Greenland Airportsimi ingerlatsinermi pisortaq soraarpoq

Greenland Airportsimi aqutsisut taarserneqassasut, Henrik Estrupilu ingerlatsinermut pisortatut soraartoq, suliffeqarfimmit pingasunngornermi nalunaarutigineqarpoq.

Ingerlatsinermut immikkoortortaqarfimmi aqutsineq piffissami ikaarsaarfiusumi Jens Lauridsen suleqatigalugu pisortamit misilittagalimmit Niels Grosenimit isumagineqassaaq.

Greenland Airportsip Nuummi mittarfissuup nutaap ingerlanneqarnerani ilungersunartorsiornerata nalaani ingerlatsinermut pisortaq soraarpoq. Ilungersunartorsiornerit ilaatigut Nuummi mittarfiup isumannaallisaaviata ammarnissaa sapaatip-akunnerani matumani kingusinaarmat timmisartuussinissanut sunniuteqarneranik pipput.

Henrik Estrup Mittarfeqarfinni 2019-imiilli pisortaavoq, Mittarfeqarfiillu Greenland Airportsinngormat ingerlatsinermut pisortanngorluni.

Taassuma atorfimmit tunuarneranut pisortamik niuernermik pitsaanerusumik ukkatarinnittumik pisariaqartitsisoqarnera, Greenland Airportsimi pisortaaneq Jens Lauridsen tusagassiutinut nalunaarummi allappoq.

Niuernermik ukkatarinninnerusinnaasumik pisariaqartitsisoqartoq

Aqutsisusoqatigiinni allanngortitsinissamik piffissaallualinngisaannartoq Jens Lauridsen oqarpoq:

– Nuummi Mittarfiup ammarnerata, Ilulissani Qaqortumilu mittarfittaassat ammarnissaannut piareersarnerit akornanni maanna ikaarsaariarfimmiippugut. 

- Aqutsinikkut ataqatigiissaarinikkut aaqqissuusseqqinnissamut periarfissiivoq. Tassani mittarfiit ingerlanneqarneranni pitsaanerusumik niuernermik ukkatarinnissinnaasoq siunissami pisariaqartinneqalertussaavoq, Jens Lauridsen oqarpoq.

Henrik Estrup Nunatsinni mittarfiliornermi ineriartortitsinermi qitiusumik inissisimasimanera pillugu pisortaanerup aamma nersualaarpaa:

- Henrik ukiorpassuarni misilittagaqarluni, ilisimasaqarluarluni tunniusimallunilu Kalaallit Nunaanni mittarfinnik ingerlatsinerup ineriartortinnerani pingaarutilimmik inissisimasimavoq. Suleqatigilluarsimanitsinnut suliarujussuanullu qutsavigerusuppara, Jens Lauridsen oqarpoq.

Henrik Estrup soraarnini pillugu aamma oqaaseqarpoq:

- Kalaallit Nunaanni attaveqaasersuutini qitiusut ilaannik suleqatit pikkorissut peqatigalugit ineriartortitseqataanissamut aammalu suliassat ajornakusoortut pissanganartullu suliarinissaannut periarfissaqarsimagama nuannaarutigaara. Taakkua Greenland Airportsilu siunissami pitsaanerpaanik kissaappakka, Henrik Estrup oqarpoq.