Folketingimi ilaasortaq: Trumpip oqaaseqaataasa milliartilikkaanik isumaqatiginninniarnernik ajornannginnerulersitsivoq
Maannakkut Illersornissaqarfiup Kalaallit Nunaanni aningaasaliissutissai milliartilikkaat isumaqatiginninniutigineqarput. Donald Trumpip soqutiginninnerujussuata kalaallit kissaataannut naalaarumassusermik annertunerulersitsisoq, folketingimut ilaasortaq Aaja Chemnitz (IA) oqaluttuarpoq.
Donald Trumpip oqaasii qallunaat Kalaallit Nunaannik politikikkut aallussinerannik annertunerulersitsivoq. Præsidentip Kalaallit Nunaanni illersornissaqarfimmi aningaasaliissutit annertusineqarnissaannik isumaqatiginninniarnernik arlaatigut sunniuteqartut, Aaja Chemnitz oqaluttuarpoq.
Assi: Emil Nicolai Helms/Ritzau Scanpix
Folketingimi partiit kalaallit ilaasortaatitaat marluk ilanngullugit, maannakkut Illersornissaqarfimmi aningaasaliissutissanik 10 milliartinik amerlanerusunik isumaqatiginninniuteqarput.
Aningaasat Issittumi Kalaallillu Nunaanni ukiut aggersut qulit ingerlaneranni agguarneqassapput.
Folketingimut ilaasortap Aaja chemnitz (IA) nammineq sapaatip akunnerani uani isumaqatiginninniartuniissimanini, Donald Trumpillu Kalaallit Nunaannut annertuumik soqutiginninnera kalaallit kissaataasa akuersaarneqarnerannut tunngatillugu sunniuteqarsimasoq oqaatigaa.
Donald Trumpip oqariartuutai qanoq annertutigisumik isumaqatiginninniarnerni nikeriartitsisimappat?
- Kalaallit tungitsinnik isumaqatiginninniarnerit ajornaannerulersimanerat oqaatigineqarsinnaavoq. Naalakkersuisut kissaataat tusaaniarneqarput, IA Folketingimilu kissaatai isumaqatiginninniarnerni tusaaniarneqarput, taamaaliornermilu soorunami immikkoortumi anguniakkatsinnik allatut ajornartumik annertunerulersitsisariaqarnerput ilanngullugu nassuerutigineqarpoq.
Naalaarusussuseqalersitsisoqarpa?
- Aap, aningaasat isumaqatiginninniarnernut atugassanngortinneqartut aamma amerlineqarput, Aaja Chemnitz Sermitsiamut oqarpoq.
Alapernaarsuinermik suliassat Air Greenlandimit isumagineqarnissaat kissaatigigaa
Isumaqatiginninniarnerit suli naammassineqanngillat, isumaqatiginninniarnernilu attaveqaatit pingaarutillit aallussimallugit, politikerip oqaatigaa, tassani søkabelit qajannassusaat, illersornissaqarfimmullu aningaasaliissutit milliartilikkaat ilaasa kabelinut nutaanut atorneqarnissaannut periarfissat ilanngullugit:
- Tassa søkabeli ataasiinnaq pigineqassanngilaq, siunissamili søkabelit amerlanerulernissaat neriunarpoq. Tamanna Kalaallit Nunaanni ullumikkutulli qajannartumik inissisimassannginnitsinnut pingaaruteqarpoq, Aaja Chemnitz oqarpoq.
Donald Trumpip oqaaseqarnermini Kalaallit Nunaata imartaani susoqartarnerata ilisimaneqannginnera toqqaannanngitsumik isornartorsiorpaa. Tamanna ilungersuatitsisarpoq, ajornartorsiullu ukiorpassuarni ilisimaarineqarpoq.
Alapernaarsuinermik suliniutini nutaani Air Greenlandip akuutinneqarnissaa kissaatigigini, Aaja Chemnitz oqarpoq:
- Alapernaarsuinerup annertusineqarnissaa sammineqartupilussuuvoq, susoqarnerami ilisimanerusariaqarparput. Tamanna timmisartut atorlugit pisinnaavoq, maannamullu Challengerimik isumaginnittarnermut taarsiullugu Air Greenlandillu suliassani arlalinni taakkunani isumaginnittuunissaa kissaatigisupilussuuara, politikeri oqarpoq imalu nangilluni:
- Umiarsuit ilaatigut arlallit atorneqarsinnaaneq ajorput, Challengerilu aamma taamatut ajornartorsiuteqarpoq. Tamatigut atorneqarsinnaasanngilaq, tamannalumi isornartorsiortarpara, isumaqarpungalu timmisartumik alapernaarsuineq aalaakkaanerulersinniarlugu piffimmi aaqqiissutissat qulakkeerniarneqarnissaat isiginiarneqartariaqartoq, taanna oqarpoq.
Konservativit namminiilivinnissaq pillugu akineqarusupput
Isumaqatiginninniarnerni Islandip Kalaallillu Nunaata akornanni imartaq annertuumik sammineqartoq, Aaja Chemnitzip ilanngullugu oqaatigaa:
- Inuiaqatigiit kalaallit aamma iluaqutserneqarnissaasa isumannaarneqarnissaat aamma pingaaruteqarpoq, taamatullu aamma attaveqaatinut illersornissaqarfiup soqutigisaasa isumagineqarnissaannut pisariaqartinneqartunut aningaasaliisoqarnissaa qularnaartariaqarpoq, tamatumanili aamma piffinni inuiaqatigiit soqutigisaat isiginiarneqartariaqarput. Matumani Tasiilami mittarfiliorsinnaanermut periarfissap ilanngunneqarnissaa misilippara.
Folketingimi partiini arlalinni illersornissamut oqaaseqartartut sisamanngornermi isumaqatiginninniaqataasimallutik oqaaseqarput.
Konservativit Illersornissamut Kalaallillu Nunaannut oqaaseqartartuat, Rasmus Jarlov tassunga tunngatillug DR-mut oqaaseqarnermini, aningaasaliinissat annertuut aalajangiivigineqarnissaat sioqqullugu Kalaallit Nunaata Kunngeqarfimmut ilaaginnarnissaanik paasitinneqarumanini oqaatigaa:
- Kalaallit Nunaannit avissaalerneq uninngaannarniarnerluunniit pillugu oqariartorfigineqarnissarput pisariaqartipparput. Qallunaat Nunaannimmi ukiualuit qaangiuppata avissaassappata Kalaallit Nunaannut milliartinik qulikkaanik aningaasaliineq illersorsinnaanngilarput.
Radikalineersoq Martin Lidegaard kalaallit avissaarnissaat ukiorpassuit pissanngitsoq, maannali Kunngeqarfiup nukittorsarnissaa sammineqartariaqartoq,akerlianik isumaqarput.
