IA: Danskit naalakkersuisuisa inuit pisinnaatitaaffii misissorusunngilaat
IA-p spiralilersuisimaneq pillugu suliami Danmark sakkortuumik isornartorsiorlugu iliuuseqartoqarnissaa piumasaraa.
Spiralilersuisimaneq pillugu misissuinermi danskit naalakkersuisui suleqatigiuminaassimasut Peqqissutsimut naalakkersuisuusimasoq Mimi Karlsen (IA) oqaluttuarpoq.
Assi: Morten Okkels
Spiralilersuisimaneq pillugu misissuineq kiisami naammassivoq, oqariartuullu pingaarnerpaaq erseqqippoq: Arnat niviarsiaqqallu kalaallit tusindilikkaat spiralilerneqarsimapput – amerlanertigut akuersinatik.
Tassungali killinnissaq, tassa nalunaarutip naammassineqarnissaa, ajornaatsuinnaasimanngilaq. Taama peqqissutsimut naalakkersuisuusimasoq Mimi Karlsen Inuit Ataqatigiit sinnerlugit tusagassiutitigut nalunaarummi allappoq.
Misissuinermut piumasaqaatit pillugit danskit naalakkersuisuinik suleqateqarneq ajornakusoorpoq. Aningaasaqarnermut misissuinermilu sammisat aalajangersimasut eqqarsaatigalugit.
- Inuit pisinnaatitaaffiinut tunngassuteqartunik misissuisoqarnissaanik naalakkersuisut piumasaqaataat qallunaat naalakkersuisuinit itigartinneqarluinnarpoq, Mimi Karlsen allappoq.
Taamaammat Naalakkersuisut inuit pisinnaatitaaffiinik misissuinermik 2024-mi aallartitsipput. Tassani inuit pisinnaatitaaffiinik nunarsuarmi tamarmi atuuttunik nunallu inoqqaavisa pisinnaatitaaffiinik unioqqutitsisoqarsimanersoq paasiniarneqassaaq.
Danmarkip katsorsartinnerit akilissagai
Utoqqatsertoqartariaqarlunilu taarsiiffiginnittoqartariaqartoq Inuit Ataqatigiit isumaqarput.
Ministeriuneq Mette Frederiksen aamma Naalakkersuisut siulittaasuat Jens-Frederik Nielsen utoqqatserput, tamannalu Nuummi septembarip 24-ani pisortatigoortumik malunnartinneqassaaq.
Arnat 143-t danskit naalagaaffiat taarsiiffigeqqullutik eqqartuussivimmut suliassanngortissimavaat.
Utoqqatsernerli taarsiinerlu naammanngillat. Mimi Karlsen taama allappoq.
- Utoqqatsernerup taarsiiffigitinnerullu kisimik ikeq mamisinnavianngilaat.
Inuttut, inuiattut innarlerneqarsimanerput utoqqatsernikkut
taarsiiffigitinnikkullu oqilisinneqarsinnaavoq. Danskilli naalagaaffiat suli
pisussaaffeqarpoq.
Inuit kingunerlutsitsisimasut katsorsarneqarnerat Danmarkip akilertariaqaraa IA-mit kissaatigineqarpoq.
- Inuiattut pineqarsimanerput uppernarsarneqartoq mamianangaaqisoq
qaangerniarlugu danskit naalakkersuisui akisussaasuugamik suliaqartariaqarput.
ICC: Iliuuseqartoqanngippat utoqqatsissut oqaasiinnaassaaq
Inuit Issittormiut Siunnersuisoqatigiivittaaq (ICC) danskit naalagaaffiannut ersarissumik kaammattuuteqarput.
Arnat niviarsiaqqallu tusindillit spiralilersuinermut attuumassuteqartut, taakkunanngalu arlallit naartunaveersaatinik atuinerminnik kingunerluuteqarsimasut tusagassiutitigut nalunaarummi erseqqissarneqarpoq.
- Suliaq inuiaqatigiinnut inunnullu kinguneqarsimaqaaq,
kiisalu arnanut niviarsiaqqanullu ataasiakkaanut sakkortuunik
kinguneqarsimalluni.
- Taamaammat danskit ministeriunerata utoqqatsernera
taannaannaalluni naammanngilaq Danmarkimilu aaqqissugaasumik
iliuuseqartoqarnissaanik allannguisoqarnissaanillu kinguneqartariaqarluni.
Taamaanngippat ministeriunerup utoqqatsernera oqaasiinaassaaq, ICC-mi siulittaasoq Sara Olsvig oqarpoq.
Taamaammat nunasiaataasimanerup itinerusumik siammasinnerusumillu sunniuteqarsimanera pillugu Danmarkip iluani misissuisoqarnissaa kissaatigaat.
