Hamasikkut Gazami sakkuaakkunnaarallartoqarnissaanik isumaqatigiissutissatut siunnersuut akissuteqarfigigaat

Palæstinamiut islamisiortut Hamasimeersut Israelip Gazami ulluni 60-ini sakkuaakkunnaarallartoqarnissaanik isumaqatigiissutissatut siunnersuutaanut tunngatillugu sisamanngornermut unnuaani akissuteqarput.

Hamasimeersut nalunaaruteqartarfikkut Telgramikkut taama nalunaaruteqartut, nutaarsiassaqartitsivik AFP allappoq.

Akissutaat sunerpiaq imaqarnersoq nassuiarneqanngilaq.

Ikiuiniarnermut tunngasuni allannguisoqarnissaa kissaatigigaat, tusarfiit ilaata kiunermik isertuussisup Qatarimilu isumaqatigiinniarnerit pillugit aamma ilisimasaqartup AFP-mut ilisimatitsissutigaa. Itisilernaguli.

Akissutaat Israelimiut sakkutuuisa sumiiffigiunnaagassaattut kissaataannut aamma tunngasortaqalaartoq, tusarfiit ilaata aamma oqaatigaa.

Hamasimeersut tusarfiit ilaata aamma oqarnera naapertorlugu eqqissinissamik isumaqatigiissuteqarnissamut neriorsuuteqaqqusipputtaaq.

Hamasimeersut akissutaat Israelimit suli oqaaseqarfigineqanngilaq.

Hamasimeersut akissutaat misissoqqissaaleruttoritsik, Israelip ministeriunerata Benjamin Netanyahup allaffeqarfianeersut ilisimatitsissutigaat.

Israelimiut Hamasimeersullu aallartitaat Qatarimi sapaatit akunnerini kingullerni marlunni isumaqatigiinniarnerminni atsioqatigiinngillat. Illuatungeriilli taakkua piumasanik aalajangiusimaannarneraallutik isornartorsiuuteqattaapput.

Qatar, USA Eggyptenilu Israelip Hamasimeersullu aallartitaat isumaqatigiinniarneranni isumaqatigiissitsiniartuupput.

USA-p Kangia Qiterlermi immikkut ittumik aallartitaa, Steve Witkoff, isumaqatigiinniarnerit alloriaqqiffiunngippata sapaatit akunnerata massuma ingerlanerani Qatarimukariaannaasoq, nutaarsiassaqartitsiviup Axiosip paasissutissiissutigigaa nutaarsiassaqartitsivik dpa allappoq.

Witkoff, Israelimiut pilersaarusiornermut ministeriat, Ron Dermer, Qatarimiillu aallartitaq Italiami illoqarfiit pingaarnersaanni Romimi sisamanngornermi Axiosip paasissutissiinera naapertorlugu ataatsimiissapput.

Gazami kaannersuaqalersinnaaneranik, suliniaqatigiiffiit 100-nit ikinnerunngitsut – soorlu Red Barnetimeersut, Læger Uden Grænserimeersut aamma Amnesty Internationalimeersut –pingasunngornermi aarlerisaarutigaat.

Gazamut killeqarfiit ammarneqarnissaat ikiuiniartullu isersinnaanissaannut killilersuisoqarunnaarnissaa, suliniaqatigiiffiit kajumissaarutigaat, sakkuaakkunnaarallartoqarnissaanillu piaartumik isumaqatigiittoqarnissaanik ujartuillutik.

/ritzau/