HANS ENOKSEN 1956-2025
Hans Enoksen Itillimi sapaatiuppat ilisaassaaq
Tamannali sioqqullugu tallimanngorpat ualikkut Nuummi Naalagiuserineqassaaq. Tamatuma saniatigut innuttaasut namminneq aaqqissugaannik piumasut unnugu Inatsisartut ataatsimiittarfiata silataani naneruummik ikitsiartorsinnaapput.
Sisamanngornermi ullaap tungaani Dronning Ingridip napparsimmavissuani toqusut inaanni tussiarfigineqarpoq.
Assiliisoq: Oscar Scott Carl
Biskoppi Paneeraq Siegstad Munk nalunaarpoq Inatsisartuni siulittaasuusimasoq kiisalu Naalakkersuisut siulittaasorisimasaat toqussilu tikillugu Inatsisartuni ilaasortaasimasoq, Hans Enoksen Nuummi tallimanngornermi naalagiuserineqassasoq. Tamatumalu kingorna Itillimi sapaatiuppat ilisaassasoq.
Naalagiuserinninneq pissaaq Nuummi tallimanngornermi 19. september nal. 14:30 Hans Egedep Oqaluffiani.
Ilisineq pissaaq Itillimi Itillip oqaluffiani sapaammi 21. september nal. 14:00.
Tamatuma saniatigut innuttaasut namminneq aaqqissukkaminnik Hans Enoksenimut ilaqutaanullu naneruummik ikitsisoqassaaq sisamanngornermi unnukkut (unnugu) nalunaaqutaq 19:00, taannalu Inatsisartut ataatsimiittarfiata silataani pissasoq nalunaarutigineqarpoq.
