Greenland Airports allamik siunnerfilissagaa
Naalakkersuisut Greenland Airportsimi siulersuisunik nutaanik toqqaapput, Jens Wittrup Willumsenilu siulersuisunngortunut ataatsimoortitsissaaq. Allanik taarsiisoqassanersoq suli nalunarpoq.
Jens Wittrup Willumsen, Billundip mittarfiani siulittaasup tullia Air Greenlandimilu siulittaasuunikoq, Greenland Airportsimi siulittaasunngorpoq.
Assi: Oscar Scott Carl
Naalakkersuisut Greenland Airportsimi siulersuisunut ilaasortat nutaat sisamat sisamanngornermi toqqarpaat. Ingerlatseqatigiiffimi pisut politikkikkut innuttaasuniillu sivitsortumik isornartorsiorneqartareersullu taama pisoqarpoq.
Siulersuisuni siulittaasunngortoq tassaavoq 64-inik ukiulik Jens Wittrup Willumsen, taanna Billundip mittarfiani siulittaasumut tulliuvoq Air Greenlandimilu siulittaasuunikuulluni. Immikkut ittumik ataatsimeersuarnermi Sermitsiamit sukkaannaq apersupallapparput.
Suliffeqarfimmi isorineqaqisumi siulittaasunngornerit immaqa isumakulunnarpoq?
- Naamik, isumakulunnartuuppat atorfik taanna akuerisimanavianngikkaluarpara. Kisianni soorunami unammilligassaavoq ataqqisara. Taanna qularutigineqassanngilaq.
Siulersuisuni siulittaasunngornissat qanoq sivisutigisumik ilisimaviuk?
- Sapaatip-akunnera kingulleq oqaloqatigiinnerput aallartikkunarpoq.
Siulittaasunngorlaatut suna siullertut iliuuseriniarpiuk?
- Siulersuisut pisup immikkut ittup nalaani katersuutsissavakka. Pingasunik nutaanik ilaasortartaarpoq, taakkulu aalajangiitinnatik suliffeqarfik pillugu ilisimasaqaqqaalertariaqarput. Isumaqarpungali ingerlaannaq ingerlallualersinnaasugut.
Qaqugu naapeqqaassavisi?
- Pilersaarusiuleruttorparput. Sukkasuumik pinissaa maanna pingaaruteqarmat imaassinnaasoq qanimut naapinnata nittartagaq atorlugu ataatsimeeqqaartugut.
Greenland Airportsimi qullersat taarserneqarnissaat eqqartorneqassava?
– Siulittaasutut qinigaaqqammerpunga, sammisallu taamaattut siulersuisuni soorunami oqaloqatigiissutigineqaqqaartarput. Sulineq taama ingerlassaaq, Jens Wittrup Willumsen oqarpoq.
Willumsenip siulia maanna tunuartoq Kjeld Zacho Jørgensen, nittartakkatigut ataatsimeersuarnermi peqataavoq. Suleqatigiinnermut qujavoq siulersuisunngortullu ilassillugit.
Siulersuisunut ilaasortat nutaat pingasut Naalakkersuisut toqqagaat tassaapput Anni Thøgersen, Anette Grønkjær Lings aamma Kristoffer Plenge-Brandt. Siulersuisut nutaat siulittaasup tullia namminneq akunnerminni toqqarsinnaavaat.
