Filmfestival
GUX Filmfestivalimi inuusuttut filmiliornermikkut oqaatigerusutaminnik takutitsinissaminnut periarfissaqartut
GUX Nuuk aamma GUX Aasiaat suleqatigiillutik GUX Festivalimik aaqqissuuserngaalerput. Inuusuttut filmiliorsinnaalernissaminnut ammaanneqassasut, GUX-llu allat peqataatinneqalerumaartut neriuutigineqarpoq.
Hanne Sørensen
Inuusuttut GUX Nuummi GUX Aasiannilu ilinniarnertuunngorniat isumassarsiornermik, isiginnaasassiornissamut allannermik, immiussinermik katiterinermillu ulluni makkunani ilinniarput.
Kingorna filmiliaaqqatik Katuami takuteqqaassavaat. GUX-imi ilinniarnertuunngorniartunut filmiliornerni oqariartuutinik saqqummersitsinissamut periarfissiivoq:
- Filmiliaaqqatik saqqummersitsinermi inuusuttut oqariartuutiminnik takutitsisinnaalernissaannik ikiussavagut. Ullumikkut teknologii atorluarneqarnerulersimavoq, kikkullu tamarmik filmiliorsinnaapput avitseqateqarsinnaallutillu.
- Kisianni filmi qanoq oqaluttuartilluarneqarsinnaava? Soorlu 'Allatta'
-mi unammisitsisoqartarpoq, taava aamma GUX Film Festival aqqutigalugu oqaluttuanik saqqummersitsinikkut filmiliornermik unammisitsisoqarsinnavoq, GUX-imi ilinniartitsisut Hanne Møller Sørensen aamma Torben Bjerg Hesselholdt tusagassiuutitigut nalunaarumminni allapput.
Nunat sanilerisat suleqatigineqartut
GUX Nuuk aamma GUX Aasiaat filmfestivalertitsinissaminnut kisimik aaqqissuussinngillat. Atlantikup avannaaniittut, tassa Iqaluit, Canada Islandilu suleqataapput:
- Inuusuttut filmiliaaqqatik Katuami, GUX Nuummi GUX Aasiannilu saqqummersissavaat. Katuaq ukioq manna aningaasaliisuuvoq.
Sammisat assigiinngitsut marluk
GUX Film Festivalimi sammisat assigiinngitsut marluk takuneqarsinnaassapput. Tassallutik ersinartulersaarutit kiisalu piviusulersaarutit. Filmeeqqat minutsini tallimaniit arfineq-pingasunut sivisussuseqassapput.
Fimeeqqat saqqummersinneqarpata Oscar Komiteemi siulittaasoq Nina Paninnguaq Skydsbjerg, filmiliortartoq Marc Fussing Rosback, Namminersorlutik Oqartussani eqqumiitsuliornermi aningaasaateqarfimmi filmiliornermi siunnersorti, Norddok II-mi Det Danske Filminstitutimi aaqqissuisoq, kiisalu Oscar Komiteemi siulittaasup tullia Pipaluk Lykke naliliisartuussasut, ilinniartitsisut paasissutissiissutigaat.
Pilersaarut Facebookikkut Katuallu nittartagaani saqqummersinneqarumaarpoq.
