatut saassunneqaqqissagaluarpata qanoq atugaqarumaarnerat eqqarsaatigiinnarsinnaavara. Akissutissatuaasoq tassaavoq: Toqoraaneq unitsilli, Naalagaaffiit Peqatigiinni immikkoortortami qullersaq Volker Türk tusagassiortunik katersortitsinermi oqarpoq.
- Palæstinamiut Israelimiullu eqqissinissaq nilliaatigaat. Sorsuttoqarunnaarnissaa kikkut tamarmik kissaatigaat, maannalu pissutsit ajorneruleriartornerat akuerineqarsinnaanngilluinnartoq takuarput, oqarpoq.
- Israeli Gazami sequtserinera naakkittaatsoq unitseqqullugu kajumissaarpara.
Ataatsimiititaliarsuup inuiannik toqoraanertut nalileraa
Israeli Gazami inuiannik nungusaasoq Naalagaaffiit Peqatigiit misissuisartuisa ataatsimiititaliaata marlunngornermi inerniliissutigaa.
Ataatsimiititaliap nalunaarusiaani Israelimi qaffasissumik atorfillit, ilaatigut ministeriuneq Benjamin Netanjahu, taamatut iliuuseqartitsisutut unnerluutigineqarput.
Israelimit taakku “kanngunartuliornertut” nalilerneqarput.
Türkip oqaaseq "inuiannik nungusaaneq“ atunngilaa, taamaalioqqulluguli tatineqarpoq.
Türk Israelimit Gazami iliuuserineqartunut "inuiannik nungusaanertut“ taasinnaanerai marlunngornermi tusagassiortunik katersortitsinermi aperineqarami ima akivoq:
- Sorsunnermi pinerlunnerit amerliartuinnartut, imaluunniit inuiannut pinerlunnerit, immaqalu suli amerlanerusut, takusinnaavavut. Inuiannik nungusaanerunersoq taamaannginnersorluunniit nalilerneqarnissaa eqqartuussivimmi aalajangerneqassasoq isumaqarpunga. Uppernarsaatilli amerliartuinnarnerat takusinnaavagut.
/ritzau/Reuters
