Folketingi nunat avannarlermiusut nittartagartaartoq
Kalaallit Savalimmiormiullu namminneq oqaatsitik atorlugit Folketingimit paasissutissanik amerlanerusunik pissarsisinnaalerput.
Folketingip Siulittaasoqarfiata 2023-p naanerani suliniummut aningaasaliisoqarnissaa aalajangiuppaa.
Assi: Leiff Josefsen
Folketingip nittartagaa kalaallisut savalimmiormiusullu saqqummerpoq. Folketingi tusagassiutinut taama nalunaaruteqarpoq:
- Folketingi pillugu paasissutissat naalagaaffeqatigiit akimorlugit pissarsiarineqarsinnaanngornissaat suliniutip siunertaraa. Nittartakkat ineriartortinneqarneranik suliaqarnermi nittartakkat taakku marluk naleqquttuunissaat aamma pitsaasuunissaat qulakkeerniarlugu Kalaallit Nunaanni aamma Savalimmiuni oqartussat attuumassuteqartut peqataatinneqarput.
Nittartakkat nutaat qinikkat sulinerannik Folketingillu Naalagaaffeqatigiinnermi inissisimaffia pillugit paasissutissanik imaqarput.
Aamma Folketingimi suliassat, Atlantikup avannaaniit isigalugit pingaaruteqartut, soorlu Kalaallit Nunaat pillugu ataatsimiititaliami suliassat, sammineqarput.
Folketingip nittartagaa kalaallisut www.folketingi.dk-mi takuuk.
