Folketingimut ilaasortap kajumissaarutaa: Kalaallit Nunaat eqqaamasiuk
Folketingimut ilaasortap Aki-Matilda Høegh-Damip aningaasanut inatsisissamut isumaqatiginninniarnermi Kalaallit Nunaat eqqaamaqqullugu suleqatiminut kaammattuutigaa.
Danmarkip Kalaallit Nunaanni suliassaqarfiisa aserfallatsaaliornissaannut isumagineqarnissaallu pillugit Aki-Matilda Høegh-Damip Folketingimi suleqatini eqqaasippai.
Assiliisoq: Leiff Josefsen
Danmarkimi aappaagumut missingersuutit isumaqatigiinninniutigineqaleruttorput, danskillu naalakkersuisuisa aningaasanut inatsisissatut siunnersuutaat sapaatip-akunnerani matumani marlunngornermi siullermeerneqarluni oqaluuserineqarpoq.
Folketingimut ilaasortap Aki-Matilda Høegh-Damip siullermeerneqarnera atorlugu suleqatini kajumissaarpai isumaqatiginninniarnermi Kalaallit Nunaat eqqaamaqqullugu.
Danmarkip Kalaallit Nunaanni suliassaqarfiit amerlasuut suli isumagisarmagit, suliassaqarfiillu taakkua eqqaamaneqarnissaat pitsanngorsaanernullu aningaasanik qulakkeerinnittoqarnissaa pisariaqartoq Aki-Matilda Høegh-Damip naqissuserpaa.
Nunanut avannarlernut aningaasaliissutit ukiumut 30 millionit koruunit Savalimmiullu avittarnerat naammanngitsoq Aki-Matilda Høegh-Dam oqarpoq:
- Aningaasat qinikkanut sisamanut agguataarneqaraangata piviusumik pingaaruteqartumillu allannguinissamut periarfissat killeqalersarput.
Isornartorsiuineq: Susassaqarfik sivisuumik iliuuseqarfigineqanngitsoq
- Assersuutigiinnarlugu Kalaallit Nunaanni inuit pisinnaatitaaffigisaat, tassa inatsisitigut isumannaatsuunissaq qulakkeerniarlugu ukiumut 40 millionit koruunit missaat immikkut atorneqartariaqartut immikkut ilisimasallit nalilerpaat, Aki-Matilda Høegh-Dam oqaluttarfimmit oqarpoq.
Inatsiseqarnermut tunngasut kinguussaaqqasut Folketingimut ilaasortap isornartorsiorpaa:
- Taanna susassaqarfiit allat assigalugit sivisuumik iliuuseqarfigineqanngitsut kinguussaaqqasut ilagiinnarpaat, Aki-Matilda Høegh-Dam oqarpoq.
Isumaqatigiinniarnerni Kalaallit Nunaannut attuumassuteqartuni tamani peqataarusulluni naqissuserpaa.
Ukioq manna Danmarkimi aningaasanut inatsisissatut isumaqatigiinniarnerit Kalaallit Nunaannut tunngatillugu aallartipput danskit naalakkersuisuisa Kalaallit Nunaanni peqqinnissaqarfiit pitsanngorsarniarlugit ukiunut sisamanut agguataarlugit 140 millionit koruuninik aningaasaliinissamik siunnersuuteqarnerannik. Naak peqqinnissaqarfinnut susassaqarfik angerlaanneqarnikuualuartoq.
Danskit naalakkersuisuisa siunnersuutaat piviusunngortinneqarumaarnersoq isumaqatigiinniarnerni paasinarsissaaq.
