KL

DK

Grønlandsbanken peqqissuunissaq ataatsimoornerlu anguniarlugu suleqatigiinnissamik isumaqatigiissuteqarpoq

Grønlandsbankenip peqqissuuneq ataatsimoornerlu nukittorsarniarlugit suliniut “Gå væk kræft – livet er en gave” suleqatigilerpaa.

Peqatigiiffimmut "Gå væk kræft - livet er en gave“-mut ilaasortat Nuummi Quassussuup qaavanut pisuttuarnerannit assi.
KASSAALUK KRISTENSEN
Digitalimik aaqqissuisoq
Saqqummersinneqarpoq

Kinaluunniit nappaassuarmik kræftimik eqqugaasinnaavoq. Inuunermilu iliuuserisinnaasat assigiinngitsut pinaveersaartitsissutaasinnaapput. Ilaatigut peqqinnartumik inooriaaseqarnikkut timigissartarnikkullu.

Peqatigiiffik nammineq kajumissutsimik ingerlanneqartoq ”Kræfti peerniarsiuk – inuuneq tunissutaavoq” Grønlandsbankenip suleqatigilerlugu nalunaarutigaa. Peqatigiiffiup suliniutai peqqissutsimut, timimik aalatitsinermut ataatsimoornermullu tunngassuteqarput.

Peqatigiiffik Nuummi, Sisimiuni, Kangerlussuarmi, Qeqertarsuarmi, Ilulissani Qaqortumilu piuvoq.

- Pinngortitaq timersuutigalunilu ataatsimoorneq tassa peqqissaatit annersaat. Timerput aalatikkutsigu kræftilissutaasinnaasorpassuit ingalassimatissavagut, kiisalu tarnikkut timikkullu nukissaqarnerulertarluta. Pisuttuarnitsinni ataatsimoorneq nuannersoq misigisarparput, nuannisartarpugut, timersorluta oqaloqatigiilluarlutalu, peqatigiiffimmik pilersitsisoq Jan Erik Pedersen oqarpoq, nangillunilu:

- Grønlandsbanken suleqatigileratsigu peqataasutsinnut atisanik tunniussisinnaanngorpugut, suliffeqarfiup taama angitigisup nunatsinni peqqinnerulersitsiniarnerput maluginiarsimammagu uagutsinnuttaaq aamma pingaaruteqarpoq.

Amerlanerit pinngortitamiissapput

Peqatigiiffiup inuit amerlanerusut pinngortitamiinnissaat timillu aalatinnerata timikkut tarnikkullu iluaqutissartai pillugit anguniagai tapersissallugit suleqatigiinnermi anguniarneqartoq Grønlandsbanken tusagassiuutinut nalunaarummi allappoq.

Peqatigiiffik tamanut ammasunik assigiinngitsunik aaqqissuussisarpoq.

Aaqqissuussat ilaqutariinnut tulluartut soorlu pisuttuarnerit, timersoqatigiinnerit sakkortunerusumillu timersorusuttunut aamma aaqqissuisarlutik.

- ‘Gå væk kræft – livet er en gave’-mik tapersersuisinnaanerput nuannaarutigeqaarput. Kalaallit Nunaat tamakkerlugu peqqinnartunik ataatsimoortitsisarnerat uagut inuiaqatigiinni inuunerissaarnerunissamik anguniagaqarnitsinnut tulluarpoq.

- Neriuppugut uagut tapiissuteqarnerput nammineq kajumissutsiminnik suliaqartartunut peqataasunullu allanut iluaqutaajumaartoq. Neriuppugullu inuit suli amerlanerusut Jan Erik-up suleqataasalu ingerlassaannut pitsassuarnut peqataasalerumaartut, Grønlandsbankenimi attaveqaqatigiinnermut tuniniaanermullu pisortaq Peter Fleischer Rex oqarpoq.

Grønlandsbankenip tapiissuteqarneratigut peqatigiiffiup “Gå væk kræft – livet er en gave”-p suliniuteqarnini annertusarsinnaavai.

gå væk kræft - livet er en gave grønlandsbanken foreningsliv forening sundhed sport inuiaqatigiit

ATORFIIT Se alle jobs

Powered by Labrador CMS