Hotel Maniitsup eqqaani politiit: Angut sakkulisartoq eqqissiviilliortitsisoq
Hotel Maniitsup eqqaani angut siorasaaraluni aallaasilisarnera pissutaalluni politiit sakkulisartut pingasunngornermi ualikkut takussaapput.
Maniitsumi politiit pingasunngornermi ualikkut Hotel Maniitsumiittumi sakkulersortoqarneranik nalunaarfigineqaramik politiit sumiiffimmut ornigupput.
Dorthea Reimer-Johansen
Kalaallit Nunaanni Politiit pigaartut pisortaat, Bent Johnsen naapertorlugu angummik aallaasilisartoqarnera pissutaalluni politiit kalerrinneqarput. Tamanna pivoq ualikkut tallimat missaani. Taamaattoqarnera pissutaalluni politiit sakkulisarlutik Hotel Maniitsup eqqaani takussaapput.
Najugaqartut innuttaasullu eqqissisarneqarput
Politiit pigaartuisa pisortaata oqaatigaa Hotel Maniitsumi najugaqartut illoqarfimmilu innuttaasut ernumassutissaqanngitsut.
- Politiit suliaq suliaraat, taamaattumik najugaqartut innuttaasullu ernumassutissaqanngillat, Bent Johnsen paasissutissiivoq.
Suliaq politiinit suli misissuiffigineqarpoq, taamaattumik annertunerusumik oqaaseqarsinnaanngikkallarput.
Hotel Maniitsoq matoqqavoq
Politiilersortoqarnera peqqutaalluni hotellimi iggavik illoqarfimmiunut matoqqagallarpoq, ineqartunulli ammavoq.
