KL

DK

ALLANNGUUTISSATUT SIUNNERSUUT

Folketingimit qallunaallu partiiannit suleqatigisamit tapiiffigineqarsinnaaneq suli atuutissaaq – Naleraq naammaginninngilluinnartoq

Inatsimmut partiinut nunanit allanit taperneqarsinnaanernissamik inerteqquteqarlertitsisussamut allannguutissatut siunnersuut Naleqqap akerlilerpaa.

Pele Broberg, medlem af Inatsisartut, formand for Naleraq er chokeret over SIK-sagen.
Naleqqami siulittaasup Pele Brobergip Folketingimit qallunaallu partiivinit suleqatigisamit partiinut tapiissutinik inerteqquteqarnerup atuutilersinneqarnissaa naammaginngilaa.
Thomas Munk Veirum
Tusagassiortoq
Saqqummersinneqarpoq

Partiit nunanit allanit tapiiffigineqarsinnaanerat inerteqqutigilersinniarlugu inatsisissatut siunnersuut ataatsimiititaliami sivikitsumik suliarineqareerluni Inatsisartuni marlunngornermi ualikkut oqaluuserineqarnera nanginneqarpoq.

Inatsisartunut qinersinissap nunanit allanit sunnerniarneqannginnissaa inatsisissatut siunnersuutip siunertaraa.

Inatsisissatut siunnersuutip siullermeernerani, Naleqqap namminneq paasinninneratut, partiit Danmarkimi Folketingimit aningaasanik tapiiffigineqarsinnaajunnaartussanngornera nuannaarutigaa.

Inatsisartut siulittaasuata Mimi Karlsenip (IA) tamanna ilumuunnginnerarpaa.

Allannguutissamut siunnersuummut nassuiaat

Inatsisinut Ataatsimiititaliamit allannguutissatut siunnersuutaa ima nassuiarneqarpoq:

Allannguutissatut siunnersuutikkut erseqqissarneqarpoq nunanit allanit tapissuteqartunit tapiissutinik pissarsinissamut inerteqqummut pisortanit partiinut tapiissutit ilaatinneqanngimmata, taakkununnga ilanngullugit danskit inatsisiliorneri naapertorlugit partiinut tapiissutit Kalaallit Nunaanni partiinut Folketingimut qinersinermi qinigassanngortitaqarsimasunut tapiissutigineqartartut.

Allannguutissatut siunnersuutikkuttaaq nunanit allanit tapiissuteqartunit tapiissutinik pissarsisinnaanermik inerteqquteqarnermut ilaatinneqartussanngitsumik ilanngussisoqarpoq. Taamaalilluni siunnersuutigineqarpoq kunngeqarfiup iluani partiinit nalunaarsorneqarsimasunit tapiissutit inerteqquteqarnermut ilaatinneqassanngitsut. Kalaallit Nunaanni partiit ass. Folketingimi danskit partiiannit suleqatigisamit tapiissutinik pissarsisinnaajuarnissaat taamaliornikkut siunnersuutigineqarpoq.

Paasisat: Inatsisartut

Inatsisinut ataatsimiititaliaq isumaqatigiittoq aappassaaneerneqarnissaanut allannguutissatut siunnersuuteqarpoq, tassani Folketingimit qallunaallu partiivinnit suleqatigisamit tapiissuteqartoqarsinnaanera erseqqissarneqarluni.

- Qanoq oqarpugut

Allannguutissatut siunnersuut Naleqqap siulittaasuata Pele Brobergip politikerinut allanut isornartorsiutigaa:

- Qanormi oqarpugut, taama oqarusuummernarpoq.

- Maanna amerlanerussuteqartut ataatsimiititaliamut tamanna misissoqquaat taamaalillutillu Danmarkimit kalaallit partiivi tapersersorneqarsinnaanerat akueritillugu, naak aningaasatigut qinersinermut sunniuteqarsinnaaneq pinngitsoortinniarneqaraluartoq.

- inatsisissatut siunnersuut pitsaasutut isigigaluarparput, taamaaliornikkummi qallunaat aningaasaqarnikkut soqutigisaat killilersimaarneqarsinnaammata. Qallunaalli Kalaallit Nunaanni qinersinerup sunnersinnaagaa maanna akuerineqarpoq, Pele Broberg oqarpoq.

Nunanit allanit qinersinermut sunniuteqarneq annikillisinniarneqassasoq Naleqqamit isumaqatigineqartoq aamma oqaatigaa, Danmarkimiilli tapiisoqarsinnaanera pissutigalugu siunnersuut Naleqqamit taaseqataaffigineqarnianngilaq.

Qallunaat partiiivinik suleqatigisanit aningaasatigut tapiisoqarsinnaanera immaqalu kalaallit partiiivinik sunniisoqarsinnaanera Demokraatineersup Jens-Frederik Nielsenip oqaluttarfimmit isumaqatigalugu oqaatigaa.

Qinersisoqarnissaa pissutigalugu utaqqisinneqarsinnanngimmat Siumup siunnersuut suli tapersersoraa Doris J. Jensen oqarpoq. Siumup Danmarkimi partiip suleqataata Socialdemokraatit Siumup politikkianut sunniuteqarsimanngitsoq aamma oqaatigaa.

Allannguutissatut siunnersuut inatsisissatullu siunnersuut tamakkiisoq akerlerineqaraluartoq akuersissutigineqarpoq. 22-t akuersipput arfineq-pingasullu taaseqataanatik.

naleraq inuiaqatigiit inatsisartut folketinget lovforslag samfund pele broberg

ATORFIIT Se alle jobs

Powered by Labrador CMS