Hamasip siuttuata toqutaanera Iranimut annernartumik peqqusiileqititsisoq ilisimatooq naliliivoq

Iranimut annertuumik peqqusiileqinarpoq, qaaqqusaalluni tikeraaq taamak pingaaruteqartigisoq Teheranip qiterpasissuani illersorneqarsinnaasimanani toqutaammat.

Taama oqarpoq Københavnip Universitetiani lektori Rasmus Elling, aamma ilisimatuutut Iranip oqaluttuarisaaneranik nutaanerusumik ilisimatusartoq.

- Aarlerinartoqarpoq, nunat sanileriit akornanni annertuumik sorsuttoqalersinnaanera, tassami maannakkut illuatungeriit akornanni akersuunneq sorsunneruvoq, taannalu annertuseriaannaavoq, Rasmus Elling oqarpoq.

Pingasunngornermi ullaakkut sakkulersorlutik akerliuniaqatigiit Hamassikkut siuttuisa qullersaat, Ismail Haniyeh, toqutaavoq Iranip illoqarfiisa pingaarnersaanni, Teheranimi.

Reuters naapertorlugu Hamassikkormiut taamak nalunaaruteqarsimaneragaapput.

Haniyeh Iranimiippoq, Masoud Pezeshkianip præsidentitut ivertinneqarneranut atatillugu qaaqqusaalluni.

Hamas aamma Iranip siuttuisa qullersaat, Ayatollah Ali Khamenei, oqarput Ismail Haniyehip toqutaanera pillugu akiniaasoqassasoq.

Iran qanorpiaq akiniaassamaarnersoq, suli apeqquterujussuuvoq akissutissarsineqanngitsoq, Rasmus Elling oqarpoq.

- Oqaluttuarisaanermi Israelip Iranillu akornanni akerleriinneq taaneqartarpoq 'tarrat atorlugit sorsunneq', tassa saassusseriataarnerit, inuartarinninnerit, qarasaasiatigut saassussinerit aammalu toqqaannanngitsumik iliornikkut sinniisunillu atuinikkut saassussisarnerit aqqutigalugit sorsunneq ingerlanneqarmat, taanna oqarpoq.

Kisianni tamanna allanngoriartorpoq apriilimi aallartilluni, tassani Iran Israelimut dronit atorlugit saassussinermik annertuumik aallartitsimmat.

Iranimit dronit 170-it sinnerlugit taamanikkut nassiunneqarput. Amerlanersaat Israelip silaannakkut illersornissamut sakkutooqarfiinut qaartinneqartussanngorlugit nakkakaatinneqarlutik.

- Tamanna ukiunik qulikkaanik aporaannermik ingerlareersumik allannguisitsivoq, taamaalilluta siunissami qanoq pisoqarumaarsinnaaneranik siulittuiniarneq ajornarsisinneqarpoq, Rasmus Elling oqarpoq.

Apriilimi Iranip saassussinera immikkut maluginiagassaagaluartoq, taamaattoq saassussinermi inuit eqqorniarneqaratik sakkutooqarfiit eqqirniarneqarsimapput.

Taamaalilluni Israelip pinngitsoortissinnaasimavaa akiniaannginnermigut aaqqiagiinnginnerup annertuseriartinneqarnissaa, ilisimatooq taama naliliivoq.

- Pisumi matumani neriuutigineqaannarsinnaavoq Iranimiut iliuutsitik nalilersorluassagaat, taamaaliornikkut akiniaarusuttut eqqissisarsinnaassagai illuatungaatigullu Israelip sakkuaannermi annertusaannginnissaa qulakkeerniarsinnaassagaat.

- Tamanna iluatsissinnaannngippat, taava pisoq nunat sanileriit akornanni sorsunnerup annertuup aallartissinnaanera aarlerinaateqarpoq, taanna oqarpoq.

Rasmus Elling isumaqarpoq Iranip Israelimut sorsunnissani soqutigisarinngikkaa.

- Tamannami pissagaluarpat USA aamma nunat killiit sinneri Israelimut tapersiiumaarnissaat ilimagisariaqarmat, taava Iran ajugaasinnaanngitsutut inissisimassagaluarpoq, taanna oqarpoq.

/ritzau/